00:00:00
IGIHE NETWORK

Ubuhanga buhambaye bw’abakobwa bakora amasakoshi, ingofero n’intebe mu birere

Tekereza umunsi buri biro bya buri muyobozi cyangwa umukozi wo mu Rwanda hazaba hateretse poubelle ikoze mu birere, imigano n’imigwegwe, cyangwa umunsi abagore bose bo mu Rwanda bazaba bagenda behetse amasakoshi akoze mu birere, atatsweho imigwegwe kandi akomeye kuruta aturuka i Dubai, Amerika n’i Burayi.
Ni zo nzozi z’abagize Koperative Urungano Karenge, igizwe n’abakobwa bato barangije amashuri yisumbuye, babonye ko ibimera bisuzuguritse biboneka iwabo bishobora kubyazwa umusaruro wagirira (...)

Tekereza umunsi buri biro bya buri muyobozi cyangwa umukozi wo mu Rwanda hazaba hateretse poubelle ikoze mu birere, imigano n’imigwegwe, cyangwa umunsi abagore bose bo mu Rwanda bazaba bagenda behetse amasakoshi akoze mu birere, atatsweho imigwegwe kandi akomeye kuruta aturuka i Dubai, Amerika n’i Burayi.

Ni zo nzozi z’abagize Koperative Urungano Karenge, igizwe n’abakobwa bato barangije amashuri yisumbuye, babonye ko ibimera bisuzuguritse biboneka iwabo bishobora kubyazwa umusaruro wagirira akamaro igihugu cyose.

Mu mwaka wa 2008 nibwo u Rwanda rwaciye amashashi kuko yangiza ibidukikije, agatuma ubutaka budasoma ngo bukomeze kubyara umusaruro nka mbere.

Nubwo yaciwe, aracyaboneka yinjizwa magendu nubwo ababikora babizi ko iyo bafashwe bahanwa bikomeye.

Kubera kubura ibisimbura bimwe mu bikoresho bya pulasitiki cyangwa amashashi apfunyikwamo ibicuruzwa bimwe na bimwe, u Rwanda ruracyemera ibicuruzwa bitandukanye bipfunyitse mu bintu byangiza ibidukikije.

Byinshi mu bikoresho Abanyarwanda bakoresha nk’intebe, ingofero, amasakoshi, udukoresho dushyirwamo umunyu cyangwa utubikwamo ibiyiko usanga dukoze muri pulasitiki kandi bizwi neza ko byangiza ibidukikije.

Buri mwaka toni umunani za pulasitiki zijugunywa mu Nyanja. Loni igaragaza ko hatagize igikorwa mu mwaka wa 2050 pulasitiki mu Nyanja zizaba ziruta amafi arimo.

Ubushomeri, kubyaza umusaruro ibintu bidahabwa agaciro bibegereye n’umuhate wo kurengera ibidukikije ni byo byatumye Nyirarukundo Spéciose na bagenzi be, mu ntangiriro za 2018 batangiza Koperative bise “Urungano Karenge”.

Ni koperative igizwe n’abakobwa 20 kandi bose barangije amashuri yisumbuye.

Mu minota nka 30 mu modoka, iyo uvuye Rugende, ku muhanda Kigali-Rwamagana ugera mu gasentere gato kari munsi ya Paruwasi ya Kiliziya Gatolika ya Karenge.

Mu cyumba gito cya metero ebyiri kuri eshatu gishashemo umukeka, akabati kuzuyemo ibikoresho bikozwe mu birere n’imigwegwe niho umunyamakuru wa IGIHE yasanze abakobwa bagera mu munani bazwi nk’abakobwa bo ‘mu birere’ bibumbiye muri Koperative Urungano.

Bari bicaye, bamwe baboha poubelles, ingofero, udukoresho tubikwamo ibiyiko, utw’umunyu n’ibindi.

Umuyobozi w’iyo Koperative, Nyirarukundo Spéciose, avuga ko igitekerezo cyo kwihuriza hamwe cyaje ubwo bari bamaze guhabwa amahugurwa n’umushinga witwa Indego Africa, bakerekwa uburyo babyaza agaciro ibikoresho biboneka hafi yabo bisuzuguritse.

Ati “Koperative yacu yaje kongera agaciro bimwe mu bihingwa twari dufite mu murenge wacu. Urugero nk’insina, ibishishwa by’ibigori, imigwegwe twari dutunze mu mashyamba idafite byinshi itumariye, ibyatsi byo mu bishanga nk’ubusuna, imikindo, byose nibyo tubasha gukora tukabibyaza umusaruro.”

Batangije ibihumbi 30 Frw bajya kugura ibikoresho. Ayo mafaranga ni ayo bari barakuye mu bikoresho bagiye bakora ubwo bahugurwaga.

Ubushomeri, kubyaza umusaruro ibintu bidahabwa agaciro bibegereye n’umuhate wo kurengera ibidukikije nibyo byatumye Nyirarukundo Spéciose na bagenzi be, mu ntangiriro za 2018 batangiza Koperative bise “Urungano Karenge”

Mu gutangira, babanje guhura n’ingorane. Abaturanyi bari basanzwe bazi ko ibirere bibyara ifumbire cyangwa bigakorwamo ivu rihungira amasaka bakenga ikigage.

Imitumba y’insina ivamo ibirere byiza by’umweru, mbere yagaburirwaga inka cyangwa igatemwa ngo izabore ibyare ifumbire.

Mbere abaturage babanje no kujya babima ibirere, imigwegwe n’ibindi, bikaba ngombwa ko bajya kubivana mu tundi duce.

Nyirarukundo ati “Muri uyu murenge wacu ntabwo bari bakabimenye. Insina zirahari ariko ntibari bazi ngo ibirere by’umweru babitunganya bate? Twajyaga kubikura Kayonza, imikindo tukajya kuyishaka mu Bugesera, Ngoma na Kicukiro.”

Ibikoresho bikorwa na Koperative Urungano, bifite isoko cyane muri Leta Zunze Ubumwe za Amerika no mu Buyapani.

Mu Rwanda ntabwo biratangira kugurwa cyane kandi Nyirarukundo avuga ko ari byo bibereye iguhugu cyihaye intego yo guca amashashi na pulasitiki.

Ati “Poubelles zisanzwe zirasaza tugatwika imyuka ikangiza ikirere, ibintu nk’ibyo nibyo twaje tuje gushaka igisubizo cyabyo. Ibyo dukora ntabwo byangiza ikirere. Niba ibirere wamaze kubitunganya ugakuraho icyo ukoresha, ibisigaye tujya kubishyira mu kimoteri bigahinduka ifumbire.”

Aba bakobwa bakora iminsi itatu mu cyumweru, haba hari ibiraka byinshi bagakora iminsi yose.

Amafaranga make cyane ashoboka umunyamuryango ashobora gukorera ku kwezi ni ibihumbi 15 Frw.

Uwimanimpaye Sylvie, umwe mu banyamuryango yabwiye IGIHE ko ubu bitakiba ngombwa ko asaba ababyeyi buri kimwe.

Ati “Ubu nshobora kwigurira amavuta ntabwiye mama ngo bimeze gutya, umwenda mfitiye ubushobozi nawugura, ntabwo hanze umuntu agaragara nabi.”

Niyoyita Francine ngo mbere atarahura na bagenzi be ngo bihangire umurimo, yabonaga amafaranga agombye kuyahingira.

Ati “Nabaga nzi ko mbona amavuta kuko najyanye n’umubyeyi mu murima cyangwa se nagiye kuyahingirira ku ruhande, ariko ubu mba nzi neza ko ninkora hano ku kwezi hari amafaranga mbona bitewe n’uko ibiraka byabonetse.”

Mu myaka itanu iri imbere, abagize iyi koperative barifuza kongera abanyamuryango kugira ngo igihe babonye ibiraka babyihutishe.

Bemeza ko nta we bahanganiye isoko mu Rwanda ahubwo igisabwa ari ukumenyekanisha ibyo bakora no kubigeza kuri benshi bashoboka.

Abo ni bamwe mu bari gufasha Leta kugabanya umubare w’ubushomeri mu rubyiruko dore ko buri kuri 21 % nkuko imibare yo mu 2017 y’Ikigo cy’Igihugu cy’Ibarurishamibare ibigaragaza.

Muri gahunda ya Guverinoma y’imyaka irindwi (2017-2024) harimo kugabanya umubare w’abashomeri, hahangwa imirimo nibura miliyoni 1.5.

Amafaranga make cyane ashoboka umunyamuryango ashobora gukorera ku kwezi ni ibihumbi 15 Frw
Umuyobozi w’iyo Koperative, Nyirarukundo Spéciose avuga ko igitekerezo cyo kwihuriza hamwe cyaje ubwo bari bamaze guhabwa amahugurwa n’umushinga witwa Indego Africa
Uwimanimpaye Sylvie, umwe mu banyamuryango yabwiye IGIHE ko ubu bitakiba ngombwa ko asaba ababyeyi buri kimwe
Ibikoresho bikorwa na Koperative Urungano, bifite isoko cyane muri Leta Zunze Ubumwe za Amerika no mu Buyapani
Niyoyita Francine ngo mbere atarahura na bagenzi be ngo bihangire umurimo, yabonaga amafaranga agombye kuyahingira
Ibirere byifashishwa na Koperative Urungano mu gukora ibikoresho bitandukanye

Tanga igitekerezo


BIGEJEJEYO