Ubushakashatsi bwerekanye ko Umuryango w’ingagi zo mu Birunga uri kwaguka

Yanditswe na Twarabanye Venuste
Kuya 19 Ukuboza 2019 saa 12:52
Yasuwe :
0 0

Ubushakashatsi bushya bw’ Umuryango ugamije guteza imbere ibyo kurengera urusobe rw’ibinyabuzima mu gace k’Ibirunga (Greater Virunga Transboundary Collaboration, GVTC) bwerekanye ko Ingagi zo mu misozi, zifatwa nka zimwe mu nyamanswa ziri gukendera ku Isi, ziyongereye muri pariki y’Ibirunga aho zigeze ku 1,063.

Ubwo bushakashatsi bwerekana ko ingagi zo mu ishyamba rya Bwindi muri Uganda na Sarambwe muri Repubulika Iharanira Demokarasi ya Congo (RDC) zavuye kuri 400 zikagera kuri 459.

Mu Rwanda, imibare y’ingagi yariyongereye zigera kuri 604 zivuye kuri 480 zabarurwaga umwaka ushize. Ibyo byatumye ingagi zibarurwa mu gice cy’imisozi y’Ibirunga zigera ku 1,063.

Ubushakashatsi bwakozwe bigizwemo uruhare n’Ikigega cyita ku ngagi muri Pariki y’Ibirunga (Dian Fossey Gorillas Fund) bushyirwa ahagaragara ku wa mbere tariki 16 Ukuboza 2019.

Umuyobozi wa Dian Fossey, Dr Tara Stoinski, yagize ati “ Ibyavuye muri ubu bushakashatsi ni gihamya y’imbaraga zo kwita ku bidukikije, hagati ya Guverinoma zirimo iy’u Rwanda, RDC na Uganda.”

Yongeyeho, ati “Ingagi zo mu misozi ni zimwe mu nyamaswa zirinzwe cyane kuri uyu mugabane, kandi uyu munsi turabona icyo imbaraga z’abafatanyabikorwa mu kuzitaho zishobora gukora. Ni akazi gakomeye ku baturage, abayobozi ba za Guverinoma n’ababungabunga urusobe rw’ibinyabuzima, ariko bishobora gukorwa.”

Mu bushakashatsi bwabanje, ku ngagi zo mu misozi, ababukoze bageze mu bice byose by’ishyamba bashaka ibyafasha kubona amakuru ku ngagi n’izindi z’inyamabere n’ibimenyetso by’ibikorwa bya muntu.

Mu bikorwa byabo bakusanyije umwanda wazo kugira ngo harebwe inkomoko yazo, ibyo byakozwe inshuro ebyiri kuva muri Werurwe kugeza Gicurasi 2018 no kuva mu Kwakira kugeza Ukuboza 2018 kugira ngo bimenyekane neza ko buri ngagi yagezweho.

Mu mwaka ushize, Ikigo cy’igihugu gishinzwe iterambere (RDB) cyongeye ubuso bwa Pariki y’igihugu y’Ibirunga iherereye mu Majyaruguru y’u Rwanda buva kuri Hegitari 16,000 bugera ku 16,027 hagamije kwita ku rusobe rw’ibinyabuzima biyirimo.

Mu Rwanda, imibare y’ingagi yariyongereye zigera kuri 604 zivuye kuri 480 zabarurwaga umwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza