Umuburo ku bantu batunze imbwa: Hari uwo yarigase arapfa

Yanditswe na Iradukunda Serge
Kuya 27 Ugushyingo 2019 saa 01:06
Yasuwe :
0 0

Capnocytophaga ni imwe muri mikorobe ziba mu kanwa k’imbwa n’injangwe zikaba zishobora kuyanduza umuntu igihe zimurumye cyangwa zimurigase ndetse bikaba byamuviramo n’urupfu.

Ibi nibyo byabaye ku mugabo w’imyaka 63 waguye mu bitaro bya Bremen mu Budage nyuma yo kurigatwa n’imbwa ye.

Mu itangazo ryashyizwe hanze n’ibi bitaro, rivuga ko uyu mugabo yanduye iyi mikorobe kubera kurigatwa n’imbwa ye gusa mu gihe abenshi bakunze kuyandura iyo barumwe nazo.

Itangazo rigira riti “Yakozweho ndetse arigatwa n’imbwa ye ariko ntiyigeze imuruma cyangwa ngo imukomeretse”.

Muri iri tangazo ibitaro byaburiye abandi bantu bose batunze inyamaswa nk’imbwa n’injagwe kwigengesera ndetse bakihutira kujya kwa muganga igihe babonye bafite ibimenyetso nk’ibicurane kandi bazi neza ko inyamaswa zabo zabarigase.

Urupfu rw’uyu mugabo ruje rukurikira umugabo n’umugore bo muri Leta Zunze ubumwe za Amerika bari baherutse gucibwa ibice by’umubiri nyuma y’uko nabo bari barigaswe n’imbwa zabo.

Umwarimu muri kaminuza ya Pennyslivania akaba n’umuganga w’amatungo, Dr. Stephen Cole yavuze ko imbwa n’injagwe bishobora kubana n’iyo mikorobe ya ‘Capnocytophaga’ ntigire icyo izitwara ariko ikagira ingaruka zikomeye ku muntu zirimo n’urupfu.

Ati “Ni udukoko dusanzwe tuba mu kanwa k’imbwa ndetse mu busanzwe nta kibazo dutera. Gusa iyo turi ahantu hatari ahanyaho, mu gihe cyitari nyacyo ku muntu ufite ikibazo dushobora kumutera uburwayi nubwo biba gake” .

N’ubwo ubushakashatsi bugaragaza ko ibyago byo kwandura utu dukoko bingana n’ibyo gukubitwa n’inkuba, bunagaragaza ko ikunda kwibasira abantu ubwirinzi bw’umubiri wabo buri hasi nk’ababana n’agakoko gatera Sida, abarwayi ba kanseri n’abanywi b’inzoga.

Igihe umuntu yanduye ashobora kugira ibimenyetso birimo kuruka, kugira umuriro, gucibwamo ,kubabara mu ngingo no kuribwa umutwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza