Ubuso bw’u Rwanda 30 % bwamaze guterwaho amashyamba

Yanditswe na Twarabanye Venuste
Kuya 3 Ugushyingo 2019 saa 11:14
Yasuwe :
0 0

Minisitiri w’ibidukikije, Vincent Biruta, yatangaje ko u Rwanda rwageze ku ntego rwari rwarihaye y’uko mu 2020 , 30% y’ubuso bwarwo ruzaba ruteyeho amashyamba.

Mu 2011, Guverinoma y’u Rwanda yihaye intego ko mu 2020, ubuso bungana na 30%, buzaba buteyeho amashyamba, naho mu 2030 bukaba bugeze kuri hegitari miliyoni ebyiri mu 2030, hagamijwe kurengera urusobe rw’ibinyabuzima.

Mu isuzuma ry’aho urwego rw’amashyamba rugeze, mu ntego nyinshi zitandukanye rwihaye n’intego zo kuruteza imbere mu myaka iri imbere, hagaragajwe ko intego ya mbere yagezweho, nkuko The New Times yabitangaje.

Minisitiri Vincent Biruta, yagize ati “Mu mwaka w’ingengo y’imari wa 2018/19 urwego rw’ibidukikije n’umutungo kamere rwageze kuri byinshi ndashimira ubufatanye n’abafatanyabikorwa batandukanye. Ndagira ngo mbabwire ko ubwo bufatanye bwatumye tugera kuri 30% dutera amashyamba aho atari ateye n’aho yatemwe.”

Iyi ni intego y’ibanze mu zigamijwe kugerwaho mu 2020. Ati “Dushobora kwishimira aho tugeze.”

Inyigo yerekanye ko hagati ya 1990 na 2010, u Rwanda rwatakaje 37% by’amashyamba yarwo bitewe no kuyatema.

Minisitiri Biruta yagize ati “Twongeye gutera ibiti aho byari bayatemwe kugira ngo tubungabunge imigezi kandi nishimiye kubabwira ko hegitari zirenga 3,000 zatewe kuri Nyabugogo, Muvumba, Sebeya n’igice cya ruguru cya Nyabarongo.”

Yongeyeho ati “Abikorera bajya mu bijyanye no kubungabunga amashyamba nabo bariyongereye. 30% by’amashyamba ya leta ubu aracungwa n’abikorera kandi tuzakomeza gukorana n’abafatanyabikorwa mu kongera kugeza kuri 80% mu 2024.”

Amashyamba ya leta ari kuri hegitari 65,000 hatabariwemo Pariki z’igihugu.

Mu gukaza politiki n’amategeko Minisitiri Biruta yavuze ko Minisiteri yashyizeho politiki nshya n’ingamba zigamije kwita ku mashyamba, ibidukikije, imihindagurikire y’ibihe, ubutaka no gucunga ibipimo by’ubushyuhe.

Guverinoma yashyizeho uburyo bushya bwo kongera amashyamba bikozwe n’abikorera ndetse no kuyacunga neza.

Yashyizeho amatsinda y’abikorera yo gucunga amashyamba “Private Forest Management Units:PFMU” aho amashyamba ari ku buso buto acungwa n’amakoperative.

Ayo matsinda agizwe n’amakoperative 8 y’abikorera bato yageragerejwe mu turere twa Gakenke, Gicumbi, Rulindo na Rwamagana mu buryo bw’igerageza yabashije gutera amashyamba kuri hegitari 276.

Umuryango Mpuzamahanga wita ku bidukije (IUCN) utangaza ko gusana hegitari imwe y’ubutaka haterwa amashyamba, bisaba amadolari asaga 1000 ariko mu Rwanda ngo ntageramo (ari hagati ya 200 na 400) kubera byinshi bikorwa n’abaturage mu muganda.

Mu 2011, Guverinoma y’u Rwanda yihaye intego ko mu 2020, ubuso bungana na 30%, buzaba buteyeho amashyamba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza