Zimwe mu nyamaswa zazimiye burundu ku Isi

Yanditswe na Iradukunda Serge
Kuya 20 Gashyantare 2020 saa 10:54
Yasuwe :
0 0

Hari zimwe mu nyamaswa umuntu yumva amazina n’imiterere yazo akabifata nk’umugani kuko atakizibona, nyamara mu by’ukuri zarahoze zibaho abantu bakazibona nk’uko uyu munsi babona izihari ariko kubera impamvu zitandukanye zikaza kuzimira.

Kuzimira kw’inyamaswa ni ibintu bikunze kubaho ahanini bitewe n’impamvu kamere zirimo n’ihinduka ry’ibihe no guhindagurika kw’ingano y’amazi y’inyanja.

Gusa ku rundi ruhande ibikorwa bya muntu birimo ubuhigi, gutema amashyamba, ubuhinzi nabyo biri mu biza imbere mu gutuma inyamaswa zizimira ndetse hakaba hari n’impungenge z’uko bikomeje gutya izindi nyamaswa zirimo ingangi n’inkura nazo zahinduka amateka ku Isi.

Zimwe mu nyamaswa zahoze ziba ku Isi ariko ubu zikaba zaramaze kuzimira.

Sabre-toothed cat

Iyi nyamaswa yari ifite imisusire nk’iy’injangwe ariko ikaba nini kuyirusha, yabayeho mu myaka miliyoni 55 ishize ikaba yari indyanyama. Izina ryayo irikomora ku mabwene yayo maremare yashoboraga no kugera kuri santimetero 50.

Iyi nyamaswa yari izwiho ubuhanga mu guhiga, ndetse ikaba yari ifite umwihariko w’uko urwasaya rwayo rufunguka ku mfuruka ifite dogere 120, ni ukuvuga inshuro hafi ebyiri z’uko urw’intare rufunguka.

Abahanga bavuga ko izimira ry’iyi nyamaswa rishobora kuba ryaratewe n’izimira ry’izindi nyamaswa nini z’indyabyatsi zaryaga, abandi bakavuga ko bishobora kuba byaratewe n’imihindagurikire y’ibihe ndetse n’ibikorwa bya muntu.

Sabre toothed Cat yagiraga amabwene maremare ikamenya no guhiga cyane

Igisamagwe cyo muri Tasmania

Tasmanian tiger ni inyamaswa yagaragaye bwa nyuma ku Isi hagati y’umwaka wa 1910 na 1920 ndetse iyanyuma.

Iyi nyamaswa yari ifite amabara nk’ay’igisamagwe ariko yo ikagira umubyimba muto kuko yapimaga ibiro 30 ikagira n’uburebure bwa metero ebyiri.

Ikindi cyayitandukanyaga n’ibisamagwe biba muri pariki zo hirya no hino ku Isi ni umutwe wayo wajyaga kumera nk’uw’impyisi.

Izi nyamaswa zakundaga kwibera muri Autralia mu gace kazwi nka Tasmania abahanga bavuka ko izimira ryazo ryatewe n’uko ibikorwa bya muntu byagendaga bisatira aho zituye ndetse abandi bakavuga ko rishobora kuba ryaratewe n’iyaduka ry’Imbwa ndetse n’ibyorezo.

Tasmanian Tiger yari ifite ubushobozi bwao gufungura urwasaya rwayo kuri dogere 120

Woolly Mammoth

Izi nyamaswa zari zifite imiterere nk’iyi nzovu y’uyu munsi, abahanga bavuga ko mu myaka miliyoni 3.5 ishize ari bwo zavuye muri Afurika zigenda zikwira ku yindi migabane irimo Amerika ya ruguru, u Burayi na Aziya.

Aho iyi nyamaswa yari itandukaniye n’inzovu yo ni uko umubiri wayo wari utwikiriwe n’ubwoya bwinshi kandi ikaba nini mu gihagararo kuko yashoboraga gupima metero enye z’uburebure ndetse ikagira n’ibiro byashoboraga kurenga toni esheshatu.

Izi nyamaswa zatangiye kuzimira mu myaka 10 000 ishize kubera guhigwa cyane n’ihinduka ry’ibihe, iya nyuma yagaragaye ku kirwa cya Wrangel mu 1700 mbere y’ivuka rya Yesu.

Woolly Mammoth yajyaga kugira imiterere nk'iy'inzovu

Inkura y’umukara yo muri Afurika y’uburengerazuba

Inkura zo muri ubu bwoko bwa ‘West African Black Rhinoceros’ zakundaga kwibera mu bice bya Afurika y’amajyepfo ashyira iburasirazuba, zikaba zarapimaga metero eshatu z’uburebure n’igihagararo cya metero ziri hagati 1.4 na 1.7 zikagira ibiro biri hagati ya 800 na toni 1.300.

Kimwe n’izindi nkura iyi nayo yagiraga amahembe abiri zigakunda kurya ibibabi by’ibiti n’ibyatsi.

Kubera imyemerere yo kumva ko amahembe yayo ari umuti, byatumye zihigwa cyane maze mu 1930 hafatwa ingamba zo kuzirinda ariko biranga umubare wazo ku Isi ugenda urushaho kugabanyuka.

Mu 2006 nibwo inkura ya nyuma yo muri ubu bwoko yagaragaye muri Cameroun, maze mu 2011 ku mugaragaro bitangwazwa ko zamaze kuzimira.

West African Black Rhinoceros nazo ziri mu bwoko bw'inyamaswa zazimiye

Pyrenean Ibex

Iyi nyamaswa yabarizwaga mu bwoko bw’izigize izitwa Spanish Ibex cyangwa Iberian goat.

Pyrenean ibex yari ifite imiterere nk’iy’Isha ariko yo ikagira amahembe n’ibiro biri hagati ya 24 na 80.

Kimwe n’isha iyi nyamaswa nayo yari indyabyatsi ndetse zigakunda kwibera mu kigobe cya Iberia.

Amateka yerekana ko ku Isi hari izi nyamaswa zigera ku bihumbi 50 gusa byageze mu 1900 umubare wazo umaze kugera munsi y’ijana.

Impamvu nyakuri yateye izimira ry’izi nyamaswa ntizwi ariko gusa abahanga bakeka ko zimwe mu mpamvu zariteye harimo ubuhigi ndetse no kutabasha guhangana n’izindi nyamabere.

Mu 2000 nibwo inyamaswa ya nyuma yo muri ubu bwoko yari isigaye yagwiriwe n’igiti nayo irapfa zizimira gutyo.

Pyrenean Ibex ni imwe mu nyamaswa ubu zitakiboneka ku Isi

Heath hen

Izi nkoko mbere yo kuzimira zakundaga kuba mu gice cy’iburasirazuba muri Leta Zunze Ubumwe za Amerika, gusa mu kinyejana cya 19 kubera guhigwa n’inkongi zibasiraga amashyamba byatumye umubare w’izi nkoko ugabanuka cyane.

Mu 1933 izi nkoko zatangajwe nk’izizimiye nyuma y’uko iya nyuma yari isigaye izwi nka Booming Ben yaburiwe irengero.

Iyi nkoko izwi nka Heath Hen ni imwe mu nyamaswa zazimiye 1

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza