00:00:00 IGIHE NETWORK KN KINYARWANDA EN ENGLISH FR FRANCAIS

Uko wahangana no kuzomerwa (Cyber bullying) bisigaye byeze kuri Internet

Yanditswe na Balinda Yvette
Kuya 14 September 2022 saa 01:45
Yasuwe :

Uko Isi itera imbere n’ikoreshwa ry’ikoranabuhanga ryiyongera umunsi ku munsi, imbuga nkoranyambaga zikomeza kwiyongera ari nako ibyaha bikorerwaho cyangwa amakosa birushaho kwiyongera.

Ikigo cy’ubushakashatsi (PEW) mu 2021, cyagaragaje ko abagera kuri 37% bari hagati y’imyaka 12 na 17 bakorewe ihutazwa rikorerwa kuri internet bagakomerwa, aho 30% byababayeho inshuro irenze imwe, na 40% bari mu myaka y’ubukure.

Ibi bikaba bikorwa hifashishijwe ibikoresho by’ikoranabuhanga hoherezwa ubutumwa bukomeretsa, gukwirakwiza amakuru yihariye ku muntu, gukwirakwiza ibihuha n’ibindi bisebya mu ruhame.

Biragoye ko wakirinda ihutaza rikorerwa kuri internet (Cyber bullying) kuko uko umara umwanya munini ukoresha imbuga nkoranyambaga, hari ubwo rimwe na rimwe ugira ibyo utemeranya n’abandi ku byatambutseho.

Ikibazo gikomeye ni uko akenshi kutabyumva kimwe, birangira bifashe indi ntera abantu bakibasira abo batumva kimwe ibitekereza, bakabaserereza ku buryo bishobora no kubagiraho ingaruka mu mitekerereze.

Nubwo bigoye kugenzura uko abo muhurira kuri Internet bakira ibyo ubabwira, ushobora kugenzura uko ukoresha imbuga nkoranyambaga ku buryo ugabanya uburemere bw’ibyo abagurikira bashobora kukubwira bikagukomeretsa ndetse n’uko ushobora kwitwara mu gihe byabaye.

Kugenzura ibyo ushyira ku mbuga nkoranyambaga: Si byiza ko abagukurikirana ubaha amakuru bwite akwerekeyeho kuko akenshi ariho hava ibyo kukwibasira.Ikindi ni ukubanza gutekereza ku buryo abaza kubona ibyo washyize ku mbuga nkoranyambaga baratekereza kubyo wabahaye mbere yo kubisohora. Bituma ubanza gutekereza kabiri mbere yo kubishyiraho.

Kudafasha abibasira abandi: Byashoboka ko atari wowe uri guhutazwa ariko ntabwo uba ukwiriye gutiza umurindi abari kwibasira abandi ngo uvuge amagambo akomeretsa abibasiwe cyangwa se ngo ukwirakwize ibyo bavugwaho.

Kwirinda gusangiza amafoto ashobora kukugiraho ingaruka: Kuri imvugo ni uko nta foto, nta cyabaye. Nibyo kuko tugeze mu Isi y’ikoranabuhanga aho amashusho afite uruhare rukomeye mu buzima bwacu.

Icyakora, ni byiza kwitondera no kugenzura amafoto usangiza abagukurikira ku mbuga nkoranyambaga kuko ashobora kuba intandaro yo kwibasirwa. Ukwiriye kubanza kuyagenzura ukitega ibyo abantu bashobora kuyavugaho, wakumva witeguye kubyakira ukabona kuyakwirakwiza.

Kumenya imyumvire y’abagukurikiye: Kubanza kumenya icyiciro cy’abakunze kugukurikira ku mbuga nkoranyambaga, bizakurinda kuba wahutazwa kuko uzamenya ibyo ubabwira n’ibyo utababwira.

Kugabanya umwanya ukoresha ku mbugankoranyambaga: Ntacyo bitwaye kuba waruhuka gukoresha imbuga nkoranyambaga igihe runaka, ugakoresha ubundi buryo mu kuvugana n’inshuti zawe.

Kudasubiza ubutumwa bukwibasira: Gusubiza ntacyo bifasha uretse gutiza umurindi abari kukwibasira, ukaba wanasubizanya uburakari bikabatera kumva ko bageze ku ntsinzi. Ni byiza ko rimwe na rimwe wirinda gushyogozanya n’abakwibasiye kuko bituma bumva bafite imbaraga.

Gucana umubano nabo (Block): Konti yawe ku mbuga nkoranyambaga ni nk’urugo rwawe. Niba ubona hari abaza kugutukira cyangwa kugutesha umutwe kubyo watangaje, aho kugukomeretsa wakwitandukanya nabo ukabafungira uburenganzira bwo kugukurikira (Block).

Ihutaza rikorerwa kuri Internet rihungabanya ubuzima bwo mu mutwe bwa benshi bikaba byavamo no kwiyahura.

Ubushakashatsi bwasohotse mu kinyamakuru cyitwa Journal of Health Economics mu 2017, bwavugaga ko ihutazwa ryo kuri Internet ryongereye 8.7% ku mibare y’abiyahura.

Kubwirwa nabi kuri Internet bishobora gutera bamwe kwiyahura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .