00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Umusozi wari ugiye kuriduka watangiye kubungabungwa

Yanditswe na Claude Bazatsinda
Kuya 1 May 2022 saa 08:34
Yasuwe :

Abaturage bo mu Murenge wa Kinigi bafatanije n’inzego z’ubuyobizi n’iz’umutekano batangiye kubungabunga umusozi wa Bisate wari watangiye kugaragaza ibimenyetso byo kuriduka, bawuteraho ibiti byinshi, ubwatsi bw’amatungo no guca imirwanyasuri mu rwego rwo gufata amazi awuturukaho.

Umusozi wa Bisate usanzwe ugizwe n’igice kimwe gikorerwaho ubuhinzi n’ikindi gice giteyeho amashyamba. Mu nkengero zawo hari abaturage bahatuye ariko kubera imvura nyinshi imaze iminsi igwa, uyu musozi wagaragazaga ibimenyetso byo kuriduka ari nayo mpamvu bawuteyeho ibiti bisaga ibihumbi bitandatu mu kwirinda ko ushobora kubateza inkangu zahitana ubuzima bw’abahatuye ndetse n’imyaka yabo ikangirika.

Bamwe mu baturage bahatuye n’abahakorera ibikorwa by’ubuhinzi bavuga ko uyu musozi utari usanzwe uriduka ariko muri iki gihe cy’imvura nyinshi yaguye wari watangiye kuriduka. Bavuze ko bari bafite impungenge ko wabateza inkangu, bagasaba ubuyobozi gukomeza kubaba hafi mu gukora umuganda uhoraho batarindiriye ko bikorwa mu gihe cy’imvura gusa.

Uwimana Annonciata, umwe mu baturage batuye hafi y’uyu musozi yagize ati " Ubusanzwe iyo imvura nyinshi yagwaga hazaga isuri iturutse kuri uyu musozi amazi akarengera ibirayi n’ibireti bihinze aha, none ubu watangiye kuriduka, hari n’ubwo umuntu ahinga ubutaka bugatangira gutirimuka buriduka. Dufite ubwoba ko hazaba inkangu ikaba yaduhitana. Twateye ibiti ariko turashaka ko ubuyobozi butuba hafi tugafatanya kubungabunga uyu musozi."

Hategekimana Jean yavuze ko ubwo bari gutera ibiti n’ibyatsi bifata ubutaka, bafite icyizere ko umusozi utakiridutse.

Ati " Twumva ahandi inkangu zirimo guhita abaturage mu Ntara yacu n’ahandi, iyi Bisate ntiyakundaga kugira ibibazo byo gutenguka ubu nibwo imirima yari yatangiye kuriduka, urumva ko twatangiye kugira impungenge ko havuka inkangu, gusa ubuyobozi bwadufashije duteye ibiti, ubwatsi bw’amatungo bizafata ubu butaka, twifuza ko hakorwa imiganda myinshi tugakumira inkangu hakiri kare."

Umuyobozi w’Akarere ka Musanze wungirije ushinzwe Imari, Ubukungu n’Iterambere, Rucyahana Mpuhwe Andrew yasabye abaturage gukomeza kubungabunga ibiti byahatewe, birinda ko wateza ibibazo byo kubangiriza imyaka n’ubuzima bwabo.

Yagize ati “Twifatanyije n’abaturage dutera ibiti 6100 kuri uyu musozi wa Bisate mu rwego rwo kuwubungabunga twirinda ko wariduka kuko hari ho imirima yagiye n’imyaka irangirika, ikindi bikorwa hagamijwe kubungabunga Parike y’Ibirunga ibegereye, ibi biti twateye nibyo bizafata ubu butaka bityo uyu musozi nturiduke, twabasabye kubifata neza birinda kubirandura, kubyonesha Kandi tuzafatanya kubikurikirana twongere imiganda twirinda ko wateza inkangu."

Muri iki gihe cy’imvura nyinshi, mu Karere ka Musanze cyane cyane mu gice cyegereye Pariki y’Igihugu y’Ibirunga, hakunze kugaragara Ibiza bituruka ku mazi menshi y’imvura agateza imyuzure mu myaka no mu nzu z’abaturage.

Umusozi wa Bisate wateweho ibiti 6100, mu rwego rwo kuwubungabunga hirindwa inkangu, ariko bikaba biteganyijwe ko no ku yindi musozi iri muri uyu Murenge wa Kinigi hazaterwa ibiti bisaga ibihumbi 40 muri uyu mwaka mu rwego rwo kubungabunga Parike y’Ibirunga n’indi misozi iwuherereyemo.

Uyu musozi ufatiye runini abaturage bawuturiye kuko ukorerwaho ubuhinzi, ukaba uteye n'amashyamba
Abaturage bitabiriye umuganda ku bwinshi barwanya isuri yashoboraga kubateza inkangu
Abayobozi batandukanye bifatanyije n'abaturage mu gutera ibiti ku musozi wa Bisate wari watangiye kuriduka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .