Burundi: Bari kwikanga ko COVID-19 ihamaze ibyumweru bitatu

Yanditswe na IGIHE
Kuya 27 Werurwe 2020 saa 10:30
Yasuwe :
0 0

Ibitaro bikomeye mu Burundi byatabaje Minisiteri ifite mu nshingano ubuzima muri iki gihugu, biyisaba kubishakira ibikoresho byo gupima Coronavirus byihutirwa kuko hashize ibyumweru bitatu ibi bitaro byakira abarwayi bafite ibimenyetso nk’iby’iki cyorezo.

Umuyobozi wa ‘Kira Hospital’ iri mu mavuriro akomeye mu Burundi yandikiye Minisiteri y’Ubuzima no Kurwanya Sida mu Burundi ayimenyesha ko kuri uyu wa Kane, tariki ya 26 Werurwe 2020, bakiriye abandi barwayi batatu bafite ibimenyetso simusiga bya COVID-19.

Muri iyo baruwa, Umuyobozi Mukuru wa ‘Kira Hospital’, Dr Christophe Sahabo, yavuze ko bakimara kwakira abo barwayi bahise babimenyesha ikipe ya Minisiteri y’Ubuzima, ishinzwe ubutabazi bwihuse.

Dr Sahabo yabwiye ikinyamakuru ‘Iwacu’ ati "Abarwayi bizanye ku bitaro ubwabo, bavuga ko baherutse hanze y’igihugu kandi ko bafite ubwoba ko bashobora kuba baranduye."

Ibi bitaro byavuze ko bishingiye ku mashini ya PCR isanzwe yifashishwa mu gupima bimwe mu bizami byo kureba ko umuntu yanduye COVID-19 n’umuganga w’inzobere mu gusuzuma bifite, bisaba ubufasha bwa Minisiteri y’Ubuzima no Kurwanya Sida bw’ibindi bikoresho by’ibanze byifashishwa mu gusuzuma iki cyorezo.

Kuri uyu wa Kane Minisitiri w’Ubuzima muri Tanzania, Ummy Mwalimu, yatangaje ko habonetse umurwayi mushya wa Coronavirus mu gihugu cye; uwo ngo ni umushoferi utwara amakamyo manini wafashwe anyuze ku mupaka wa Kabanga uri hagati ya Tanzania n’u Burundi, kubera ko atwara imodoka hagati ya RDC, u Burundi na Tanzania.

Ntibiramenyekana niba uyu muntu yarahagaze mu Burundi cyangwa niba indwara yasanzwemo yarayivanye muri Repubulika Iharanira Demokarasi ya Congo.

Minisiteri y’Ubuzima mu Burundi yahise itangaza ko igiye gukora iperereza ku makuru y’uko uyu murwayi yari aturutse muri icyo gihugu.

Magingo aya nta murwayi wanduye COVID-19 byari byemezwa n’urwego urwo ari rwo rwose ko ari ku butaka bw’u Burundi, ariko ibihugu byose bikikije iki gihugu byamaze kugaragaramo abanduye.

Ikintu kimwe u Burundi bwakoze muri ibi bihe bidasanzwe ni ukubwira abantu bose bashaka kwinjira muri iki gihugu ko bazashyirwa mu kato nibaramuka bahageze. Bamwe bahise bafata umwanzuro wo kuguma mu bihugu baherereyemo.

U Rwanda rwahise rwemera ko ruzakomeza gucumbikira abanyeshuri b’Abarundi biga mu Rwanda kugeza igihe icyorezo kizagabanyiriza umurindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .