Jason Derulo yagiranye ikiganiro n’Abanyamakuru

Yanditswe na

Richard IRAKOZE

Kuya 28 Nyakanga 2012 saa 05:12
Yasuwe :
0 0

Umuhanzi w’Umunyamerika Jason Derulo yagiranye ikiganiro n’abanyamakuru kuri uyu wa Gatandatu tariki ya 28 Nyakanga 2012, kuri Serena Hotel. Jason Derulo yavuze ko yishimiye ko kuza bwa mbere muri Afurika kwe abihereye mu Rwanda.
Muri iki kiganiro cyari cyitabiriwe n’abategura irushanwa rya Primus Guma Guma Super Star II, Jason Derulo yavuze ko yagiye agira amahirwe yo gutumirwa ahantu henshi ku isi ariko ko atari yarigeze agira amahirwe yo kugera muri Afurika.
Yavuze ko akimara guhamagarwa (...)

Umuhanzi w’Umunyamerika Jason Derulo yagiranye ikiganiro n’abanyamakuru kuri uyu wa Gatandatu tariki ya 28 Nyakanga 2012, kuri Serena Hotel. Jason Derulo yavuze ko yishimiye ko kuza bwa mbere muri Afurika kwe abihereye mu Rwanda.

Muri iki kiganiro cyari cyitabiriwe n’abategura irushanwa rya Primus Guma Guma Super Star II, Jason Derulo yavuze ko yagiye agira amahirwe yo gutumirwa ahantu henshi ku isi ariko ko atari yarigeze agira amahirwe yo kugera muri Afurika.

Yavuze ko akimara guhamagarwa asabwa kuzaza mu Rwanda kuhakorera igitaramo yumvise abyishimiye cyane, kuko kuri we avuga ko ari amahirwe yo kuhagurira umuziki we no kugera ahantu atari yagera.

Jason Derulo yagize ati:“Kuri njye numvise ntunguwe cyane numvise bampamagaye. Naje kuvugana n’umujyanama wanjye ngo tuzaze kuko ni uburyo bwo kwerekana umuziki wanjye.”

Jason Derulo, yashimiye abahanzi bageze ku musozo w’irushanwa rya PGGSS II ari bo King James na Jay Polly. Yababwiye ko kugera ku musozo w’amarushanwa biba bitoroshye anabasaba gukomeza gukuza ubuhanzi bwabo ababwira ko ubuhanzi ari ugusobanura ibikurimo. Yavuze ko kuri we ubuhanzi abukora nk’akazi kandi asaba aba bahanzi kurushaho gukora cyane no kwita ku mpano yabo.

Abajijwe niba hari icyo yari azi ku Rwanda mbere y’uko aza, Jason Derulo, wavugaga amagambo make ariko agusha ku ntego, yagaragaje ko ntacyo yari asanzwe azi. Gusa yirinze kuvuga byinshi byihariye ku Rwanda (n’ubwo byari byitezwe n’abanyamakuru) ariko avuga ko u Rwanda kuri we, kimwe n’ahandi hantu ajya, hamutera inganzo. Yavuze ko umujyi yabonye ari mwiza ariko ko ataragera henshi avuga ko yari amaze umunsi umwe gusa aje. Yavuze ko afite amatsiko yo kuba yamenya byinshi ku Rwanda.

Abajijwe niba kuzamuka kwe mu buhanzi hari isano byaba bifitanye n’uko mu mwaka wa 2009, ahimba indirimbo "Whacha Say" umuhanzi w’icyamamare Chris Brown yari ari kuvugwaho inkuru mbi z’uko yari yatandukanye na Rihanna, Jason Derulo yasubije ko ibyo atabizamukiyeho ngo amenyekane. Yavuze ko atagendera ku kumanuka kw’umuhanzi mugenzi we, ko ahubwo we aba areba imbere n’icyateza imbere umuziki we.

Abajijwe ku byo yigeze gutangaza ko ngo yaba akundana n’abahungu, Jason Derulo yavuze ko atari byo adakundana n’abahungu (les gays) ko afite umukunzi yavuze mu izina rye, Jordan Sparks, umuhanzi nawe wigeze kuza mu Rwanda.

Muri iki kiganiro Jason Derulo yasobanuriwe amavu n’amavuko y’irushanwa rya PGGSS riri kuba ku nshuro yaryo ya kabiri, anabwirwa icyo rigamije n’uko imwe mu ntego yaryo ari uguhuriza Abanyarwanda hamwe mu byishimo n’umunezero bahujwe n’umuziki, ari nayo mpamvu yahamagawe kuza gutarama mu Rwanda. Ibi bikorwa mu kwamamaza ikinyobwa "Primus" cyitiriwe iri rushanwa.

Jason Derulo yavuze ko ateganya kwishimana n’Abanyarwanda mu gitaramo ateganya kuri uyu mugoroba. Iki gitaramo kirabera kuri uyu wa Gatandatu tariki ya 28 Nyakanga 2012, mu busitani bwo hanze ya Stade Amahoro I Remera ahateganye na Sports View Hotel.

Amafoto:

Abanyamakuru bakurikirana ikiganiro
King James asuhuza Jason Derulo
Jay Polly i bumoso, Jason Derulo hagati na King James i buryo
Jason ari kumwe na bamwe mu bategura amarushanwa ya PGGSS II
Jason avugana n'itangazamakuru mu Rwanda

Ushobora kureba andi mafoto menshi ukanda AHA


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .