U Bushinwa: Abanyarwanda baba mu Ntara ya Xinjiang bahuriye mu bikorwa byo Kwibuka

Yanditswe na Twarabanye Venuste
Kuya 13 Mata 2020 saa 02:55
Yasuwe :
0 0

Abanyarwanda baba mu Ntara ya Xinjiang yo mu mujyi wa Urumqi mu Bushinwa, bahuriye mu bikorwa byo Kwibuka ku nshuro ya 26 Jenoside yakorewe Abatutsi.

Kuwa Kabiri tariki 7 Mata 2020, nibwo Abanyarwanda basaga 550 baba mu Bushinwa bifatanyije n’u Rwanda gutangiza iminsi 100 yo Kwibuka ku nshuro ya 26 Jenoside yakorewe Abatutsi ibaye. Hakoreshejwe ikoranabuhanga mu rwego rwo kwirinda icyorezo cya Coronavirus.

Mu busanzwe, nyuma yo Kwibuka ku rwego rwa Ambasade, ibikorwa byo Kwibuka bikomereza hirya no hino mu Ntara zo muri icyo gihugu, hagendewe kuri gahunda zo Kwibuka ziba ziri gukurikizwa mu Rwanda, ariko ubu siko byagenze kubera Covid-19.

Abanyarwanda baba mu Ntara ya Xinjiang mu mugi wa Urumqi bo babwiye IGIHE ko babashije guhura kubera ko icyorezo cya Covid 19 gisa nk’aho cyaharangiye.

Umuhango wo Kwibuka watangijwe n’umunota wo kwibuka ndetse hacanwa urumuri rw’Icyizere bikurikirwa n’ibiganiro bitandukanye.

Mu biganiro byatanzwe harimo icyagarutse ku ruhare rw’ ubutabera mu kubaka umuryango nyarwanda nyuma ya Jenoside yakorewe Abatutsi, n’ikigaruka ku mateka y’itegurwa n’ishyirwa mu bikorwa rya Jenoside yakorewe Abatutsi.

Umuyobozi w’Abanyarwanda baba mu Ntara ya Xinjiang, Gasirabo Aboubakar yasobanuye Jenoside icyo aricyo, gupfobya n’ingaruka mbi zabyo.

Gasirabo yasabye Abanyarwanda guhangana n’abapfobya Jenoside yakorewe Abatutsi bakoresheje imbuga nkoranyambaga, bakagaragaza amakuru y’ukuri.

Ati “Dukwiye kurushaho gukoresha ikoranabuhanga hamwe n’imbuga nkoranyambaga mu rwego rwo guhangana n’ipfobya rikorerwa ku mbunga nkoranyambaga hagatangazwa amakuru ya nyayo.”

Mu gutangiza ibikorwa byo kwibuka ku nshuro ya 26, Ambasaderi w’u Rwanda mu Bushinwa, James Kimonyo, yasabye abanyarwanda baba mu Bushinwa kurangwa n’indangagaciro z’ubwitange zaranze ingabo za RPA, ubwo zahagarikaga Jenoside ziyobowe na Perezida Paul Kagame.

Abatanze ibiganiro barimo Eng Vincent Nzabarinda, Albert Poponi na Gasirabo Aboubakar
Mu bihe bisanzwe abatuye mu Ntara runaka bahurira mu bikorwa byo Kwibuka ariko ubu ntibyakunze hose kubera Covid 19
Nyuma yo gucana urumuri rw'icyizere bakurikiye ibiganiro
Hafashwe umwanya wo gucana urumuri rw'icyizere n'umunota wo Kwibuka
Abanyarwanda baba mu Ntara ya Xinjiang mu mujyi wa Urumqi bitabiriye ibiganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .