Biratangaje! Hari ibihugu byaciye agahigo ko kuba bitarageramo Covid-19

Yanditswe na Iradukunda Serge
Kuya 20 Kanama 2020 saa 09:50
Yasuwe :
0 0

Biragoye kwiyumvisha ko uyu munsi hari igihugu ku Isi kitarageramo icyorezo cya Covid-19 ahanini kubera uburyo cyandura byoroshye kandi byihuse,gusa nubwo bimeze gutya hari ibihugu ku Isi bitaratangaza ko byabonye umuntu n’umwe urwaye Covid-19.

Mu Ukuboza, 2019 byasaga nk’aho Covid-19 ari icyorezo kibasiye u Bushinwa gusa, ndetse abaturage ba bimwe mu bihugu bakacyumva nk’umugani kuko bumvaga kitazabageraho, gusa nyuma y’ibyumweru bike, iyi ndwara yatangiye gukwirakwira Isi ibintu byatumye OMS iyishyira mu rwego rw’ibyorezo.

Kugeza uyu munsi iki cyorezo kimaze kugera mu bihugu byo ku Isi 188 aho abarenga miliyoni 22 bamaze kucyandura mu gihe kimaze guhitana abarenga ibihumbi 784.

N’ubwo iki cyorezo kimaze kuba ikibazo gisangiwe n’ibihugu hafi ya byose byo ku isi, hari ibihugu bimwe na bimwe bitaragaragaramo umuntu numwe wacyanduye.

Kugeza ku wa 16 Kanama inzego z’ubuzima muri ibi bihu zari zitaratangaza ko zabonye umuntu numwe wanduye iki cyorezo cya Covid-19.

Ahanini kuba ibi bihugu bitarageramo Covid-19 biterwa n’impamvu zitandukanye zirimo kuba bidasanzwe bigendererwa cyane, kuba bituwe n’abaturage bake kandi batandukanye, ndetse no kuba byarafashe ingamba zo kwirinda hakiri kare.

Bimwe muri ibyo bihugu:

Koreya ya Ruguru

Kugeza uyu munsi guverinoma ya Koreya ntiratangaza ko hari umuntu n’umwe wagaragaye muri iki gihugu arwaye Covid-19, ibi biterwa n’uko guverinoma yashyizeho ingamba zo kwirinda iki cyorezo kandi ikagenzura mu buryo bukomeye ko zubahirizwa.

Muri Nyakanga nibwo ibiro ntaramakuru byo muri Koreya ya Ruguru, Korean Central News Agency (KCNA) byatangaje ko hafi n’umupaka ubahuza na Koreya y’Epfo hagaragaye umuntu bikekwa ko afite Covid-19, gusa nyuma y’iminsi mike KCNA iza kongera gutangaza ko abaganga ntayo bamusanzemo.

Kiribati

Muri iki gihugu giherereye ku mugabane wa Oceania kikaba gituwe n’abarenga gato ibihumbi 100 naho ntibaratangaza ko hari umurwayi n’umwe wa Covid-19 wahagaragaye.

Ibirwa bya Marshall

Muri ibi birwa biri mu Nyanja ya Pacifica bigahana imbibi na Hawaii ndetse na Philippines naho nta murwayi wa Covid-19 wigeze uhagaragara na rimwe.

Vanuatu

Ubuyobozi bwa Vanuatu ntiburatangaza ko hari umuturage n’umwe wagaragaye muri iki gihugu afite icyorezo cya Covid-19, ahanini byatewe nuko iki gihugu cyafashe ingamba zo kwirinda hakiri kare dore ko guhera muri Gashyantare cyahise gifunga imipaka ndetse n’abaturage bahinjira basabwaga kubanza kujya mu kato banerekanye icyemezo cyo kwa muganga ko ari bazima.

Ibirwa bya Solomon

Mu birwa bya Solomon naho ntiharagaragara umuturage urwaye Covid-19. Ahanini byatewe n’uko ibi birwa bisurwa n’abantu bake dore ko imibare yerekana ko biri mu bihugu bitanu ku Isi bisurwa gake.

Uretse kuba ibi birwa bisurwa n’abantu bake guhera muri Gashyantare byahise bishyiraho gahunda y’uko umuntu winjira muri iki birwa agomba kubanza kwerekana urupapuro rwa muganga rwemeza ko nta Covid-19 afite.

Mu bindi bihugu bitaragaragaramo umuntu numwe wanduye Covid 19 harimo Micronesia,Nauru, Palau, Samoa, ,Tonga, Turkmenistan na Tuvalu.

Nubwo Covid-19 ifatwa nk'icyorezo cy'Isi yose hari ibihugu bimwe na bimwe itarageramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .