00:00:00 IGIHE NETWORK KN KINYARWANDA EN ENGLISH FR FRANCAIS

Ntidushaka abahakana n’abapfobya Jenoside muri Anvers- Echevin Meeuws Tom

Yanditswe na Karirima A. Ngarambe
Kuya 15 June 2022 saa 08:55
Yasuwe :

Umujyi wa Anvers wagaragaje ko igihe kigeze ngo abahakana n’abapfobya Jenoside yakorewe Abatutsi babuzwe amahwemo, ntibakomeze kugoreka amateka u Rwanda rwanyuzemo.

Ni ubutumwa bwatanzwe n’Intumwa y’Umuyobozi w’Umujyi wa Anvers, Echevin Meeuws Tom, ubwo Abanyarwanda bahatuye bifatanyaga n’inshuti zabo mu kwibuka ku nshuro ya 28 Jenoside yakorewe Abatutsi, yahitanye ubuzima bw’inzirakarengane zirenga miliyoni mu minsi 100.

Echevin Meeuws Tom yabwiye IGIHE ko yashimishijwe no kwitabira igikorwa cyo Kwibuka abazize Jenoside kuko bifasha kuzirikana inzirakarengane zayo no kumenya ububabare abayirokotse banyuzemo.

Yagize ati “Kwibuka ni ukuzirikana ko hari abantu banyuze mu kababaro gakomeye, bashengurwa umutima na roho, bicirwa abana babo, cyangwa ababyeyi bishwe n’abajenosideri mu myaka 28 ishize.’’

Yashimangiye ko kwibuka ari uguha abo bose agaciro no kuzirikana inzira igoye banyuzemo.

Kuri ubu imyaka 28 irashize Jenoside yakorerwaga Abatutsi ihagaritswe, ndetse igihugu cyariyubatse mu mfuruka zose.

Nubwo u Rwanda rushimwa uko rutera imbere, haracyaboneka abashaka kugoreka amateka rwanyuzemo, bagahakana banapfobya Jenoside yakorewe Abatutsi.

Muri Anvers by’umwihariko ndetse no mu Bubiligi, haboneka abantu benshi bahakana n’abapfobya Jenoside yakorewe Abatutsi aho usanga ababikora baba bagamije gutesha agaciro abayizize no kubabaza abarokotse.

Echevin Meeuws Tom yavuze ko abantu nk’abo badakwiye kurebererwa, ahubwo hakwiye ingamba zo guhangana na bo.

Ati “Dushobora kuba tutari Abanyarwanda ariko turi abo muri Anvers. Dusangiye ubutaka. Ni ingenzi kwibuka no kumva ibyabaye.’’

“Aha turavuga ko tutemera abantu bigize abavugizi cyangwa kuganira n’abahakana bakanapfobya Jenoside. Twese turi abantu ariko ntidushaka ko abahakana Jenoside bakomeza kwidegembya muri Anvers.’’

Anvers ni agace ubusanzwe gakunze kubarizwamo abantu biganjemo Abanyarwanda basize bakoze Jenoside cyangwa ababakomotseho baba bashaka kuyobya uburari bw’uruhare bayigizemo cyangwa gupfobya amateka y’ibyabaye.

Mu gihe cyo Kwibuka muri Anvers, Abanyarwanda n’inshuti z’u Rwanda batuye muri uyu mujyi mu Bubiligi basabwe kurangwa n’icyizere kugira ngo u Rwanda ruhore rwemye kandi ruzira amacakubiri ndetse no gukomeza kurwanya abapfobya n’abahakana Jenoside yakorewe Abatutsi, barushaho gushyira imbaraga zabo hamwe.

Intumwa y’Umuyobozi w’Umujyi wa Anvers, Echevin Meeuws Tom, yavuze ko uyu mujyi udakwiye kureberera abahakana n’abapfobya Jenoside yakorewe Abatutsi
Echevin Meeuws Tom yifatanyije n'Abanyarwanda n'inshuti zabo zo mu Mujyi wa Anvers kwibuka abazize Jenoside yakorewe Abatutsi mu 1994
Echevin Meeuws Tom yanditse ubutumwa bwo gukomeza abarokotse Jenoside yakorewe Abatutsi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .