00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda bo muri Midwest batumiye Massamba mu gitaramo

Yanditswe na Mahoro Vainqueur
Kuya 4 Ukuboza 2022 saa 09:58
Yasuwe :

Umuhanzi Massamba Intore agiye gutaramira Abanyarwanda baba muri Leta Zunze Ubumwe za Amerika mu gitaramo kimurika gahunda yiswe ‘U Rwanda igihugu cyanjye’ igamije gufasha Abanyarwanda baba mu mahanga kumenya ururimi n’umuco by’igihugu cyabo.

Intore Massamba washimye iyi gahunda avuga ko kera kuvuga u Rwanda bitashobokaga kuri bamwe aho benshi bagiraga ipfunwe bagahitamo kwiyitirira ibindi bihugu babeshya ko ari byo bakomokamo.

Yagize ati “Kera twagiraga ubwoba ukihisha ukavuga ko utari Umunyarwanda, kubera ko kuvuga u Rwanda bitashobokeraga bamwe. Noneho ubu u Rwanda ni igihugu cyubashywe, Abanyarwanda ni bo bayoboye imiryango ikomeye ku Isi irimo Francophonie, Commonwealth n’iyindi. Buri wese atewe ishema no kwitwa Umunyarwanda aho yajya hose”

Uyu muhanzi avuga ko bimwe mu byo ahishiye abazitabira iki gitaramo ari zimwe mu ndirimbo zibakumbuza igihugu cyabo ndetse n’intashyo ziva ku bo basize mu gihugu.

Yagize ati “Abanyarwanda baba mu mahanga icyo nababwira ni uko mbazaniye intashyo z’ababo bari mu Rwanda, babifuriza Noheli Nziza n’Umwaka Mushya Muhire.”

“Nzabakumbuza u Rwanda mbabwira uko rumeze, uko ruteye n’ibyo rumaze kugeraho. Nzongeraho indirimbo zijyanye n’imihigo n’urukundo.’’

Yongeyeho ko adashobora kugenda ataririmbye zimwe mu ndirimbo zivuga uko igihugu cyabohowe hagamijwe kubasaba “kugira uruhare mu gushyigikira ibyo cyagezeho.”

Iki gitaramo kizaba ku wa 17 Ukuboza 2022 cyateguwe mu rwego rwo kwishimira iterambere u Rwanda rwagezeho no gusigasira ibyagezweho. Kinagamije kwibutsa buri Munyarwanda uba mu mahanga umusanzu we mu gukomeza guhesha ishema igihugu cye.

Muri iki gitaramo hazamurikwa ku mugaragaro gahunda ya ‘Rwanda Igihugu Cyanjye’ muri Leta Zunze Ubumwe za Amerika.

Iri huriro rizajya ryakira Abanyarwanda bose bashaka kuryinjiramo baba abari mu gihugu cyangwa hanze yacyo, ryitezweho kuzagira uruhare mu kumenyekanisha amakuru nyayo ku Rwanda ku batayazi, kumenya ururimi n’umuco byarwo.

Ku wa 12 Kanama 2022 ni bwo abanyarwanda baba hanze y’igihugu batangije ’U Rwanda igihugu cyanjye’, gahunda ifite intego yo guhuza imbaraga zo kuvuga ukuri ku Rwanda no gusigasira ibimaze kugerwaho.

Iki ni igitekerezo cyavukiye muri Amerika kivuye ku Banyarwanda bahatuye, aho bifuzaga kugira uruhare mu kurinda ibimaze kugerwaho nyuma y’imyaka 28 u Rwanda rwibohoye no kugira uruhare mu kunganira ibyo igihugu gikora.

Massamba Intore agiye gutaramira aAbanyarwanda baba muri Amerika mu gitaramo kizabakumbuza u Rwanda n’umuco warwo
Muri iki gitaramo hazamurikwa ku mugaragaro Gahunda ya ‘Rwanda Igihugu Cyanjye’ muri Leta Zunze Ubumwe za Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .