Abanyarwanda baba mu Bufaransa bagiye kujyana Charles Onana mu butabera kubera gupfobya Jenoside

Yanditswe na Karirima A. Ngarambe, Twarabanye Venuste
Kuya 29 Ukwakira 2019 saa 09:01
Yasuwe :
0 0

Umuryango w’Abanyarwanda baba mu Bufaransa (Communauté Rwandaise de France:CRF) watangaje ko uri gutegura ikirego cyo kujyana umunya-Cameroun, Charles Onana mu bushinjacyaha nyuma y’ikiganiro yagiriye kuri televiziyo n’ibitabo bipfobya Jenoside yakorewe Abatutsi yandika.

Ku wa Gatandatu nibwo Onana yaciye mu kiganiro ‘Tout un Monde’ kinyura kuri televiziyo yitwa LCI y’ikigo TF1, aho yaganiraga n’umunyamakuru Vincent Hervouët ku gitabo yanditse kuri ‘Operation Turquoise’.

Ikiganiro kijya kurangira nibwo yeruye avuga ko nta Jenoside yabayeho yakorewe Abatutsi mu Rwanda, yongeraho ko nta n’indi Jenoside yabayeho kuva 1900 kugeza 1994.

Umunyamategeko wa CRF, Me Richard Gisagara, yabwiye IGIHE ko umuryango w’abanyarwanda baba mu Bufaransa basanze batakomeza kwihanganira ayo magambo ubu bakaba bari gutegura ikirego bateganya kugeza ku bushinjacyaha kuri uyu wa Kabiri.

Ati “Twasanze tutakomeza kwihanganira ayo magambo, umuryango w’abanyarwanda baba mu Bufaransa bansabye ko nategura ikirego, ndi kugitegura nimara kukirangiza ni ukuzagishyikiriza ubushinjacyaha ndumva nshobora kugishyikiriza ubushinjacyaha ejo, noneho tukareba icyo bukora, bwaba butemeye kumushyikiriza ubucamanza twe ubwacu tuzamushyikiriza ubucamanza.”

Charles Onana ni umugabo ukomoka mu gihugu cya Cameroun akaba afite n’ubwenegihugu bw’u Bufaransa.

Gisagara yavuze ko uwo mugabo amaze igihe kinini apfobya Jenoside yakorewe Abatutsi ku buryo batakomeza kumwihanganira.

Ati "Ni umuntu guhera kera na kare wakomeje guhakana Jenoside yakorewe Abatutsi, iyo urebye wagira ngo ubuzima bwe yabuhariye icyo gikorwa cyo guhakana Jenoside yakorewe Abatutsi. Yanditse ibintu byinshi, yavuze ibintu byinshi ku mbuga zitandukanye, ku maradiyo, ku mateleviziyo kuburyo igihe cyari kigeze kugira ngo akurikiranwe."

Yongeyeho ati “Yigeze kuvuga ngo Jenoside yakorewe Abatutsi nicyo kinyoma kinini cyakozwe muri Afurika. Ejo bundi aherutse kuvugira kuri radiyo France24 nabwo ahakana Jenoside, ni ibintu yagize akamenyero. Ubu rero tukaba tubona igihe cyari kigeze ngo tumukurikirane cyane ko iryo tegeko rihana gupfobya Jenoside yakorewe Abatutsi ryagiyeho, kuva ryajyaho yari ameze nk’ushaka kujya arica ku ruhande ntabivuge kuburyo bweruye ariko ibyo yavuze ejo bundi ku wa Gatandatu ni agahomamunwa.”

Bikekwa ko hari abantu bamuri inyuma bamufasha kwandika ibitabo kugira ngo bibe inzira yo gutambutsamo ibitekerezo byabo byo gupfobya Jenoside yakorewe Abatutsi.

Me.Gisagara avuga ku munyamakuru Vincent Hervouët na we azwiho kugaragara mu biganiro bisesereza cyangwa bipfobya Jenoside yakorewe Abatutsi, aho atanga urugero rw’ikindi kiganiro yakoreye kuri radiyo Europe 1 muri Mata 2019 ubwo hibukwaga ku nshuro ya 25 Jenoside yakorewe Abatutsi.

Guhera mu 2017, mu Bufaransa hashyizweho itegeko rihana umuntu wese uzajya ahakanira Jenoside yakorewe Abatutsi ku butaka bw’icyo gihugu.

Iri tegeko rihanisha icyaha cy’ihakana n’ipfobya rya Jenoside yakorewe Abatutsi igifungo cy’umwaka umwe n’ihazabu y’ama-euros 45000 (asaga miliyoni 36 z’amanyarwanda). Iri tegeko riteganya kandi ingingo iha uburenganzira amashyirahamwe yose arengera abarokotse gukurikirana mu nkiko abantu bose bahakana jenoside cyangwa se bakayipfobya, mu gihe cyose ubushinjacyaha butabikoze cyangwa buzaririye mu kubakurikirana.

Charles Onana ashinjwa gupfobya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza