#Kwibuka26: Abanyarwanda n’inshuti z’u Rwanda muri Turikiya bibutse Jenoside yakorewe Abatutsi

Yanditswe na Twarabanye Venuste
Kuya 10 Mata 2020 saa 01:48
Yasuwe :
0 0

Abanyarwanda n’inshuti z’u Rwanda baba muri Turikiya, bakomeje ibikorwa byo kwibuka ku nshuro ya 26 Jenoside yakorewe Abatutsi mu 1994 batangiye ku wa 7 Mata 2020, kimwe n’ahandi hatandukanye ku Isi.

Umuhango wo gutangiza Kwibuka ku nshuro ya 26 Jenoside yakorewe Abatutsi wayobowe na Ambasaderi w’u Rwanda muri Turikiya, Williams Nkurunziza witabirwa n’Abagize Umuryango w’Abanyarwanda baba muri icyo gihugu, Abakozi ba Ambasade, inshuti z’u Rwanda n’abandi banyacyubahiro batandukanye.

Umuhango watangiranye no gukurikirana ibikorwa byo gutangiza iminsi 100 yo kwibuka ku nshuro ya 26 Jenoside yakorewe Abatutsi, byaberaga ku rwibutso rwa Kigali ku Gisozi no kumva ijambo ry’umukuru w’igihugu.

Aho muri Turikiya, umuhango waranzwe no kwenyegeza urumuri rw’icyizere hafatwa n’umunota wo kwibuka. Mu butumwa yatanze, Ambasaderi Williams Nkurunziza yavuze ko ibihe by’umwijima ku banyarwanda byarangiye, imyaka 26 ikaba ishize rugendera mu rumuri ry’imiyoborere myiza.

Yavuze ko kwibuka muri ibi bihe bya Covid-19 bitoroshye ariko ko ari inshingano kandi ko ari uburyo bwo gutanga isomo ku buryo ayo mateka atasubira mu Rwanda n’ahandi ku Isi.

Ati “Buri mwaka Abanyarwanda n’inshuti z’u Rwanda bafata umwanya wo kwifatanya mu kwibuka no kwiyubaka, nta kwibagirwa ibyabaye kuko byatuma amateka yisubiramo”.

Yashimiye Inshuti z’u Rwanda zifatanyije muri uwo muhango wo kwibuka amateka akomeye y’u Rwanda, yihanganisha abarokotse Jenoside Yakorewe Abatutsi aho bari hose.

Inshuti z’u Rwanda zifatanyije n’Abanyarwanda zatanze ubutumwa bwo kubihanganisha muri ibi bihe bitoroshye. Prof. Dr. Sedat Aybar, wigisha muri kaminuza ya Istanbul Aydin, yashimye ubutwari abanyarwanda bagize bwo kuva mu mateka ashaririye bakubaka igihugu gifite amahoro n’uburumbuke.

Yavuze ko imyaka 26 ishize irimo isomo rikomeye ku kiremwamuntu kandi yifatanyije n’u Rwanda mu guha icyubahiro abazize Jenoside. Kuri we kandi ngo kwibuka ni ubutumwa bwo kwamagana ibivugwa n’abahakana Jenoside yakorewe Abatutsi.

Amb. Abdurrazaq M. Abdulqader, wahoze ari Ambasaderi wa Libye muri Turikiya, yavuze ko yunamiye abazize Jenoside kandi abahaye icyubahiro.

Ibikorwa biri gukomeza mu buryo budasanzwe kubera icyorezo cya Covid-19. Inama hagati y’Abayobozi muri Ambasade na bamwe mu bagize umuryango w’abanyarwanda baba muri Turikiya n’inshuti z’u Rwanda zikorwa hifashishijwe ikoranabuhanga rya Skype.

Abanyarwanda basangizwa raporo, ibiganiro n’ibyatangajwe na Komisiyo y’Igihugu yo kurwanya Jenoside (CNLG) buri munsi.

Abagize Umuryango w'Abanyarwanda baba muri Turikiya
Abakozi muri Ambasade bitabiriye gutangiza icyumweru n'iminsi 100 yo kwibuka ku nshuro ya 26 Jenoside yakorewe Abatutsi
Abayobozi muri Ambasade y'u Rwanda muri Turikiya bafashe umunota wo Kwibuka
Amb.Nur Sagman na Fatih Ak bitabiriye kwibuka ku nshuro ya 26 Jenoside yakorewe Abatutsi
Amb Williams Nkurunziza yenyegeza urumuri rw'icyizere
Bamwe mu bagize umuryango w'abanyarwanda baba muri Turikiya
Heval Savas Kaya n'umuryango we bifatanyije n'abanyarwanda mu muhango wo kwibuka Jenoside yakorewe Abatutsi
Inshuti z'u Rwanda Bora Kandemir Melahat zdemir na Serkan Asiklar
Prof Sedat Aybar
Umudipolomate wa Turikiya, Amb. Hulusi Kili yifatanyije n'abanyarwanda
Umugore wa Amb.Williams Nkurunziza yunamira abazize jenoside yakorewe Abatutsi
Umuhuzabikorwa w'Umuryango w'Abanyarwanda baba i Ankara muri Turikiya, Audrey Igitego
Umujyanama wa Kabiri
Umunyamabanga wa mbere Joel Uwizeye n'umuryango we
Umuyobozi wa Mor Group Song l Bayram
Umuyobozi wa sosiyete y'ubwubatsi ya Summa, Selim Bora
Abakiri bato nabo bitabiriye ibikorwa byo kwibuka ku nshuro ya 26 Jenoside yakorewe abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .