Ukuri gutangaje ku mibereho n’ubuzima bwa ’Yezu’

Yanditswe na Iradukunda Serge
Kuya 21 Nyakanga 2019 saa 02:00
Yasuwe :
0 0

Amakuru yerekeye kuri Yezu cyangwa Yesu bitewe n’imyemerere, tuyakura mu byanditswe byera nubwo Yohani atubwira ko ari igice gito cy’ibyo yakoze byose.

Nubwo ibyanditswe bidatanga amakuru arambuye ku buzima bwa Yezu, bitanga nibura umurongo umuntu yagenderaho ashaka kumenya byinshi bimwerekeyeho.

Hifashishijwe ibyanditswe byera IGIHE yaguteguriye ibintu ushobora kuba utaramenye kuri Yezu.

Yezu yahawe izina na Malayika

Bimenyerewe ko ababyeyi ari bo bagena uko umwana wabo azitwa ariko Umubyeyi wa Yezu ari we Mariya nta ruhare yagize kugira ngo yitwe ‘Yezu’ ahubwo iri zina yarihawe na Malayika.

Malayika aramubwira ati “wigira ubwoba Mariya, kuko uhiriwe ku Mana, Kandi dore uzasama inda, uzabyara umuhungu uzamwite Yesu”.

Izina rya Kabiri rya Yezu ntago ari Kirisitu (Christ)

Akenshi umuntu ntashobora kuvuga Yezu atongeyeho Kirisitu bigatuma hari bamwe bakeka ko ari izina rye rya kabiri nyamara siko biri.

Mu kinyejana cya mbere abanya-Palestine ntago bagiraga amazina ya kabiri, bifashishaga amazina y’ababyeyi babo kugira ngo umuntu amenye uwo ashatse kuvuga neza.

Bati “Uyu si we Yesu mwene Yosefu, ntituzi se na nyina? Ni iki gituma avuga ko yavuye mu ijuru?” (Yohana 6:42)

Izina Christ rituruka mu ijambo ry’Ikigereki ‘Christos’ bivuze uwasizwe amavuta.

Yezu bishoboka ko atavutse kuwa 25 Ukuboza

Hafi Isi yose yizihiza Noheli cyangwa ivuka rya Yezu kuwa 25 Ukuboza, ariko se iki nicyo gihe yavukiye koko? Birashoboka ko atari ukuri.

Abayobozi ba cyera b’abakirisitu nka Hippolytus na John Chrysostom nibo bagize uruhare ngo hajyeho iyi taliki nk’umunsi wa noheli, ndetse abantu baza kubyemera nk’ukuri.

Abahanga bavuga ko bitari gushoboka ko abashumba baba bari hanze mu ijoro n’intama zabo kuko Ukuboza ari ukwezi kugaragaramo ubukonje cyane mu bice Yezu yavukiyemo, kandi hagendewe kugihe Yohani Umubatiza yavukiye abenshi bavuga ko Yezu yavutse ari mu rugaryi.

Yezu yari afite abavandimwe (abahungu n’abakobwa)

Ibyanditswe byera bitubwira ko Yezu yari afite abavandimwe benshi ndetse harimo nabashiki be.

“Akivugana n’abantu, nyina na bene se bari bahagaze hanze, bashaka kuvugana nawe” (Matayo 12:46).

Mu ivanjiri ya matayo ho hari naho bavuga amazina yabo “Mbese harya si we wa mwana w’umubaji? Nyina ntiyitwa Mariya, na bene se si Yakobo na Yosefu na Simoni na Yuda?, Bashiki be nabo ntiduturanye? Mbese ibyo byose yabikuye he?”.

Yezu na Yohani Umubatiza bari bafitanye isano

Mariya nyina wa Yezu na Elizabeti nyina wa Yohana Umubatiza bari ababyara.

” Kandi dore mwene wanyu Elizabeti na we afite inda y’umuhungu yo mu zabukuru, uwitwaga ingumba none uku ni ukwezi kwe kwa gatandatu”(Luka 1:36).

Ukurikije ibi byanditse muri Luka ubona ko Yohani Umubatiza yarushaka Yezu amezi atandatu.”

Yezu ntiyari afite ubwiza n’igihagararo bishamaje

Abenshi iyo bumva Yezu bumva uko yasaga bishobora kuba byaramutandukanyaga n’abandi, nta byinshi bizwi kuko Yezu yasaga, umuhanuzi Yesaya yagize icyo abivugaho.

“Kuko yakuriye imbere ye nk’ikigejigeji, nk’igishyitsi cyumburira mu butaka bwumye, ntiyari afite ishusho nziza cyangwa igikundiro, kandi ubwo twamubonaga ntiyari afite ubwiza bwatuma tumwifuza”.

Ibyahumetswe kandi bitubwira ko igihe Yuda yagambaniraga Yezu byasabye ko amusoma kugira ngo bamenye uwo ari we, bikaba bigaragaza ko mu gihagararo no mu bwiza ntaho yari atandukaniye n’abandi.

Ndetse azuka Mariya Magadalena yamwitiranyije n’umurinzi w’agashyamba.

“Amaze kuvuga atyo arakebuka, abona Yezu ahagaze ariko ntiyamenya ko ariwe, Yezu aramubaza ati “Mugore urarizwa n’iki? Urashaka nde?” yibwira ko ari umurinzi w’agashyamba aramubwira ati “Mutware niba ari wowe umujyanye ahandi, mbwira aho umushyize nanjye mukureyo” (Yohana 20: 14-15)
Yezu nawe yagize amarangamutima yo gutangara

Umuco wo gutangara abenshi bakeka ko wihariwe na muntu ariko Bibiliya igaragaza ko umwana w’Imana Yezu yanyuzagamo nawe akagira ibimutangaza.

“Yesu abyumvise aramutangarira, ahindukirira abantu bamukurikiye ati “Ndababwira yuko ntabwo nari nabona kwizera kungana gutya, habe no mu Bisirayeli.”(Luka 7:9)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza