Hillz ukomoka mu Rwanda, yaciye agahigo ko gushushanya George Floyd mu minota itatu mu kiriyo

Yanditswe na IGIHE
Kuya 12 Kamena 2020 saa 04:09
Yasuwe :
0 0

Umunyabugeni w’Umunyarwanda uba muri Leta Zunze Ubumwe, Ange Hillz yakoze amateka mu kiriyo cyo gusezera ku munyamerika George Floyd ubwo yamushushanyaga mu gihe cy’iminota itatu gusa.

Floyd wari ufite imyaka 46 yishwe tariki 25 Gicurasi mu Mujyi wa Minneapolis, nyuma yo gufatwa n’umupolisi akamutsikamiza ivi kugeza ananiwe guhumeka.

Ni urupfu rwateje imyigaragambyo hirya no hino ku Isi, benshi bamagana uburyo Polisi ya Amerika ifata Abirabura batuye muri icyo gihugu nk’aho atari abantu.

Umuhango wo gusezera kuri Floyd wabaye kuwa Kabiri tariki 9 Kamena, witabiriwe n’abantu benshi.

Ubwo umuhanzi w’indirimbo zaririmbiwe Imana, Dray Tate, yasubiragamo indirimbo "A Change is Gonna Come" ya Sam Cook mu muhango wo gusabira Floyd wabereye rusengero Fountain of Praise, Ange Hillz we yari inyuma ari gushushanya ishusho ya George Floyd.

Tate yagiye kurangiza indirimbo, Hillz yamaze gushushanya ishusho ya Floyd mu mabara y’umukara n’umweru.

Uyu munyabugeni wavukiye mu Rwanda, amaze kumenyekana mu gushushanya ibihangano bikomeye mu gihe gito.

Yavuze ko amaze imyaka icumi akora akazi ko gushushanya ndetse kuri ubu yashyize hanze ibishushanyo bye yise Life in Colors.

Ubwo yashushanyaga Floyd mu minota itatu, Hillz yavuze ko yumvaga afite ishyaka n’amarangamutima.

Ati “Numvaga meze nk’aho ari njye uri muri iriya sanduku, yashoboraga no kuba undi muntu nzi. Byari biteye amarangamutima gukora kiriya gishushanyo.”

“Kiriya gishushanyo ni kimwe mu bikomeye nakoze. Urebye ibiri kuba hirya no hino ku Isi, by’umwihariko ibyari biri kuba uriya munsi, ni amateka. Numvaga ndi umwe mu bari gukora ayo mateka.”

Hillz yavuze ko kugira ngo yitabire uriya muhango, umuryango wa Floyd wamwegereye ku munota wa nyuma, ukamusaba kubafasha guha icyubahiro Floyd binyuze mu bugeni.

Yavuze ko ajya gushushanya icyo gishushanyo, atari yigeze abyitoza ahubwo biri mu maraso ye.

Ati “Ubusanzwe inganzo yanjye iva mu bintu biri kuba ako kanya. Maze imyaka icumi nkora ibi , niko kazi kanjye nitoje gushushanya nihuta. Ngeze ku rwego rw’aho umpa ifoto nkayifata mu mutwe nkayihanga nyisushanya.”

Uyu munyabugeni ufite inkomoko mu Rwanda, yavuze ko igishushanyo cya Floyd yagishyikirije umuryango wa nyakwigendera.

Hillz yakoze ibindi bishushanyo by’ibyamamare byo mu Mujyi wa Houston nka J.J. Watt, James Harden, Houston Astros, Meya Sylvester Turner ndetse na George W. Bush wahoze ari Perezida wa Amerika.

Uretse abantu, Hillz anashushanya inyamaswa, imiterere y’ahantu ndetse afite n’inzozi zo gutangira gukora ibintu bitaboneshwa amaso, biturutse mu bitekerezo.

Uyu musore yakuriye mu Rwanda. Gushushanya yabyize akiri muto abyigiye kuri mukuru we. Yaje kwimukira muri Leta Zunze Ubumwe za Amerika ari naho impano ye yo gushushanya yakuriye bigaragara.

Kanda hano ubone bimwe mu bishushanyo byakozwe na Ange Hillz

Ibinyamakuru bitandukanye muri Amerika byatangariye uburyo Hillz yabashije gushushanya ifoto ya Floyd mu minota itatu
Ange Hillz yabashije gushushanya ifoto ya Floyd mu minota itatu
Hillz yavuze ko yashushanyije Floyd bitewe n'ibyo yabonaga ako kanya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .