Abanyarwandakazi bakoze ikoranabuhanga rizajya rimenyesha abantu aho bakorera siporo habegereye

Yanditswe na Evariste Nsengimana
Kuya 29 Ukuboza 2019 saa 05:16
Yasuwe :
0 0

Itsinda ry’abakobwa bane bakoze urubuga na Porogaramu bifasha abantu kubona amakuru y’ahantu ho kwidagadurira bitewe n’ubwoko bwa siporo bakunze, bakayabona nta kiguzi na kimwe batanze, bifashishije telefone cyangwa mudasobwa gusa.

Uru rubuga rwitwa WePlay bakoze nyuma y’amezi atandatu bahabwa amahugurwa mu bijyanye no gukora porogramu za mudasobwa na telefone muri gahunda ya WeCode ifasha abakobwa gukora ibijyanye n’ikoranabuhanga.

Imanishimwe Aime Clemence uri mu bakoze uru rubuga, yabwiye IGIHE ko barukoze bagamije gufasha abantu baburaga aho bakorera siporo kandi ari kimwe mu bikumira indwara zitandura zugarije Isi.

Ati “Twaje gusanga abantu benshi badakora Siporo ngororamubiri rimwe na rimwe kubera ko batazi aho kuzikorera cyangwa bahuze mu kazi no mu mpera z’icyumweru ugasanga babunza imitima bibaza aho bazikorera. Twategereje gukora urubuga rwabafasha kumenya aho bakorera siporo aho batuye mu buryo bworoshye.”

Urwo rubuga n’iyo porogaramu ishyirwa muri telefone, umuntu azajya yinjizamo izina ry’umurenge atuyemo ihite imwereka ahamwegereye ashobora kubona ubwoko bwa siporo akunda.

Ati “Iyo ukijyaho bwa mbere ubona siporo zitandukanye ushobora gukora, ukandikamo Umurenge utuyemo, igahita ikwereka ubwoko bwa siporo ushobora kubona muri uwo Murenge cyangwa hafi yawo.”

Uko ari bane bayikoze igihe cy’ibyumweru bine, batatu bakora urubuga rusanzwe mu gihe undi umwe yakoze Porogaramu ya mudasobwa.

Ugirimpuhwe Yvonne bafatanyije yavuze ko mbere yo kuyikora babanje kubaza abantu batandukanye niba bakeneye kwifashisha ikoranabuhanga mu gushakisha aho gukorera siporo.

Ati “78.9% by’abo twabajije batweretse ko iri koranabuhanga rikenewe. Kuyikoresha ni ubuntu, ujyaho ukaba wafungura aho uzajya winjiza umwirondoro wawe. Hariho n’uburyo wahitamo kwifatanya n’itsinda runaka risanzwe rikorera siporo ahantu runaka.”

Siporo ni kimwe mu bigabanya ibyago byo kurwara indwara zitandura. Indwara zitandura harimo diabète, umuvuduko w’amaraso, Kanseri n’izindi.

Mu nama abahanga mu by’ubuzima bagira abantu mu rwego rwo kuzirinda harimo gukora siporo ngororamubiri, kutanywa inzoga n’itabi byinshi.

Mu Rwanda, Ubushakashatsi bwakozwe n’Ikigo cy’Igihugu cy’Ubuzima ku ndwara zitandura mu 2013 bwagaragaje ko 2.8% bafite umubyibuho ukabije, 14.3% bafite ibiro byinshi bitajyanye n’uko bareshya naho 7.8% bafite ibiro biri munsi y’ibyo bakabaye bafite.

Bwagaragaje kandi ko ibibazo by’umubyibuko ukabije byiganje ku bantu bari hagati y’imyaka 35-54, muri bo abagore bakaba bagize 4.7%.

Ikindi ni uko ibibazo by’umubyibuho ukabije biri cyane mu mijyi ku kigero cya 10.2%. Ubwo bushakashatsi bwagaragaje ko 15% basanganywe umuvuduko ukabije w’amaraso, kandi ku bantu bari hagati y’imyaka 55 na 64 byiyongera ku kigero cya 40%.

Imanishimwe Aime Clemence na Ugirimpuhwe Yvonne, bamwe mu bagize itsinda ryakoze iri koranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza