00:00:00 IGIHE NETWORK KN KINYARWANDA EN ENGLISH FR FRANCAIS

U Bwongereza: Abanyarwanda n’inshuti bibutse Jenoside yakorewe Abatutsi

Yanditswe na Karirima A. Ngarambe, ⁠Ishimwe Hervine
Kuya 11 June 2024 saa 09:44
Yasuwe :

Abanyarwanda batuye mu Bwongereza n’inshuti zabo bahuriye mu gikorwa cyo kwibuka ku nshuro ya 30 Jenoside yakorewe Abatutsi cyabereye mu gace ka Bedfordshire ku wa 8 Kamena 2024.

Ni igikorwa cyasoje ibindi bikorwa byose byo kwibuka byari biteganyijwe kuba mu 2024 muri icyo gihugu.

Muri iki gikorwa cyo kwibuka kandi hazamuwe ibendera ry’u Rwandaku nyubako ya Bedford Old Town Hall, abitabiriye iki gikorwa baboneyeho gukurikira ubuhamya bwa Uwamahoro Marie Chantal warokotse Jenoside yakorewe Abatutsi.

Uhagarariye Ubwami mu gace ka Bedfordshire, Susan Lousada, yavuze ko kuzamura ibendera ry’u Rwanda ari uguha agaciro no kwibuka inzirakarengane za Jenoside yakorewe Abatutsi no gufata mu mugongo abayirokotse, baharanira ko bitazongera kubaho.

Ati “Kuzamura iri bendera ni uburyo bwo kwibuka inzirakarengane no gufata mu mugongo abarokotse Jenoside yakorewe Abatutsi mu 1994. Ni uguhagarara tukarwanya urwango tugaharanira amahoro n’ubumwe mu batuye Bedford."

Ambasaderi w’u Rwanda mu Bwami bw’u Bwongereza, Johnston Busingye, yashimiye inzego z’ibanze n’Abanyarwanda bahatuye uruhare rwabo binyuze muri gahunda yo kwibuka ku nshuro ya 30 Jenoside yakorewe Abatutsi, mu gusobanurira no kwigisha amateka ya Jenoside abatuye mu Bwongereza mu kubafasha kuyumva neza.

Ati “Ku nshuro ya mbere tugize igisekuruza cy’Abanyarwanda kimenya ko umwirondoro wabo ari uburenganzira bwabo bwo gukora, kuba, kugera ku kintu icyo ari cyo cyose cyangwa kugera ahantu aho ari ho hose. Imyaka 30 ishize ishushanya kwiyubaka, imbaraga z’icyizere n’ubwitange.”

Ambasaderi Busingye kandi yavuze ko hamwe n’ubufatanye na guverinoma y’u Bwongereza, abakoze Jenoside yakorewe Abatutsi bahungiye muri kino gihugu barimo gushakishwa ngo bashyikirizwe inzego z’ubutabera bw’u Rwanda kugira ngo bahabwe ibihano, muri abo harimo Celestin Mutabaruka, Vincent Brown (uzwi nka Vincent Bajinya), Celestin Ugirashebuja, Charles Munyaneza, na Emmanuel Nteziryayo.

Mu Bwongereza hakozwe ibikorwa bitandukanye bijyanye na gahunda yo Kwibuka ku nshuro ya 30 Jenoside yakorewe Abatutsi, mu mijyi irimo Liverpool, Nottingham, Manchester, Plymouth, Newcastle, Bedford, muri Scotland, Jersey na Ireland.

Uyu mwaka kandi amateka ya Jenoside yakorewe Abatutsi mu Rwanda mu 1994 azashyirwa ku rutonde rw’amateka yigwa mu Bwongereza.

Abanyarwanda baba mu Bwongereza bibutse Jenoside yakorewe Abatutsi
Habaye urugendo rwo Kwibuka
Ambasaderi Busingye Johnson ashyira indabo ku kimenyetso cy'Urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .