Iki gikorwa cyo kwibuka abishwe muri Jenoside yakorewe Abatutsi mu Rwanda, muri Jutland na Fyn cyateguwe ku bufanye bwa Ibuka-Denmark na Ambesade y’u Rwanda muri Suède no mu bindi bihugu by’u Burayi bw’Amajyaruguru.

Cyitabiriwe na Geraldine Umutesi, umujyanama wa mbere muri Ambasade y’u Rwanda ifite icyicaro muri Suède wari uhagarariye Ambasaderi Diane Gashumba uhagarariye u Rwanda mu bihugu by’u Burayi bw’Amajyaruguru.

Ni igikorwa cyaranzwe n’ubuhamya bw’abarokotse Jenoside yakorewe Abatutsi bw’uko bayirokotse, indirimbo z’urubyiruko zigaruka ku guhoza abarokotse, ibiganiro ku mateka yagejeje u Rwanda kuri Jenoside yakorewe Abatutsi mu 1994 n’ibindi.

Iki gikorwa cyatangijwe n’urugendo rwo kwibuka, rutangizwa n’ijambo rya Paul Nkubana uyobora umuryango w’Abanyarwanda baba muri Danemark.

Ati “Iki gikorwa ni ngarukamwaka hano mu karere dutuyemo, mwakoze kuza kwifatanya n’Abanyarwanda bahatuye n’inshuti zabo, kuko kwibuka biratureba twese.”

Egide Semukanya, uhagarariye IBUKA muri Danemark, mu kiganiro yatanze yagarutse cyane ku mateka yagejeje u Rwanda muri Jenoside yakorewe Abatutsi, anashimira cyane Inkotanyi zitanze, benshi bakahasiga ubuzima kugira ngo hagire byibura urokoka.

Semukanya yerekana uko ubu u Rwanda ruyobowe neza kandi rushyize imbere ubumwe buzira amoko, abaturage bagafatanyiriza hamwe guteza imbere igihugu buri wese abigizemo uruhare.

Muri iki gikorwa Jackline Hansen yayoboye ikiganiro kigaruka kuri kuri Jenoside yakorewe Abatutsi, aho abatumirwa batanze ikiganiro barimo Dr. Ngoga Innocent, Egide Semukanya, Jean Claude Gakimbiri nk’urubyiruko na Geraldine Umutesi.

Umutesi yagaragaje ko u Rwanda rw’uyu munsi ruyobowe na Perezida Kagame rwimakaje gahunda ya “Ndi Umunyarwanda” arakomeza ati “Mwirinde amacakubiri kuko ni yo atumye turi hano twibuka abishwe muri Jenoside yakorewe Abatutsi.”

Yasabye abitabiriye kurwanya abapfobya Jenoside yakorewe Abatutsi bagamije inyungu zabo, abasaba kubaha ukuri gufatika kw’amateka.

Ati “Ukuri kurahari kugaragarira buri wese, uretse abo babifitemo inyungu zo guhishira ibyo basize bakoze cyangwa ababyeyi babo basize bakoze.”

Yibukije ko u Rwanda rwibagiranye igihe hakorwaga Jenoside yakorerwaga Abatutsi, bigakorwa amahanga yose arebera, ibisa n’amateka ari kwisubiramo uyu munsi ushingiye ku biri kubera muri Repubulika Iharanira Demokarasi ya Congo.

Ati “Abasize bahekuye u Rwanda baba bashyize hamwe n’ubuyobozi bwa RDC uyu munsi mu bugizi bwa nabi no kwica abavuga Ikinyarwanda by’umwihariko abo mu bwoko bw’Abatutsi. Bikorwa amahanga arebera. Birababaje ko amateka u Rwanda rwaciyemo atabahaye amasomo.”

Umutesi yashimiye cyane ubuyobozi bw’Abanyarwanda by’umwihariko abatuye Jylland na Fyn, bateguye iki gikorwa cyo kwibuka, ndetse ashimira n’abacyitabiriye abizeza ubufasha bwa ambasade buhoraho.

Egide Victor Semukanya uyobora IBUKA-Danemark yagaragaje ko kwibuka bireba abantu bose

Dr. Ngoga Innocent , Egide Semukanya, uyobora IBUKA-Danemark, Jean Claude Gakimbiri na Geraldine Umutesi usnzwe ari Umujyanama wa mbere muri Ambasade y’u Rwanda mu bihugu by’u Burayi bw’Amajyaruguru, batanze ibiganiro

Jackline Hansen yayoboye ikiganiro cyahuriyemo, Dr. Ngoga Innocent , Egide Semukanya, uyobora IBUKA-Danemark, Jean Claude Gakimbiri na Geraldine Umutesi

Amafoto yaranze urugendo rwo kwibuka

Geraldine Umutesi (ubanza iburyo) wari ahagarariye Ambasaderi Diane Gashumba, avuga ijambo nyuma y’urugendo rwo kwibuka

Umujyanama wa mbere muri Ambasade y’u Rwanda, Geraldine Umutesi, yitabiriye iki gikorwa

[email protected]