Abanyarwanda banyuzwe n’imigendekere y’Iserukiramuco ry’imideli mu Burundi

Yanditswe na

Richard Irakoze

Kuya 7 Ukuboza 2014 saa 02:01
Yasuwe :
0 0

Bujumbura, Umujyi w’u Burundi, mu mpera z’icyumweru dusoje wakoraniyemo abahanga b’ingeri zinyuranye mu byo kumurika imideli baturutse mu bihugu Kenya, Uganda, Sudani y’Epfo, Ivory Coast n’u Rwanda mu iserukiramuco bise “Burundi Fashion Night”.
Mu myambaro myiza igaragaza uburanga bw’uruvangitirane rw’imyambarire iranga umuco w’ibi bihugu abasore n’inkumi bari bamaze igihe babyitoza kuri uyu wa 5 Ukuboza 2014 nibwo berekanye impano zabo mu bijyanye no kwerekana imideli.
Bari baherekejwe n’abahanzi (...)

Bujumbura, Umujyi w’u Burundi, mu mpera z’icyumweru dusoje wakoraniyemo abahanga b’ingeri zinyuranye mu byo kumurika imideli baturutse mu bihugu Kenya, Uganda, Sudani y’Epfo, Ivory Coast n’u Rwanda mu iserukiramuco bise “Burundi Fashion Night”.

Mu myambaro myiza igaragaza uburanga bw’uruvangitirane rw’imyambarire iranga umuco w’ibi bihugu abasore n’inkumi bari bamaze igihe babyitoza kuri uyu wa 5 Ukuboza 2014 nibwo berekanye impano zabo mu bijyanye no kwerekana imideli.

Bari baherekejwe n’abahanzi babambika baje baserukiye ibihugu byabo, baje no kwerekana imyambaro (collection) bakoze.

Abasore b'intarumikwe b'Abarundi n'Abayarwanda bari bitabiriye iri serukiramuco ryo kumurika imideli

Byari ibyishimo n’akanyamuneza ku bari ahabereye iki gitaramo ngarukamwaka kibaye ku nshuro ya gatatu.

Nk’agashya, iri serukiramuco ribaye ku nshuro ya gatatu ryabereye ahantu hatamenyerewe. Hitwa Garage TOYOTA, ubusanzwe hagurishirizwa amamodoka. Hari hateguwe ku buryo bwa gihanzi ngo bitange igisobanuro cy’uko imideli ishobora kwifashishwa ahantu aho ari ho hose, basaba ko inzego zose zashoramo imari.

Buri wese yagaragazaga amarangamutima ye, bitewe n’uwo yishimiye agakoma amashyi yerekana ko anyuzwe n’imyambaro cyangwa se uko uyambaye yaberewe cyangwa se uko ari kugenda.

Urebye ku maso yabo, abenshi bari bafite amatsiko yo kureba uko buri gihugu cyaserukiwe cyitwara, buri muntu ashaka kumenya uri buhige uwundi nubwo byari bigoye kuko nta wutakoraga iyo bwabaga ngo yerekane ko imyambaro ye ari yo myiza kurusha iy’abandi.

Bose ariko bahurizaga ku kintu kimwe; bakomaga amashyi menshi babonye inkumi cyangwa se umusore userutse yambaye yaberewe kurusha abandi kandi uzi kubigendera.

Iri shyaka kuri buri muhanzi w’imideli ryatumye iki gitaramo kiryohera ijisho; kinasigira isomo abari baryitabiriye, by’umwihariko abaserukiye u Rwanda.

Aba Banyarwanda bane bari baserukiye igihugu ni Jeanine Dusabimana, Ntabanganyimana Jean de Dieu (uzwi nka Jay), Harerimana Gamariel na Asoumpta Ingabire wari waje ahagarariye Inkanda House.

Avuga ku byo yashimye igihugu cye cyakwigira ku Burundi, Harerimana Gamariel w’imyaka 33, umaze imyaka irenga itanu mu kumurika imideli, yagize ati “Mu Rwanda tubimazemo igihe kandi ubona ko dufite ababirimo benshi ariko icyo nabonye mu Burundi baturusha ni uko ibijyanye n’imideli byabo biri kuri gahunda cyane, ubona ko bazi gutegura ibintu byabo bikagendera ku murongo, icyo kintu kiri mu byo twabigiraho.”

Flora Lian Albino wo muri Sudani y’Epfo na we nubwo yari yaje kumurika ibikorwa bye, yigereranyije na bagenzi be yavuze ko abona ko hari icyo ashobora kuvana mu Burundi nk’isomo.

Yagize ati “Byakozwe mu buryo bwa kinyamwuga, buri muntu watumiwe yari umuhanga yerekana impano ye mu buryo busobanura aho akomoka ibi ngomba kuzabitoza ab’iwacu”

Iki ni nacyo Assoumpta Ingabire w’Umunyarwandakazi wari waje ahagarariye Inkanda House yashimangiye agira ati “Natunguwe, hari abahanzi b’abahanga buriya nize ko ashobora gufata umuco we akawugaragaza mu myambarire.”

Elvira Gakiza w’imyaka 24, umwe mu bari bitabiriye iri serukiramuco, yavuze ko kuri we byari ibirori by’akataraboneka, kuko Abarundi yabonye ko bateye imbere, basigaye bazi kwiyerekana neza mu ruhando rw’abahanga baturutse imihanda yose.

Nella Ngingo, wamamariza Sosiyete zikomeye nka Vogue, l’Oreal na ELLE Magazine; aha yerekanaga imideri ya DAVYK

Cyo kimwe n’abandi bagiye bashima imyenda bitewe n’amarangamutima yabo. Umwe mu bashimye Abanyarwanda yagize ati “Urebye muri rusange aba banyamideli batweretse imyenda myiza, ariko iyo mu Rwanda yo mu Nkanda House yari myiza kurusha abandi, njye nayikunze cyane isa neza iragaraza amabara acyeye kandi ifite umwihariko w’uko yakwambarwa no mu bihe bisanzwe ukaberwa”.

Uku guhuza abanyamideli ni igikorwa cyateguwe na Agence Esther ya Davy Carmel Ingabire, umunyamideli ubikunda w’Umurundi. Byabaye urubuga rwo guhanahana ubumenyi no kungurana ibitekerezo kuri uyu mwuga, nk’uko Darlene umwe mu bakobwa bamukaga imideli wo muri Agence Esther, abishimangira.

Darlene avuga ku buryo yabonye Abanyarwanda yagize ati “Twakunze uko abasore n’inkumi baho bitwara mu kumurika imideli, ubona ko babizi, twarishimye gukorana nabo, ni abana beza.”

Kwambara bireba abantu b’ingeri zose, iyi ngingo Davy Carmel Ingabire wateguye ibi birori ayishingiraho agasaba ko inzego zose zabigiramo uruhare, uru rwego rugatera imbere haherewe ku bukangurambaga bunyuze mu bitaramo bikomeye nk’ibi.

Ingabire yagize ati “Turahamagarira abantu kugura imyenda y’iwacu aho kugura hanze, tugasaba abanyabishoro aho uko bose bajya mu byo kubaka amahoteli n’inganda gusa, aho kugura amamodoka ahenze, ahubwo bashora imari yabo no mu bijyanye n’imideli abafite impano bakabikora bya kinyamwuga bikazamura n’ubukungu bwacu.”

Muri iri serukiramuco hari hatumijwe Nella Ngingo, umurundikazi w’imyaka 23, kabuhariwe mu byo kumurika imideli, uba mu Buholandi. Uyu mukobwa akorana n’amasosiyete atatu akomeye mu Buholandi, mu Bwongereza n’i Paris mu Bufaransa.

Ngingo wari umushyitsi mukuru yamamaye cyane ubwo yakoranaga n’amasosiyete akomeye ku rwego mpuzamahanga ya Vogue, l’Oreal na ELLE Magazine asanzwe mu kwerekana imideli kwamamaza akorana n’ibyamamare bikomeye ku Isi.

Mu myenda yerekanywe harimo n'iyi ushobora kugura ukajya uyambara mu buzima busanzwe
Aya ni amwe mu mashati meza yerekanywe n'Abasore b'inkorokoro b'Abarundi
Uyu ni Okori Juliana, Umugandekazi w'umuhanzi mu by'imideri
Okori yashimishijwe no kwereka u Burundi imyambaro ye, aha yashimiraga abitabiriye iri serukiramuco
Darlene wo muri Agence Esther, umwe mu bakobwa bishimiwe n'abarebaga ibi birori
Herekanywe imyenda ya kinyafurika, uyu ni Umunyarwanda Harerimana Gamariel uzwi cyane ku kabyiniro ka Gama
Harimo n'imyambaro yerekanywe abayambaye bafite 'casques' mu mitwe
Utwenda tugufi tw'abakobwa n'udukoti twatwo; imyambaro ya DAVYK yakunzwe na benshi mu bari bitabiriye iki gitaramo
Abantu bari bafite amatsiko yo kureba imyambaro y'ibihugu byitabiriye iri serukiramuco
Aha uwakoze iyi myambaro yari arimo akomerwa amashyi
Iyi ni imwe mu myenda yakunzwe cyane ya DAVYK
Ntabanganyimana Jean de Dieu (Jay), Umusore w'ibigango wari waturutse mu Rwanda
Inyuma habaga handitse imyenda iri kwerekana aho ituruka; iyi ni iyo mu Rwanda
Asoumpta Ingabire wari waje ahagarariye Inkanda House
Icyamamare Nella Ngingo, Umurundikazi w’imyaka 23, yashimangiye ko u Burundi bwatera imbere abashoramari babigizemo uruhare
Prisca, Umurundikazi wahanze imyambaro yise KAPRI Fashion
Davy Carmel Ingabire washinze Agence Esther akaba ari nawe wateguye iri serukiramuco
Aba ni abahanzi b'imideli bari baturutse muri ibi bihugu binyuranye birimo Kenya, Uganda, Sudani y’Epfo, Ivory Coast, u Burundi n’u Rwanda
Ntabanganyimana Jean de Dieu (Jay)

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .