Rubavu:Abagize Dasso bateye ibiti byo gufata ubutaka ku mugezi wa Sebeya

Yanditswe na Mukwaya Olivier
Kuya 20 Ukuboza 2020 saa 11:22
Yasuwe :
0 0

Kuri uyu wa Gatandatu, abagize urwego rushinzwe kunganira akarere mu gucunga umutekano (DASSO), bateye ibiti 2128 ku nkengero z’umugezi wa Sebeya mu murenge wa Rugerero mu karere ka Rubavu, byitezweho kubungabunga ibidukikije no gufata ubutaka bwajyaga butwarwa n’amazi y’uyu mugezi.

Ibi biti byatewe kuri uyu wa Gatandatu mu muganda, bikaba byatewe ku buso bungana na hegitari ebyiri .

Umuhuzabikorwa wa DASSO ku rwego rw’akarere ka Rubavu, Tungane Dieudonnee yashimiye DASSO uruhare rwabo mu bikorwa by’iterambere,

Yavuze ko bamaze amezi abiri bakora ibikorwa bigamije gufasha abaturage mu iterambere, yizeza ko bizanakomeza.

Yagize ati “Ndabashimira ukuntu mukomeje kwitanga mu bikorwa by’iterambere tumaze amezi abiri turimo kuko hari abaturage bakomeje kudushimira kuko hari abo bimaze guhindurira ubuzima kandi bizakomeza kuko abaturage bakomeje kubyishimira’’.

Umunyamabanga Nshingwabikorwa w’umurenge wa Rugerero, Nkurunziza Faustin yashimiye abagize urwego rwa Dasso, avuga ko ibiti byatewe bizakumira isuri n’ibyago byaterwa n’uko umugezi wa Sebeya utabungabunzwe.

Ati “Hariya hantu hagaragaraga nk’ubutayu kuburyo hashoboraga guteza isuri bigateza n’ibibazo byajyaga biterwa nuko inkengero z’umugezi wa Sebeya zitabungabunzwe neza. Byashimishije abaturage n’inzego zose z’umurenge. Byakomeje gushimangira imikoranire myiza hagati y’abaturage n’urwego rwa Dasso’’

Abagize urwego rwa Dasso mu karere ka Rubavu bamaze amezi abiri mu bikorwa by’iterambere mu mirenge itandukanye igize akarere aho nko mu murenge wa Nyundo bubakiye inzu umuturage utishoboye.

Ibi bikorwa biteganijwe ko bizasorezwa mu murenge wa Mudende aho imiryango 20 y’abasigajwe inyuma n’amateka izahabwa ibiribwa n’udupfukamunwa two kwirinda Covid-19.

Abagize urwego rwa Dasso mu karere ka Rubavu bateye ibiti bizabungabunga umugezi wa Sebeya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .