Ibi yabigarutseho ubwo Abanyarwanda n’inshuti zabo batuye muri Kenya bibukaga ku nshuro ya 29 Jenoside yakorewe Abatutsi mu 1994.

Nyuma ya Jenoside Abanyarwanda bongeye kuba umwe ndetse bariyunga barenga amacakuburi yabatanyaga, ibi bigaragarira mu gipimo cy’ubumwe n’ubwiyunge kiri ku kigero cya 94.7%.

Ubu bumwe butangaza amahanga ariko Abanyarwanda bo bashyize imbere "Ndi Umunyarwanda", birengagiza amacakubiri yabatanyaga yabagegeje kuri Jenoside, usanga benshi bayoberwa ibanga ryakoreshejwe.

Ushinzwe Ibikorwa bya Loni muri Minisiteri y’Ububanyi n’Amahanga ya Kenya, Ambasaderi Susan Mwangi, yashimye uburyo u Rwanda rwageze ku bwiyunge n’iterambere nyuma ya Jenoside.

Ati “Twubaha umuhate w’Abanyarwanda ku ntambwe bateye yabagejeje ku bwiyunge no gukira ibikomere ndetse n’iterambere ry’ubukungu byarugejeje kuba imbuto y’amahoro muri Afurika rukaba igihugu ushobora kubamo utekanye.”

Yakomeje avuga ko bazakomeza gushyigikira abarwanya icyatuma Jenoside hari aho yaba ndetse no kubaka ejo hazaza heza.

Ambasaderi w’u Rwanda muri Kenya, Dr. Richard Masozera, yavuze ko Kwibuka ari ingenzi kandi ko buri wese akwiye guhagarara mu kurwanya abahakana bakanapfobya Jenoside yakorewe Abatutsi mu 1994.

Ati “Kwibuka biradusobanura kandi bitwibutsa gukomera ku ntego yacu y’ubumwe n’ubwiyunge no kubiba amahoro. Guhakana Jenoside bikomeretsa abayirokotse ni ngombwa ko twunga ubumwe mu kurwanya ababikora mu nyungu z’urubyiruko.”

Ku ruhande rw’Uhagarariye Umuryango w’Abibumbye muri Kenya, Stephen Jackson, yifatanyije n’aba Banyarwanda kwibuka ndetse avuga ko imiryango mpuzamahanga ifite ikimwaro ku kuba ntacyo bakoze muri Jenoside.

Ati “Mu gihe twibuka Jenoside yakorewe Abatutsi mu 1994 turunamira inzirakarengane zirenga miliyoni z’abana, abagore n’abagabo bishwe mu minsi ijana gusa mu myaka 29 ishize. Ariko turibukana ikimwaro kubera gutsindwa kw’imiryango mpuzamahanga.”

Iki gikorwa cyabereye muri Kenya cyo kwibuka ku nshuro ya 29 Jenoside yakorewe Abatutsi mu 1994, cyitabiriwe n’abasaga 500 biganjemo urubyiruko rw’Abanyarwanda ruba muri iki gihugu.

Ambasaderi w’u Rwanda muri Kenya, Dr. Richard Masozera, yavuze ko kwibuka ari ingenzi kandi ko buri wese akwiye guhagarara mu kurwanya abahakana bakanapfobya Jenoside yakorewe Abatutsi mu 1994

Urubyiruko rw'Abanyarwanda ruba muri Kenya rwitabiriye umuhango wo kwibuka ku nshuro ya 29 Jenoside yakorewe Abatutsi mu 1994

Umuyobozi wa Diaspora Nyarwanda muri Kenya, Dr Butera Innocent, ashyira indabo ahari ikimenyetso cy'Urwibutso rwa Jenoside

Uyu muhango witabiriwe n'abanyapolitiki batandukanye

Uhagarariye Umuryango w’Abibumbye muri Kenya, Stephen Jackson, yifatanyije n’Abanyarwanda kwibuka ndetse avuga ko umuryango mpuzamahanga ufite ikimwaro ku kuba ntacyo wakoze muri Jenoside

Abanyarwanda baba muri Kenya bunamiye inzirakarengane za Jenoside yakorewe Abatutsi mu 1994

Ushinzwe Ibikorwa bya Loni muri Minisiteri y’Ububanyi n’Amahanga ya Kenya, Ambasaderi Susan Mwangi, yashimye intambwe u Rwanda rwateye mu bumwe n’ubwiyunge nyuma ya Jenoside yakorewe Abatutsi mu 1994

Muri uyu muhango hacanwe urumuri rw'icyizere cy'ahazaza h'Abanyarwanda