Kenya: Abahembwa umushahara muto bakuriweho imisoro kubera COVID-19

Yanditswe na Nkurunziza Ferdinand
Kuya 26 Werurwe 2020 saa 11:07
Yasuwe :
0 0

Leta ya Kenya yafashe ingamba zigamije gufasha abaturage bayo guhangana n’ingaruka z’icyorezo cya Coronavirus, zirimo gukuraho no kugabanya imisoro imwe n’imwe bari basanzwe batanga.

Itangazo ryasohowe n’Ibiro by’Umukuru w’Igihugu kuri uyu wa Gatatu, tariki ya 25 Werurwe 2020, rivuga ko Perezida wa Kenya, Uhuru Kenyatta, ashingiye ku kuba hari abahagaritse imirimo bakoraga, bikaba byarateje igihombo ku bakozi n’abakoresha babo, ategetse ko ikigega cya leta n’izindi nzego bireba bishyira mu bikorwa amabwiriza yose yatanze.

Mu mabwiriza yatanzwe na Perezida Kenyatta, harimo ko abakozi bahembwa umushahara mbumbe w’amashingi ya Kenya atarenze ibihumbi 24, akabakaba 214 700 Frw, bakuriweho imisoro 100%.

Umusoro ku byinjijwe n’umuntu ku giti cye wo wagabanyijwe ugirwa 25%, uvuye kuri 30%, mu gihe umusoro ku byinjijwe n’ibigo by’imari bito n’ibiciriritse na wo wavanywe kuri 3% ugirwa 1%.

Abageze mu za bukuru, imfubyi n’abandi baturage bugarijwe n’ibibazo bemerewe gusaranganywa miliyari 10 z’amashilingi ya Kenya, ni ukuvuga hafi miliyari 90 z’amafaranga y’u Rwanda, azabafasha guhangana n’ingaruka bazaterwa na Coronavirus.

Perezida Kenyatta kandi yasabye ko Ibiro Bishinzwe kugenzura abatse inguzanyo biba bihagaritse gushyira ku rutonde rwa ba bihemu abantu, ibigo bito n’ibiciriritse n’ibigo binini bitabashije kwishyurira inguzanyo zabyo ku gihe, uhereye tariki ya 1 Mata 2020.

Umusoro ku nyungu (VAT) na wo wagabanyijwe ushyirwa kuri 14%, uvanywe kuri 16%, guhera tariki ya 1 Mata 2020.

Minisiteri zose n’ibigo bya leta muri Kenya byasabwe kwishyura miliyari 13 z’amashilingi ya Kenya z’inyemezabwishyu zagenzuwe mu gihe kitarenze ibyumweru bitatu, uhereye ku wa 25 Werurwe 2020.

Abikorera na bo basabwe kwishyura imyenda yose bari babereyemo inzego zitandukanye muri ibi byumweru bitatu.

Ikigo cy’Imisoro n’Amahoro muri Kenya na cyo cyasabwe guhita gitangira gusubiza umusoro ku nyungu kibereyemo ibigo n’abantu batandukanye cyamaze kugenzura, ungana na miliyari 10 z’amashilingi ya Kenya, mu rwego rwo kongera ihererekanya ry’amafaranga mu bikorwa by’ubucuruzi.

Perezida Kenyatta kandi yasabye ko hongerwa abakozi mu nzego z’ubuzima bagatanga umusanzu wabo mu guhangana na Coronavirus.

Mu bindi byagarutsweho muri iri tangazo, Kenyatta yavuze ko we n’abayobozi muri guverinoma bemeye gukatwa umushahara wabo guhera muri uku kwezi. Perezida na Visi-Perezida bazakatwa 80% by’umushahara mbumbe wabo, abaminisitiri n’abanyamabanga ba leta muri za minisiteri bakatwe 30%, mu gihe abakuriye inzego zitandukanye muri minisiteri bo bazajya bakatwa 20%.

Perezida Kenyatta yasabye abandi bayobozi mu nzego za leta gushyigikira iyo gahunda yatangije yo gutanga ku mishahara yabo mu rwego rwo kongera amafaranga azifashishwa mu guhangana na Coronavirus.

Muri Kenya hamaze kwandura abantu 28, umwe akaba yarakize. Abantu benshi barimo Abanya-Kenya n’abanyamahanga baketsweho Coronavirus bashyizwe mu kato mu rwego rwo kugabanya ibyago byakomoka ku ikwirakwira ry’iki cyorezo.

Kenya iri mu bihugu biherutse guhabwa inkunga y’ibikoresho byo gusuzuma bimwe mu bimenyetso bya Coronavirus byatanzwe n’umuherwe w’Umushinwa, Jack Ma.

Kenyatta yategetse ko abahembwa umushahara muto bakurirwaho imisoro kubera COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .