Abanyarwanda baba muri Diaspora bafunguriwe konti yo gufasha Mutuelle de santé

Yanditswe na Nkurunziza Ferdinand
Kuya 6 Gashyantare 2020 saa 12:41
Yasuwe :
0 0

Minisiteri y’Ububanyi n’Amahanga n’Ubutwererane Mpuzamahanga y’u Rwanda yatangaje ko hashyizweho uburyo bwo korohereza abanyarwanda baba mu mahanga gutanga umusanzu wabo mu gufasha gahunda y’ubwisungane mu kwivuza (Mutuelle de santé), mu rwego rwo gushyira mu bikorwa umwanzuro w’Inama y’Igihugu y’Umushyikirano ya 17.

Mu ibaruwa yandikiwe abahagarariye u Rwanda mu mahanga bose, Minisiteri y’Ububanyi n’Amahanga n’Ubutwererane Mpuzamahanga yabasabye kumenyesha abanyarwanda bose ko inkunga yose iturutse muri Diaspora igamiie ishyirwa mu bikorwa rya gahunda y’Ubwisungane mu kwivuza izajya ishyirwa kuri konti ya RSSB nomero 440207884 yitwa RSSB-CBHI iherereye muri KCB Bank.

Mu myanzuro 12 yafatiwe mu nama y’lgihugu y’Umushyikirano ya 17 yateraniye i Kigali kuwa 19 kugeza ku ya 20 Ukuboza 2019, umwanzuro wa 8 wasabaga ko hashyirwaho uburyo bwo gufasha abanyarwanda baba mu mahanga kunganira ishyirwa mu bikorwa rya gahunda za leta zinyuranye harimo Ubwisungane mu Kwivuza (Mutuelle de Sante) no gukoresha ubumenyi bafite mu ngeri zitandukanye iyo baje mu kiruhuko mu Rwanda.

Ibikorwa bishyigikira iterambere ry’u Rwanda biturutse mu banyarwanda baba mu mahanga byiyongera umunsi ku wundi. Muri byo harimo gushora imari mu bikorwa bitandukanye by’ubucuruzi mu Rwanda, gushyigikira gahunda za Leta zitandukanye zigamije iterambere rusange n’ibindi.

Mu mpera z’umwaka ushize Banki Nkuru y’u Rwanda, BNR, yavuze ko kuva mu 2010 kugera 2019, amafaranga Abanyarwanda baba mu mahanga bohereza imbere mu gihugu yiyongereye ku gipimo cya 158%.

Kimwe mu bikorwa byagize uruhare rukomeye mu gufasha abanyarwanda baba mu mahanga kongera uruhare rwabo mu iterambere ry’igihugu ni ‘Rwanda Day’, aho kuva yatangira mu 2010, yasize amateka akomeye mu mpande zose z’Isi, ariko inaba ikivumbikisho cyatumye uruhare rwa diaspora nyarwanda mu iterambere ry’ubukungu bw’igihugu rwiyongera mu buryo budasanzwe.

Imibare ya Banki Nkuru y’igihugu, BNR, igaragaza ko mbere y’uko Rwanda Day itangira, nko hagati y’umwaka wa 2000 na 2005, amafaranga abanyarwanda baba mu mahanga boherezaga mu gihugu buri mwaka yari hagati ya miliyoni 3.6 na miliyoni 8.6 z’amadorali, mu gihe hagati ya 2006 na 2010 yavuye kuri miliyoni 25 agera kuri miliyoni 98.2 z’amadorali.

Impinduka zikomeye zagaragaye kuva gahunda ya Rwanda Day yatangira, amafaranga abanyarwanda baba mu mahanga bohereza imbere mu gihugu yariyongereye ava kuri miliyoni 98,2 muri 2010 agera kuri miliyoni 253 z’amadorali mu 2018, ni ukuvuga asaga miliyari 250 z’amanyarwanda.

Mu bihe bitandukanye kandi hagiye hagaragara ibikorwa byo kwishyurira ubwisungane mu kwivuza abaturage batishoboye bo mu turere dutandukanye bikozwe n’abanyarwanda baba mu mahanga bahurizaga ubushobozi mu bihugu batuyemo.

Zimwe mu mbogamizi bagaragazaga harimo kuba uburyo bwo gukusanya iyo nkunga bwaratwaraga igihe n’ikiguzi kitari gito mu kohererezanya amafaranga ndetse hakiyongeraho n’itike y’ababaga bazanye ayo mafaranga, nyamara iyo haza kuba uburyo buhuriweho na bose bw’ikoranabuhanga, byari kurushaho koroha no gukuraho izindi nzitizi.

Guhera muri uyu mwaka w’ingengo y’imari Guverinoma yongereye amafaranga ishyira mu bwisungane mu kwivuza ‘Mutuelle de santé’.

Ikigo cy’Ubwiteganyirize mu Rwanda (Rwanda Social Security Board-RSSB) kivuga ko iyi nyongera ingana na miliyari 10 z’amafaranga y’u Rwanda, izafasha muri gahunda yo kugeza ubuvuzi kuri bose.

Imibare ya RSSB igaragaza ko ingano y’imisanzu y’abanyamuryango ba mutuelle de santé harimo nayo leta yabageneraga ari miliyari 32,8 ; mu gihe ayo bakoresha angana na miliyari 47,4 ibintu byatumaga bagira igihombo cya miliyari 14,6 buri mwaka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza