Hari hashize iminsi muri Rayon Sports hagaragara ibibazo by’ubwumvikane buke bushingiye ku miyoborere, nk’uko IGIHE iheruka kubyandika.

Kuri uyu wa 25 Ugushyingo 2025, ku cyicaro cya RGB habaye inama yahuje ubuyobozi bwayo n’abantu 18 bagize inzego ziyobora Rayon Sports ari zo Inama y’Ubutegetsi, Komite Nyobozi, Komite Ngenzuzi na Komite ishinzwe gukemura amakimbirane.

Itangazo rigenewe abanyamakuru ryashyizweho umukono na Muvunyi Paul wayoboraga Inama y’Ubutegetsi na Twagirayezu Thaddée wayoboraga Komite Nyobozi kuva mu matora yabaye mu Ugushyingo 2024, rivuga ko "iyi nama yemeje ko inzego zose zari ziyoboye Association Rayon Sports zihagaze”, aho zisimbuwe na Komite y’agateganyo yashyizweho."

Ni Komite iyobowe na Murenzi Abdallah wari usanzwe ari Umunyamabanga w’Inama y’Ubutegetsi, mu gihe abandi bayigize ari Musabyimana Jean Baptiste, Gakwaya Olivier, Akayezu Josée na Me Nubumwe Jean Bosco.

Komite y’agateganyo yahawe igihe cy’amezi gatatu guhera kuri uyu wa Kabiri, tariki ya 25 Ugushyingo 2025, ishinzwe kuvugurura amategeko y’Umuryango Rayon Sports mu nzego zawo no gushyiraho umurongo w’imiyoborere y’Umuryango.

Ni ku nshuro ya kabiri Urwego rw’Igihugu rw’Imiyoborere (RGB) rukemura ibibazo bya Rayon Sports muri ubu buryo, aho byaherukaga mu 2020.

Inkuru bifitanye isano:

• Agatsiko k’amabandi no guheza ab’i Nyanza na Ruhango: Rayon Sports igeze aharindimuka

• Abadepite babajije RGB amaherezo y’ibibazo bya Rayon Sports nyuma y’umwuka mubi

• RGB yabasabye ko urwego rumwe ruvaho: Akantu ku kandi ku mwuka mubi mu nzego ziyoboye Rayon Sports

• Iherezo ry’ibibazo bya Rayon Sports: Sadate yegujwe, hatangwa iminsi 30 yo gukemura ibibazo kuri komite nshya

• Murenzi Abdallah yagizwe Perezida w’inzibacyuho wa Rayon Sports

Murenzi Abdallah yongeye kugirwa Umuyobozi w'Inzibacyuho muri Rayon Sports nk'uko byagenze mu 2020

Inama y'Ubutegetsi yari iyobowe na Paul Muvunyi na Komite Nyobozi yari iyobowe na Twagirayezu Thaddée, ziri mu nzego zari ziyoboye Rayon Sports zahagaritswe