00:00:00 IGIHE NETWORK KN KINYARWANDA EN ENGLISH FR FRANCAIS

Umunsi w’urugwiro i Kigali

Yanditswe na Cyprien Niyomwungeri
Kuya 21 June 2022 saa 11:19
Yasuwe :

Ku kazuba keza k’agasusuruko mu gitondo cyo kuri uyu wa Mbere tariki 20 Kamena 2022, inzozi zanjye zo kwitabira Inama y’abakuru b’ibihugu na za guverinoma bikoresha ururimi rw’Icyongereza (CHOGM) irimo kubera mu Rwanda, zabaye impamo.

Ni inama irimo amahuriro menshi. Reka nitse cyane ku ihuriro ry’abagore ririmo kubera muri Serena Hotel i Kigali kuko ni ryo nitabiriye. Mbega imyiteguro, mbega serivisi! wa mugani wa ba bandi ’ndabigutuye’.

Urugendo rwanjye reka nduhere ku rwego rw’ikoranabuhanga ririmo gukoreshwa muri iyi nama. Uwemerewe kwitabira iyi nama wese yahawe ikarita [badge], imufasha kwinjira mu nama runaka.

Ku ikarita yo kwinjira hariho amazina ya nyirayo, ifoto, icyiciro abarizwamo n’amakuru y’ibanga abitse hifashishijwe ikoranabuhanga rya Quick Response Code [mu mpine bayita QR Code] abasha gusomwa gusa n’uwabiherewe uburenganzira.

Ibi bikorwa mu gihe uyifite ageze ku bashinzwe umutekano nabwo hakifashishwa imashini zabigenewe ngo ayo makuru y’ibanga asomwe.

Umutekano ni uwa mbere, nk’ibisanzwe mbere yo kwinjira mu nama unyura ku bashinzwe umutekano bakabanza gusaka, kugenzura [scan] ikarita yawe ikwemerera kwinjira mu nama. Icyo wamenya ni uko iyi karita inerekana ko wapimwe Covid-19, igihe wayihabwaga kandi ukaba utaranduye.

Nkiri hano reka mbasangize inkuru ntoya y’ibyo nabonye. Bitewe n’uko hari abashobora kuba baratumye amakarita yabo ntibapimirwe Covid-19 aho bazitangiraga kuri BK Arena, bagera ku bashinzwe umutekano bagasubizwayo kuko bagaragara mu ikoranabuhanga ko batapimwe.

Umuyobozi ukomeye cyane mu Rwanda agire atya agere ku bashinzwe umutekano bakubisemo ikarita ye basanga ntiyipimishije Covid-19, igisubizo cyabaye kimwe ’subirayo ujye kwipimisha ugaruke’. Yagerageje kubasobanurira ko ari imena muri iyo nama ariko biba iby’ubusa asubira kwipimisha.

Iyi nama yarateguwe ku buryo muri metero nkeya uhasanga inkumi n’abasore bakuyobora ukarinda ugera aho ushaka kujya udakebaguje. Nkigera mu cyumba cy’inama nabonye abantu bose bacyeye ku maso baganira, baseka, ubona ko bishimye nk’abatashye ibirori.

Mpereye ku Umunyamabanga Mukuru wa Commonwealth, Patricia Scotland nabonye avuga ijambo ritangiza ihuriro ry’abagore amwenyura, ibinezaneza biramusaga ati "Ndashimira uburyo twakiriwe, nakomeje kumva abantu bajujura ngo ni heza, harasukuye, abandi bakavuga ngo ni heza kuruta u Busuwisi’.

Yahawe amashyi y’urufaya ndetse n’abandi bamukurikiye guhera kuri Cherie Blair mbere yo kugira ibyo bavuga bakabanza gutaka u Rwanda n’uburyo rwabakiriye. Ubanza iyi nama yarerekanye ko u Rwanda rushoboye kwakira inama Mpuzamahanga zo mu rwego rwo hejuru, zikaba nta makemwa, kandi abazitabiriye bakanyurwa.

Umwe mu bagabo ukomoka muri Jamaica witabiriye iyi nama twaganiriye yarambwiye ati "Najyaga nsoma ko Kigali ari nziza ariko ntabwo babeshya, ibintu byose biri ku murongo, abanyarwanda mukunda abantu kandi mugaragaza urugwiro."

Ku mugoroba umunsi wa mbere w’inama urangiye nahuye n’undi musore ukiri muto wambwiye ko yitwa Joe, akaba akorera guverinoma y’u Bwongereza. Yansezeranyije ko ’azagaruka gusura u Rwanda kuko ubwiza yabonye i Kigali n’iminsi ahafite bitamwemerera kuryoherwa uko abyifuza’.

Ubutumwa bw’ingenzi bwatangiwe mu nama ni bwinshi cyane kandi wabonaga buri wese ashishikaye. Ibi ariko ntibikubuza kugenda unyura ku dutsinda twigobetse ahantu muri Hoteli tuganira ku mishinga ikomeye.

U Rwanda nk’igihugu kizwiho ikawa n’icyayi byahogoje amahanga, mu karuhuko abashyitsi barabyishimira kakahava. Hari uwo muri Repubulika ya Dominica wambwiye ko ari ubwa mbere anyoye ikawa ariko yayikunze ku buryo ku mpamba azashyira ab’imuhira itazaburamo.

Hambere aha Perezida Kagame yakomoje ku kibazo cy’amafunguro make ahabwa abitabiriye inama mu Rwanda kandi akishyuzwa akayabo. Ndabyibuka Umuyobozi Mukuru wa RDB, Clare Akamanzi yamusezeranyije ko ’bagiye kurakara’ kandi ikibazo kigakemuka.

Ubanza koko Akamanzi yararakaye. Ifunguro ry’abitabiriye inama ryari uturabo none ryahindutse ikirunga. Abitabiriye inama bose ntawe uhejwe bisanga ku mafunguro anyuranye buri wese akihitiramo ibyo ashaka kandi abasha.

Serivisi nziza aho nari ndi nabonye impinduka wa mugani CHOGM yabaye CHOGM!. Muri buri ntera ntoya uhabona uwagufasha icyo ukeneye cyose.

Reka mbasangize ibyo nabonye mu isangira ry’abitabiriye ihuriro ry’abagore ku mugoroba wo kuri uyu wa mbere. Nkigera mu ihema ryabereyemo, nayobowe n’umwari mwiza anyereka ibyicaro.

Mu masegonda make cyane, abantu umunani bansimburanyeho buri wese ambaza niba natumye icyo kunywa, abo ni abakozi ba hoteli n’abayobozi bayo [managers] bimanukiye. Usanga bazengurukana hose ngo hato hatagira ugira icyo yinubira.

Mu kanya nk’ako guhumbya akavinyu nasabye kari kangezeho, mu gihe ngisoma rimwe mbona umukobwa mwiza araje aransekera mu ijwi ryiza ati "Excuse me" nti ’Yes’ arakomeza ati "nari nkuzaniye amazi ubusanzwe ’Wine’ tuyitangana n’amazi. Mu matsiko menshi mubaza impamvu ansobanurira ko mu kwakira neza abashyitsi ari ryo hame.

Za nkumi n’abasore bazengurukaga ku meza yose, buri wese yari afite urupapuro ruriho urutonde rw’ibinyobwa biboneka muri iryo sangira ari nako bahina akagongo bagasobanurira abantu. Uwashakaga ikawa, icyayi, amazi, agasembuye k’ubwoko bwose yabibonaga kandi ubishaka bakamwongera bwangu ari nako akaziki kisukiranya mu matwi.

Ibi byanyeretse urwego u Rwanda rugezeho mu kwakira abashyitsi n’imyiteguro ikomeye yakozwe muri CHOGM, kuko n’abantu bamenyereye amazi y’uruganda Inyange ari mu macupa ya pulasitiki, yabaye umugani kuko atarimo kubarizwa muri iyi nama ahubwo yasimbujwe ayo mu macupa y’ibirahuri.

Umunsi wanjye w’urugwiro i Kigali reka nkusoreze ku rukundo nabonye umuco wacu wagaragarijwe. Ubwo itorero Indangamirwa ryari ritangiye kwikora mu mubyimba, nagiye kubona mbona abo mu Burengerazuba bw’Isi n’izindi mpande enye z’uyu mubumbe bashyize ejuru telefoni buri wese yifatira urwibutso rw’ababyinnyi bizihiye benshi.

Ngayo nguko ay’umunsi wa mbere w’ihuriro ry’abagore ryasojwe no gucinya akadiho kakahava.

Bari bahuje urugwiro bafata n'ifoto y'urwibutso
Buri wese yari yishimiye uburyo u Rwanda rwamwakiriye
Ati "Iyi nama ni iya mbere mba nkuroga"
Akavinyu kageraga ku nyota...
Inama ya CHOGM yitabiriwe n'abaturuka mu bihugu 54 bigize Commonwealth
Yari yishimiye isangira na serivisi nziza yahawe
Ni umunsi w'urugwiro koko...
Ati "Nsigira agafoto k'urwibutso"
Symphony Band yasusurukije abitabiriye iri sangira
Akaziki ka guitar kanyuraga amatwi n'umutima
Ingoma yazivuzaga bose bakamwitegereza
Symphony Band mu majwi meza ni uku yaserutse
Minisitiri w'ibidukikije Dr Mujawamariya Jeanne d'Arc na we yitabiriye iri sangira
Umunyamabanga Mukuru wa Commonwealth Patricia Scotland (iburyo), Dr Mujawamariya (hagati) n'abandi bari bafite ibinezaneza
Itorero Indangamirwa ryanyuze benshi
Inkumi z'itorero Indangamirwa zirimo kubyina
Abasore b'itorero Indangamirwa babyina
Minisitiri w'ubutabera Dr Ugirashebuja Emmanuel yari yanyuzwe
Bageze aho bacinya akadiho
Ni umunsi utazibagirana kuri iri huriro ry'abagore ribereye bwa mbere muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .