Coronavirus ku wa 24 Kanama: Abanduye barenze miliyoni 23

Yanditswe na Iradukunda Serge
Kuya 24 Kanama 2020 saa 09:43
Yasuwe :
0 0

Mu gihe cy’amezi icyenda icyorezo cya COVID-19 kigeze ku Isi, umubare w’abacyandura ukomeje kwiyongera umunsi ku munsi dore ko ubu bamaze kurenga miliyoni 23 mu gihe abo kimaze guhitana barenga ibihumbi 800.

Mu Ukuboza 2019 nibwo umurwayi wa mbere wa COVID-19 yagaragaye mu Bushinwa, mu gihe cy’amezi make iki cyorezo cyari cyamaze gukwira mu bihugu byinshi byo ku Isi, kugeza naho ku wa 14 Werurwe mu Rwanda hagaragaye umurwayi wa mbere w’iki cyorezo.

Nubwo abayobozi batandukanye mu rwego rw’Isi bakomeje gushyiraho ingamba zo kwirinda iki cyorezo, ntibikibuza ko gikomeza gukwirakwira ku muvuduko wo hejuru dore ko kugeza uyu munsi ibihugu byo ku Isi kitarageramo ari mbarwa.

Mu bihugu biza ku isonga mu bifite umubare munini w’abamaze kwandura iki cyorezo harimo Leta Zunze Ubumwe za Amerika aho abamaze kucyandura babarirwa muri Miliyoni eshanu, barimo ibihumbi 44 banduye mu masaha 24, Brésil ifite abaturage barenga miliyoni eshatu bamaze kwandura mu gihe abo imaze guhitana barenga ibihumbi 114.

Mu bindi bihugu byashegeshwe na Covid-19 harimo u Buhinde bufite abanduye barenga miliyoni eshatu, u Burusiya bufite abanduye barenga ibihumbi 900 mu gihe bumaze gupfusha abagera ku bihumbi 16.

Ku rundi ruhande Umugabane wa Afurika nawo ntiworohewe kuko umubare w’abandura kuri uyu mugabane ukomeza kwiyongera uko bwije n’uko bukeye.

Mu bihugu byashegeshejwe na Covid-19 ku mugabane wa Afurika, ku isonga haza Afurika y’Epfo ifite abaturage bamaze kwandura Covid-19 barenga ibihumbi 600, mu gihe abo imaze guhitana barenga ibihumbi 13.

Ikindi gihugu cyo muri Afurika kimaze kugerwaho n’ingaruka zikomeye za Covid-19 ni Misiri imaze gupfusha abantu barenga ibihumbi bitanu, mu gihe umubare w’abanduye wo urenga ibihumbi 97.

Umuyobozi w’Ishami ry’Umuryango w’Abibumye ryita ku Buzima, Dr Tedros Adhanom Ghebreyesus, aherutse kuvuga ko kugeza n’ubu hataramenyekana neza ingaruka iki cyorezo kizasiga ku Isi.

Yagize ati “Nubwo twize byinshi bijyanye n’iki cyorezo, dufite gusa amezi ari munsi y’umunini y’ubunararibonye. Kuri ubu ibyo tuzi ku ngaruka z’igihe kirere z’iki cyorezo ni bike.”

Yakomeje agira ati “Nta gihugu gishobora kwikura muri ibi kugeza igihe tuzabonera urukingo, nirwo ruzaba igikoresho cy’ingenzi, kandi twizeye ko tuzarubona vuba bishoboka.”

Dr Tedros yasabye abatuye Isi ko mu gihe urukingo rutaraboneka bakwiriye gukomeza kwitwararika bubahiriza amabwiriza yo kwirinda Covid-19 yashyizweho n’inzego z’ubuzima mu bihugu batuyemo.

Umubare w'abamaze kwandura Covid-19 ku Isi hose warenze miliyoni 23

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .