Icyo Young Grace atekereza ku guhuza ibitsina ku bakundana batarashakana n’ibindi

Yanditswe na

Richard Irakoze

Kuya 26 Kamena 2012 saa 07:50
Yasuwe :
0 0

N’ubwo akenshi bakunda kwiririmbira ku buzima busharira baba bavuga ko babayemo, bamwe mu baraperi nka Young Grace bazi iby’urukundo kandi nabo baba mu buzima bwo gukundana.
Gusa Young Grace w’imyaka 18 y’amavuko, we avuga ko nta muhungu afite bakundana kuri ubu. Avuga ko amaze gutandukana n’abahungu bagera kuri batanu.
Muri iki kiganiro Young Grace yagiranye n’umunyamakuru Richard Irakoze wa IGIHE, arabagezaho byinshi mutari muzi kuri we birebana n’ubuzima bwe nk’umuhanzi, ndetse na byinshi (...)

N’ubwo akenshi bakunda kwiririmbira ku buzima busharira baba bavuga ko babayemo, bamwe mu baraperi nka Young Grace bazi iby’urukundo kandi nabo baba mu buzima bwo gukundana.

Gusa Young Grace w’imyaka 18 y’amavuko, we avuga ko nta muhungu afite bakundana kuri ubu. Avuga ko amaze gutandukana n’abahungu bagera kuri batanu.

Muri iki kiganiro Young Grace yagiranye n’umunyamakuru Richard Irakoze wa IGIHE, arabagezaho byinshi mutari muzi kuri we birebana n’ubuzima bwe nk’umuhanzi, ndetse na byinshi birebana n’ubuzima bwe busanzwe birimo n’icyo atekereza ku mibonano mpuzabitsina ku bakundana batarashakana n’ibindi.

Soma ikiganiro kirambuye yagiranye na IGIHE:

IGIHE: Muraho Young Grace, mwatwibwira ku buryo burambuye?

Young Grace: Muraho R. Nitwa Grace Mary Abayizera navutse tariki 19 Nzeri 1993. Ndi mwene Samson Turatsinze na Immaculée Yankurije. Ndi imfura mu bana batatu, turi abakobwa babiri, njye na Umuratwa Queen Edwige n’umuhungu umwe witwa Turatsinze Christophe uzwi cyane ku izina ry’ubuhanzi rya Philosophe. Navukiye ku Gisenyi ubu ntuye Kicukiro mu Mujyi wa Kigali.

IGIHE: Tubwire ku bijyanye n’amashuri yawe.

Young Grace: Amashuri abanza nayatangiriye kuri APEFE Mweya ku Gisenyi, njya mu yisumbuye kuri Lycée de Gisenyi (mu wa mbere), mu wa kabiri no mu wa gatatu niga I GItarama kuri ETEKA, mu mwaka wa kane niga kuri GSK mu Ruhengeri, mu wa gatanu no mu wa gatandatu niga kuri Ami des Enfants I Kinyinya.

IGIHE: Ni iki cyaranze amabyiruka n’ubwana byawe?

Young Grace: Mu bwana bwanjye narangwaga no kuririmba indirimbo z’abandi bahanzi. Nakundaga gukina Basket Ball.

IGIHE: Ni iki gitangaje cyangwa gisekeje cyangwa se kikwibutsa ubwana bwawe (nk’amanyanga) wibuka waba warakoze ukiri muto?

Young Grace: Nabaye uwa nyuma mu ishuri, nuko mpindura Bulletin. Ikindi bantumye ahantu bampa facture, nkuraho amafaranga 50 ngura bombo mama arantonganya ambaza impamvu nazanye amafaranga atuzuye.

IGIHE: Ni iki se wakoze mu bwana bwawe cyo mu buhanzi wibuka?

Young Grace: Najyaga ndirimba mu ishuri nkaririmba indirimbo z’abahanzi bakunzwe nkazirapa nazihinduye mu Kinyarwanda. Iyo nibuka ni nka “Nageze muri refe nsanga amajage ateretse mpita nyafata ndagotomera.”

IGIHE: Usengera mu rihe dini?

Young Grace: Ndi umu gaturika.

IGIHE: Ni ryari watangiye gukunda ubuhanzi?

Young Grace: Muzika natangiye kuyikunda nkiri umwana muto cyane numvise nyikundishijwe na Lolilo.

IGIHE: Mu Rwanda ni uwuhe muhanzi ukunda?

Young Grace: Mu Rwanda umuhanzi nkunda ni Jay Polly, mfana Fireman ariko nkunda Jay Polly.

IGIHE: Ni abahe bahanzi wumva bazagera Final muri PGGSS II?

Young Grace: Abahanzi batatu bazagera final ni njyewe, King James na Jay Polly.

IGIHE: Ni iki wiyiziho cy’akarusho kuri wowe mu buhanzi bwawe?

Young Grace: Numva bambwira ko nambara neza, bamwira ko bankundira uburyo nambara nkikwiza.

IGIHE: Wabonye gute aya marushanwa ya PGGSS II, haba muri Roadshows no muri Liveshow ya mbere muheruka gukora?

Young Grace: Primus Guma Guma nayibonye neza, imbere y’abafana barenga 20 birenga ubona bakwishimiye...

IGIHE: Bamwe mu bantu bavuga ko uzwi cyane nyamara nta bihangano byawe byinshi bizwi, ufite indirimbo zingahe?

Young Grace: Mfite indirimbo umanani ndi njyenyine, harimo n’izo nakoranye n’abandi bahanzi zigera kuri 12.

IGIHE: Ni ibihe bihembo wegukanye mu buhanzi bwawe ?

Young Grace: Natwaye Best Female Artist Award ku Gisenyi, ntwara Best Teen Artist ya Salax Award, ntwara Best MTN Caller Tune Award ya 2011, ntwara Best Red Carpet Award aho bampembye intebe za Malina Interious Ltd.

IGIHE: Ni amafaranga angahe y’imbumbe wabonye uvanye mu buhanzi?

Young Grace: Ni amafaranga miliyoni enye n’igice nahawe na BRALIRWA.

IGIHE: Ni gute wabashije gukora indirimbo yawe ya mbere? Ese ni iyihe?

Young Grace: Natangiye ibya muzika ndi muwa Gatanu mu 2010. Nahereye ku ndirimbo “Hip-Hop Game”. Nagiye bwa mbere mbere muri studio niga mu mwaka wa gatanu. Indirimbo ya mbere nayikoze mu mafaranga y’impamba nari nahawe no mu rugo (Argent de poche).

IGIHE: Waba ufite umukunzi? Niba umufite ninde ?

Young Grace: Nta mukunzi ngira. Rwose nari mufite ariko ntabwo tugikundana.

IGIHE: Wakundanye n’abahungu bangahe?

Young Grace: Nagize abakunzi benshi barenga umwe. Nakundanye n’abahungu batanu.

IGIHE: Ni ryari wakundanye n’umuhungu bwa mbere? Mbwira uko byari bimeze n’uko urukundo rwanyu rwatangiye?

Young Grace: Nakundanye bwa mbere mu 2010 niga mu mwaka wa Gatanu, nta bindi byinshi narenzaho.

IGIHE: Urukundo kuri wowe ni iki?

Young Grace: Urukundo ni ugufashanya, ni ugukorera mu bumwe mu bwumvikane no gufashanya.

IGIHE: Bivugwa ko abakobwa muri iki gihe bagenda barushoho guta ubusugi bwabo bakiri bato, wowe nk’umukobwa w’imyaka 18 ubivugaho iki?

Young Grace: Ntabwo ari byo, ni ko abantu babifata ariko ntabwo aribyo.

IGIHE: Uvuga iki ku gukorana imibonano mpuzabitsina kw’abakundana batarashakana?

Young Grace: Njyewe ntabwo nemeranya nabyo. Ntabwo baba barashakanye ntabwo ari byo. Ku mbwanjye mbona bishobora kuba byagabanya urukundo hagati yabo kuko baba barahaganye.

IGIHE: Young Grace, bigaragara ko wize ku bigo byinshi cyane, byatewe n’iki? Baba baragiye bakwirukana?

Young Grace: Oya ntabwo banyirukanaga. Ubwa mbere navuye kuri Lycée de Gisenyi kuko numvaga nshaka kwiga mu kigo mbayo (muri Internat) kandi ntabwo wakiga muri internat hafi yo mu rugo. Nashakaga kwiga muri internat kure yo mu rugo. Ahandi impamvu nagiye mpava ni uko nashatse guhindura ahantu twagiye dutura, nyuma nza kwiga I Kigali kuko byamfashaga mu buhanzi bwanjye.

IGIHE: Ni izihe nzozi zawe?

Young Grace: Hahahaha… Inzozi? Nkiri umwana nari mfite inzozi z’uko ni nzajya ntambuka bazajya bavuga ngo dore Young Grace, ndi umuntu uzwi, nazigezeho.

IGIHE: Ko wazigezeho urumva byaragushimishije? Kubera iki?

Young Grace: Iyo wifuje ikintu ukakigeraho bigomba kugushimisha.

IGIHE: Ubu noneho urota iki?

Young Grace: Ndumva nshaka kuzakora ibintu abantu benshi bananiwe, ndifuza kuziga nkagera kure nkazajya mbasha gukora ibyananiye abantu benshi.

IGIHE: Uretse kuba umuhanzi urumva wakora iki?

Young Grace: Uretse kuba umuhanzi numva nashinga uruganda nkikorera.

IGIHE: Ni ibihe biryo ukunda kurya?

Young Grace: Ibiryo nkunda birimo igitoki kirimo itomati, sositomate, ubunyobwa, intoryi, inyama zo munda, n’agasenda k’akabanga n’aka-jus k’amapera, nkarya n’inanasi.

IGIHE: Tubwire gato ku myambarire yawe.. .

Young Grace: Nkunda kwambara imyenda y’abahungu kandi ijyanye ukuntu. Nkunda kwambara nkikwiza kuko mbikunda, mbona ari byo binyambika nkaberwa.

IGIHE: Mu kuruhuka kwawe ukora iki?

Young Grace: Mu kuruhuka kwanjye nkunda guhamagara abana twiganye naba mfite akantu tugasohoka, agatara kaba kacanye tugatera inkuru tukibukiranya ibihe byahise.

IGIHE: Mu Rwanda hari itegeko riri kwigwaho ryo kwemera gukuramo inda ku mpamvu zimwe na zimwe, wowe urivugaho iki?

Young Grace: Nk’uko ibintu bigira ibyiza n’ibibi nabyo niko bimeze. Njye ndabishyigikiye ku ruhande rumwe.

Nk’urugero ibyiza ni uko umuntu ashobora kugufata ku ngufu, wahohotewe, ugatwara inda utabyifuzaga, icyo gihe iyo itegeko ribyemera uyikuramo utuje.

Nanone bishobora kuzamura ingeso y’ubusambanyi mu rubyiruko kandi ni n’icyaha kwica umuziranenge.

IGIHE: Ni ikihe gikorwa waba warakoze mu gutera inkunga Abanyarwanda bafite ingaruka zikomeye za Jenoside?

Young Grace: Njyewe mfite abana ndihira ariko harimo ab’abakene. Nta kintu ngenderaho.

IGIHE: Hari ikibazo twaba tutakubajije wumva wifuza kuba wavugaho?

Young Grace: Nasaba abantu ko banyitorera. Ndasaba kandi ko batakwita ku muntu wanyiyitiriye kuri facebook ngo ansebye. Akoresha amazina yanjye kuri facebook anyiyitirira yakandika ibintu bisebya kandi binyicira izina binanteranya na bagenzi banjye.

IGIHE: Urakoze Young Grace .

Young Grace: Murakoze namwe.



KANDA HANO USHOBORE KUMVA
  Hip-Hop Game By Young Grace

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza