Agaciro k’Ubunyarwanda kibanzweho muri Rwanda Day za 2013

Yanditswe na

Fiacre Igihozo

Kuya 16 Ukuboza 2013 saa 06:16
Yasuwe :
0 0

Umwaka wa 2013, waranzwe n’ibikorwa bitari bimwe mu kongera guhuza Abanyarwanda no kubumvisha neza no kubibutswa agaciro k’ubunyarwanda bwabo, aho habaye ibikorwa bibiri bya Rwanda Day; i London mu Bwongereza mu kwezi kwa Gicurasi, ndetse n’i Toronto muri Canada mu kwezi kwa Nzeri.

LONDON 18 Gicurasi 2013

Rwanda Day London 2013, Kagame aha impanuro Abanyarwanda bahaba

Muri Rwanda Day ya London 2013, umunsi nyirizina wabaye tariki 18 Nzeri, aho Perezida w’u Rwanda, Paul Kagame, yabonye umwanya wo guhura n’Abanyarwanda barenga ibihumbi 3000, barimo ababa mu Bwongereza barenga 1600, abaturutse mu Rwanda barenga 200, ndetse n’abaturutse mu bindi bihugu by’Uburayi hamwe n’abanyamahanga benshi b’inshuti z’u Rwanda, bose bahurira i London muri Troxy House, baganira ku iterambere rirambye ry’igihugu cyabo.

Icyo gihe Perezida Kagame, yabwiye abitabiriye Rwanda Day y’i London ko mu mwaka wa 2012 u Rwanda rwikorejwe ibibazo rutari rufitemo uruhare [Kugira uruhare mu ntambara yo muri Repubulika Iharanira Demukarasi ya Congo na M23, yabagaho kugeza mu kwezi k’Ugushyingo 2013], kandi ngo ibi byari biremereye u Rwanda, binaremereye abakwiye kuba babicyemura aribo ba nyirabyo, cyangwa se abakwiye kubafasha mu kubikemura.

Ibi kandi byaje mu gihe u Rwanda narwo rwari rufite ibibazo bigomba gushakirwa ibisubizo. Kuri Perezida Kagame yavuze ko yasangaga u Rwanda rudakwiye kwikorezwa ibibazo by’abandi. Kuko ngo buri gihugu na buri bantu bagira ubuzima bwabo baba bagomba kubaho.

Perezida Kagame muri Rwanda Day London 2013 yagize ati: “Ubuzima bwacu nitwe tugomba kububaho, ubuzima bwacu ni ubwacu.” Icyo gihe yashimangiraga ko buri wese aho ava akagera, aba afite ubuzima bwe kandi ko umuntu atabaho ubuzima bwe ngo abeho n’ubw’undi.

Ati: “Ntabwo wabaho uko ubayeho ngo nurangiza uze untegeke uko ngomba kubaho. Icyo ntabwo ari ikibazo cy’u Rwanda gusa, ni ikibazo dusangiye n’abandi Banyafurika.”

Perezida Kagame yavugaga ko kubera amateka y’Abanyarwanda, ngo basigaranye isomo rivuga ko buri wese akwiye kubaho ubuzima bwe, kuko buri wese aba akwiye kwigira kandi akigenera, kandi ibyo ngo ntabwo biba bigomba kuba ikibazo ku Banyafurika, ahubwo byakagomye kuba igisubizo.

Kuri Perezida Kagame, nkuko yabibwiye abari i Londre ndetse n’abari bakurirkiraniye Rwanda Day kure no mu mahanga yandi, ngo asanga Isi yose yari yarateraniye ku Rwanda mu mwaka wa 2012, aho abatandukanye bari bagambanye bakavuga ko bashaka guhagurukira u Rwanda.

Muri icyo gihe kandi ngo nibwo Perezida Kagame yamenye ko u Rwanda atari rutoya nk’uko bivugwa, kuko ngo abantu bose bahagurutse bagashaka kurushakaho umugabane. Ati: “Impamvu atari ruto si ikindi, ni abantu, ni mwebwe Abanyarwanda.”

Nubwo byagenze gutya ariko, Perezida Kagame yavuze ko ibibazo Abanyarwanda bagize, baramutse babigize ibyabo ngo n’ibisubizo byava muri bo kandi byose bigashingira ku kwiha agaciro. Ati: “Iyo wiyubashye ukubaha n’abandi, n’abandi barakubaha, iyo wiyandaritse uba wiyimye agaciro nta wundi ukaguha.”

Bimwe mu bidasanzwe byabaye muri Rwanda Day London 2013

Mu bitangaje byaranze iki gikorwa cy’i London, ni uko habayeho Abanyarwanda bagera kuri 700 bahagurutse i Buruseli mu Bubiligi, bakerekeza i London mu Bwongereza kwitabira Rwanda Day mu rugendo rw’amasaha atanu bakoresheje bus zigera kuri 12, bakagenda baririmba indirimbo nyarwanda zitandukanye, uretse abari mu mabisi kandi hakaba harimo n’abifitiye imodoka zabo bwite.

Muri iyi Rwanda Day London 2013 kandi hanitabiriye abahanzi nyarwanda bagiye gususurutsa abari i London, ahanagaragayemo kujyana bamwe mu bahanzi nyarwanda ba vuba aha nka; King James na Knowless, bajyanye kandi n’abahanzi babimazemo igihe kinini nka; Massamba Intore na Mihigo Francois Chouchou, aba bo banakunze kwitabira Rwanda Day nyinshi muri 5 zimaze kubaho.

Habayeho kandi abigaragambyaga batera amagi ku modoka zari zitwaye umukuru w’igihugu, ibintu Perezida Kagame yanenze, akanagaya cyane abantu bahitamo kwangiza ibiribwa byakabatunze, ahubwo bakajya kubitera perezida.

Perezida Kagame yanenze aba bantu bari baje mu myigaragambyo, yibaza impamvu bamuteraga amagi, kandi nabo bayakeneye bakaba bari bakwiye kuba bayarya, cyangwa bagatekereza na bene wabo basize muri Afurika bayakeneye.

Ikindi yavuze ngo ni uko bariya bari mu myigaragambyo ngo byabagora gusobanukirwa icyo bakora ndetse n’uburyo bageze mu Bwongereza. Yavuze ko ibibazo bya Congo byabazwaga Perezida Kagame nyamara batari bakwiye kubibariza mu Bwongereza, ahubwo bakaba babimubariza muri Congo, cyane ko ngo aribo baba bakwiye gukemura ibibazo byabo mbere.

Icyo gihe asoza ijambo rye, Perezida Kagame, yavuze ko Abanyarwanda bazi ibibazo byabo kandi baba bagomba kubigira ibyabo, bakaba ari nabo bazakomeza gukora cyane kugira ngo ibibazo bibashe gukemuka. Ati: “Akimuhana kaza imvura ihise.”

London kandi hanagaragaye umusaza w’umuhinde witwa Yunusu wa Malidad, uba mu Bwongereza ariko yaravukiye mu Rwanda, ubwo yasabaga ijambo abantu bose bari biteze kumwumva avuga mu rundi rurimi nk’Icyongereza, kuko bakekaga ko ataba azi Ikinyarwanda, ariko yatunguye baenshi avuga Ikinyarwanda kiza cyane gitomoye, ndetse ashimira Perezida Kagame ku ntambwe amaze kugezaho u Rwanda kuva FPR ifashe ubutegetsi kuko uwo musaza ngo arusi kuva ku bwa Musinga ari umwana none ngo iyo arurebye uko ruri ubu asanga rugeze aho kwishimirwa cyane.

TORONTO 28 Nzeri 2013

Muri Rwanda Day ya Toronto Kagame yagiranye ibiganiro n'Abanyarwanda bahaba n'inshuti z'u Rwanda

I Toronto kuwa 28 Nzeri 2013, niho hari hatahiwe nyuma y’igihe kinini abaho babisaba ko nabo bazahabwa amahirwe bakabonana n’umukuru w’igihugu, maze nabo kuri uwo munsi birashyira bishyirwa mu ngiro, Toronto ihinduka umujyi w’Abanyarwanda, kuko yari ikoraniwemo n’abasaga 3000, bitabiriye Rwanda Day Toronto 2013.

Icyo gihe hari higanjemo abaturutse imihanda yose, muri Canada nyirizina, Amerika ya Ruguru (USA), Uburayi, n’u Rwanda.

Toronto Abanyarwanda basabwe guhaha ubumenyi ariko bakirinda imico mibi y'aho baba mu mahanga

Muri iyi Rwanda Day Toronto 2013, Perezida Kagame yasabye Abanyarwanda guhaha ubumenyi iyo baba mu mahanga ariko bakirinda ingeso mbi. Yasabye abayitabiriye kutararuza imico mibi y’amahanga baba batuyemo, ahubwo bakibanda ku guhaha ibyiza n’ubumenyi byabagirira akamaro, ndetse bikanakagirira igihugu cyabo gakondo cy’u Rwanda, abibutsa ko ujya guhaha wese atajya ahaha ngo ahahemo n’ibibi abibona.

Icyo gihe yagize ati: “Imico mibi ntawayigendera ibirometero igihumbi, kuko n’aho muba mwavuye imibi irahari…Njye nagenze nkamwe, ntabwo nagenda ibirometero igihumbi njyanywe no kwiga imico mibi.”

Icyo gihe kandi Perezida Kagame, yongeye kuvuga ko u Rwanda rwapfuye inshuro imwe, ariko rutazongera gupfa indi ya kabiri.

Yagize ati : “Twebwe nk’abanyarwanda rero ntabwo twapfa kabiri, twapfuye rimwe, ibyo birahagije. Byaba ari ishyano gupfa bwa kabiri, ntidushobora kubyemera.”

Icyo gihe yanavuze ko nk’umukuru w’igihugu, atifuza ko abanyarwanda baba abantu bahera ku bintu bimwe badatera imbere mu nzego zose.

Ati: “Ntabwo dushaka abanyarwanda bafite umutekano, ariko badafite ibyo kubatunga, bacyicwa n’indwara zitica abandi, …..Nta munyarwanda ndumva avuga ko yifuza kwirirwa ubusa akarara ubusa.”

Perezida Kagame yasobanuriye abari muri Rwanda Day Toronto icyo “Agaciro” k’Abanyarwanda ari cyo, ndetse n’uburyo bagomba kumenya abo bari bo ntibapfe kwiroha mu mico itari myiza y’aho baba bari.

Yagarutse ku kuba bamwe muri bo baba bafite ubwenegihugu bw’ahandi mu bihugu barimo, ariko bakaba bakwiye kutareka Ubunyarwanda bwabo, kandi ko icyo baba barabaye cyose, n’icyo bifuza kuba cyo ntacyo bitwaye, gusa ngo baba bakwiye kwibuka u Rwanda kandi bakagerageza kugira icyo barukorera, bakarufasha mu gutera imbere.

Iki gikorwa cya Rwanda Day, kimaze kumenyerwa nk’ikibaho byibuze kabiri mu mwaka, kuva muri 2011, i Torornto niho cyagaragarijwe kwishimirwa no gushimwa bidasubirwaho n’abanyamahanga, ku buryo umwe mu Barundi utuye muri Canada yatangaje ko aterwa ishema no kubona ibyo u Rwanda rukora byo guhuriza hamwe abenegihugu barwo kandi bakaganira ku buzima bw’igihugu bwose.

Reba hano ijambo Perezida Kagame yavugiye muri Rwanda Day London 2013

Reba hano ijambo rya Perezida Kagame muri Rwanda Day Toronto 2013


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .