Abasaga miliyoni 25 ku isi bashobora gutakaza akazi kubera Coronavirus

Yanditswe na IGIHE
Kuya 29 Werurwe 2020 saa 05:14
Yasuwe :
0 0

Guhangana n’ingaruka ziri guterwa n’icyorezo cya Novel Coronavirus ku bikorwa by’ubucuruzi bikomeje kubera ingume ba nyirabyo, aho batakibasha kwinjiza amafaranga nkuko byari bisanzwe.

Kuwa Kane, tariki ya 26 Werurwe 2020, ishami ry’Umuryango w’Abibumbye ryita ku Murimo ryatangaje ko muri ibi bihe byo guhangana na COVID-19, ibigo bitandukanye hirya no hino ku isi byafashe icyemezo cyo guhagarika by’agateganyo, kwirukana burundu cyangwa gutanga ikiruhuko kidahemberwa ku bakozi babyo.

Iki kibazo cyakajije umurego mu bihugu byateye imbere aho abakozi basaba inkunga leta bitewe nuko nta kazi bafite biyongereye cyane kuruta uko byari biteganyijwe.

Nko muri Leta Zunze Ubumwe za Amerika, abakozi basaga miliyoni eshatu biyandikishije ku rutonde rw’abakeneye gufashwa na leta mu gihe kitarenze icyumweru kimwe.

Inganda, ibigo by’ubucuruzi, ibitwara abagenzi haba mu modoka, gari ya moshi, ubwato no mu ndege byo mu bihugu bitandukanye byamaze kugaragaza ko bitazakomeza guhemba abakozi babyo mu gihe bitari gukora.

Bimwe mu bihugu nk’u Bwongereza n’u Bufaransa byemeye ko leta izakomeza gutanga amafaranga yo guhemba abakozi bari ku mushahara baba aba leta ndetse n’abo mu bikorera, kubishyurira bimwe mu bikenerwa by’ibanze nk’amazi, umuriro, gaz, ubukode bw’inzu ku baba mu nzu za leta n’ibindi.

Imwe mu mirimo itarahagaze muri iki gihe cyo guhangana n’iki cyorezo, ni itangazamakuru hirya no hino ku isi, bitewe nuko rifite uruhare runini mu kumenyesha no kwigisha abaturage bose uburyo iki cyorezo giteye n’aho kigeze kiyogoza isi.

Ibitangazamakuru byo muri Leta Zunze Ubumwe za Amerika biri mu byibasiwe n’ihungabana ry’ubukungu bwatewe na COVID-19 ndetse byatangiye no gusezerera bamwe mu bakozi babyo, abandi bibagabanyiriza imishahara.

Ishami ryandika inkuru z’ubukungu muri CNN ryanditse ko byinshi mu bitangazamakuru muri Leta Zunze Ubumwe za Amerika biri kwirukana abakozi babyo, ibindi bikabaha ikiruhuko kidahemberwa, abasigaye bakagabanyirizwa imishahara yabo kuko ngo bitakibona aho bikura amafaranga yo gukomeza guhemba abakozi bose bifite.

Abanyamakuru ba mbere bagizweho ingaruka n’ibi byemezo ni abakoraga inkuru z’imikino n’imyidagaduro kuko ari byo bikorwa bihuza abantu benshi byahagaritswe mbere y’ibindi byose.

Bimwe mu bitangazamakuru nka BBC yo mu Bwongereza yo yahisemo kwisubiraho ku cyemezo yari iherutse gufata cyo kwirukana bamwe mu bakozi bayo, ivuga ko muri ibi bihe bikomeye bakenewe cyane.

Iki cyemezo cyo kugabanya abakozi bagera kuri 450, BBC yari yagifashe ivuga ko bizatuma izigama miliyoni 40 z’ama-pound, ariko Umuyobozi Mukuru wayo yavuze ko hashingiwe ku kuba hakenewe abakozi benshi bo gutangaza amakuru ajyanye na COVID-19, abari kwirukanwa bazakomeza akazi kabo.

Minisitiri w’intebe wa Canada, Justin Trudeau, yavuze ko guverinoma ye igiye gutanga miliyoni 30 z’amadorali ya Amerika yo gufasha ibitangazamakuru byo mu gihugu cye gukora ubukangurambaga bwo guhangana na COVID-19.

Ibigo bikomeye bitwara abagenzi mu ndege na byo biri mu byafashe iya mbere bihagarika abakozi babyo nyuma y’aho ibihugu byinshi bihagaritse ingendo z’indege haba imbere mu gihugu ndetse n’iziva cyangwa zerekeza hanze yabyo.

Sosiyete ya Brussels Airlines yahagaritse ingendo zayo zose kubera Coronavirus bituma abakozi bayo barenga 4000 bava ku kazi mu gihe gito.

Ishyirahamwe Mpuzamahanga rishinzwe gutwara abantu n’ibintu mu Kirere, IATA, riheruka gutangaza ko ibigo mpuzamahanga bitwara abagenzi mu ndege bizahomba miliyari $113 mu gihe Coronavirus yakomeza gukwirakwira.

Abasaga miliyoni 25 ku isi bashobora gutakaza akazi kubera Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .