00:00:00 IGIHE NETWORK KN KINYARWANDA EN ENGLISH FR FRANCAIS

Abaragira amatungo ahantu hakomye bashobora kujya bacibwa amande agera kuri miliyoni eshatu

Yanditswe na Muhonzire Sylvine
Kuya 12 Kanama 2021 saa 12:28
Yasuwe :

Kwinjiza cyangwa kuragira amatungo yo mu rugo ahantu hakomye nko muri Parike, mu ishyamba ribamo inyamaswa zitandukanye n’ahandi nka ho bishobora kujya bihanishwa amande ari hagati y’ibihumbi 100 na miliyoni eshattu z’amafaranga y’u Rwanda.

Ibi byaganiriweho mu nama yahuje Inteko Ishinga Amategeko Umutwe w’Abadepite yabaye kuwa 11 Kanama 2021, ubwo bemezaga umushinga w’itegeko ryerekeye urusobe rw’ibinyabuzima n’ibinyabuzima byo mu gasozi nk’uko tubikesha The New Times.

Mu ngingo ya 52 y’iri tegeko rigena ibihano by’uwaragiye ahantu hakomye, bamwe mu badepite ntibemeranyije kuri aya mande azajya acibwa uwakoze iri kosa, aho babiri banze kuritora abandi 57 bakaryemeza.

Depite Muhakwa Valens, yavuze ko intera iri hagati y’aya mande ari nini cyane ndetse ko hakwiye kujya hashingirwa ku gaciro k’amatungo kugira ngo hirindwe kurengera rimwe na rimwe.

Depite Ntezimana Jean Claude we yavuze ko aya mande ashobora kubera umutwaro abantu baturiye ahantu hakomye cyangwa harinzwe, avuga ko iri itegeko riterekana ingano y’amafaranga ashobora gucibwa uragiye ubwoko bw’amatungo runaka nk’inka, ihene, intama cyangwa ayandi.

Ati “Hari amatungo mato, buri rimwe rifite agaciro kari munsi ya 100.000 Frw. Ayo mande agomba guhera nibura ku 50.000 Frw bitewe n’agaciro k’itungo. Ndetse ni ngombwa ko hagenderwa ku bushobozi bw’abaturiye utwo duce.”

“Kuba abantu baturiye agace karinzwe ntabwo ari amakosa yabo kuko bazajya bahora bahangayikishijwe no kurinda amatungo kandi rimwe na rimwe ashobora kubacika akajya aho hantu batabizi.”

Depite Mussa Fazil Harerimana na we abona ko bidakwiriye ko hacibwa amande ya miliyoni eshatu umuntu uragiye ihene ahantu hakomye ndetse akanacibwa uharagiye inka. Avuga ko hakwiriye kubaho uburyo bagena amande bigendanye n’amatungo.

Depite Kayumba Uwera Marie Alice, uhagarariye komisiyo ishinzwe ubutaka, ubuhinzi, ubworozi n’ibidukikije, yavuze ko impamvu aya mande ateye gutya, byashingiwe ku mubare w’amatungo ari kuragirwa ahantu hakomye ndetse n’ingaruka ashobora guteza kugira ngo abantu babyirinde babishyizeho umutima.

Ati “Niba umuntu aturiye ahantu hakomye agomba kwitonda. Kuko amande ya 100.000 Frw ni make ku muntu uragiye cyangwa winjije itungo ahantu nk’aho ugereranyije n’ayo ibindi bihugu bituye mu karere dutuyemo byashyizeho.”

Yongeyeho ko amande aramutse ari make abantu bashobora kuragira cyangwa kwinjiza amatungo aho hantu ku bushake kuko baba bazi ko byoroshye kuyishyura.

Inteko Rusange Umutwe w’Abadepite ntabwo yigeze yemeza amande ku ngingo zose zirebana n’umushinga w’itegeko ryerekeye urusobe rw’ibinyabuzima n’ibinyabuzima byo mu gasozi, aho biteganyijwe ko bizasubukurwa ikindi gihe kitaramenyekana.

Kuragira amatungo ahantu hakomye nko muri parike bizajya bihanishwa amande ashobora kugera kuri miliyoni 3 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .