00:00:00 IGIHE NETWORK KN KINYARWANDA EN ENGLISH FR FRANCAIS

Uko Pulasitike n’amashashi byangiza ibidukikije bigateza Isi ibibazo

Yanditswe na Prudence Kwizera
Kuya 10 April 2022 saa 12:33
Yasuwe :

Ikigo cy’Igihugu gishinzwe kubungabunga Ibidukikije (REMA) kivuga ko hashyizweho itegeko ryo gukumira pulasitike n’amashashi mu Rwanda kuko byangiza ubutaka bigateza n’ibibazo birimo imyuzure n’ibindi.

Ni umwanzuro wafashwe mu 2008 hagamijwe gukumira ingaruka pulasitike n’amashashi biteza mu Rwanda ariko kugeza ubu haracyari ikibazo cy’ibikoresho byo gupfunyikamo ku buryo byatumye intego itagerwaho.

Mu nama nyunguranabitekerezo iherutse guhuza Minisiteri y’Ubuhinzi n’Ubworozi ku bufatanye na Minisiteri y’Ubucuruzi n’Inganda n’izindi nzego, bamwe mu bikorera bagaragaje ko bagifite ikibazo cyo kubona ibyo bapfunyikamo bisimbura pulasitike n’amashashi.

Umugenzuzi w’Ibidukikije muri REMA, Rachael Busingye, yasobanuye ko pulasitike zikoreshwa rimwe zigira ingaruka mbi ku bidukikije ndetse zangiza ubutaka kuko zitabora.

Ati “Byagaragaye ko pulasitike ziri ku isoko inyinshi ntabwo zibora zimara imyaka igera muri 500 mu butaka. Turamutse tubiretse bigakoreshwa uko abantu bose bashatse byagira ingaruka no ku buhinzi dufite mu gihugu.”

Yakomeje avuga ko kuba muri ibi bihe imvura itagwa neza nabyo byatewe n’ihindaguruka ry’ibihe.

Ati “Twikumva ko iryo tegeko ryagiyeho kugira ngo ribuze abantu kubona ibyo gupfunyikamo bihendutse kuko turabizi ko pulasitike zihendutse ariko ni mu rwego rwo kurengera ibidukukije kugira ngo n’abazadukomokaho bazasange ubutaka buhari bushobora guhingwa nabo bazabone umusaruro.”

Pulasitike ni nk’uburozi

REMA ivuga ko Isi yugarijwe n’ikibazo cy’ingutu cy’ibikoresho bikoze muri pulasitike kuko bituma amazi adatemba uko bikwiye, bikabangamira amazi y’inyanja ndetse bikica ibinyabuzima byo mu mazi.

Ubushakashatsi bugaragaza ko ubutaka burimo amashashi, hashobora gushira imyaka itatu nta mazi arabwinjiramo.

Mu Rwanda ibikoresho bikoze muri pulasitike bikoreshwa inshuro imwe nk’amashashi byagiye bigira ingaruka mu guteza imyuzure no gutuma umusaruro w’ubuhinzi uba muke bitewe n’uko ayo mashashi abuza amazi kwinjira mu butaka. Ibyo bikoresho bya pulasitike kandi byagiye bihumanya ikirere igihe byabaga bitwitswe.

Mu 2008 mu Rwanda hatowe itegeko ryerekeye kubuza ikorwa, itumizwa, ikoreshwa n’icuruzwa ry’amashashi akoze muri pulasitike mu gihugu. Kubera ko andi moko ya pulasitike (atari amashashi akozwe muri pulasitike) nayo abangamira ibidukikije, byabaye ngombwa ko itegeko ryagurwa kugira ngo rirengere n’ayo moko yandi ya pulasitike.

Niyo mpamvu hatowe itegeko nimero 17/2019 ryo ku wa 10 Kanama 2019 ryerekeye kubuza ikorwa, itumizwa mu mahanga, ikoreshwa n’icuruzwa ry’amashashi n’ibikoresho bikoze muri pulasitike bikoreshwa inshuro imwe.

Umugenzuzi w’Ibidukikije muri REMA, Rachael Busingye, yasobanuye ko pulasitike zikoreshwa rimwe zigira ingaruka mbi ku bidukikije ndetse zangiza ubutaka kuko zitabora

REMA isobanura ko iryo tegeko rigamije kubuza ikoreshwa ritari ngombwa n’ijugunywa ry’ibikoresho bikozwe muri pulasitike bikoreshwa inshuro imwe kuko byari bimaze kuba umutwaro ku bidukikije. Muri rusange ibyo bikoresho birabujijwe.

Umugenzuzi w’Ibidukikije muri REMA, Rachael Busingye, yavuze ko bitewe n’uko hari impamvu zihariye zishobora gutuma ibikoresho bikoze muri pulasitike bikenerwa, ityo tegeko riteganya mu ngingo yaryo ya kane uburyo bwo gusaba uruhushya rwihariye.

Ati “Igihe byagaragaye ko nta kindi kintu ufite ushobora kuba wapfunyikamo, urasaba tukaguha uburenganzira bwihariye bwo gupfunyikamo [muri pulasitike] mu gihe hagishakishwa ibindi byo kuyisumbura.”

Ushaka gusaba urwo ruhushya yandikira REMA akagaragaza impamvu nyamukuru y’ubusabe bwe.

By’umwihariko ibikoresho bikoreshwa mu buvuzi, ubuhinzi n’amashyamba, itwarwa ry’imyanda n’isukura, ubwubatsi, ibikoresho by’inganda n’ibikorwa by’amacapiro ni byo byemerewe gusaba urushushya rwo gukoresha amashashi cyangwa pulasitike zikoreshwa inshuro imwe.

U Rwanda rwafashe ingamba

Nyuma y’umwanzuro wo guca amashashi mu gihugu, u Rwanda rwatangiye na gahunda yo kubyaza umusaruro amacupa ya pulasitike akigaragara akoreshwa rimwe, aho hatangiye imishinga yo kuyabyazamo ibindi bikoresho aho kuyajugunya ngo yangize ibidukikije.

Sosiyete yitwa Depot Kalisimbi Company Ltd yatangiye umushinga wo gufata amacupa ya pulasitike akoreshwa rimwe ikayabyazamo amatafari yo kubakisha.

Usibye amatafari, muri plastique hashobora gukorwamo ama-Pavé. Hari ibindi bihugu bikora amapoto y’amashanyarazi byifashishije amacupa n’intebe za pulasitike ku buryo adakomeza kuba ikibazo mu kwangiza ibidukikije.

Gusa inganda zicuruza amazi, nka Inyange zatangiye gukora amacupa y’ibirahure agomba gusimbura aya pulasitike, Skol nayo yakoze umushinga wo gucuruza amazi mu macupa y’ibirahure.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .