00:00:00 IGIHE NETWORK KN KINYARWANDA EN ENGLISH FR FRANCAIS

Uko ‘Los Zetas’, abasirikare badasanzwe bahindutse amabandi kabuhariwe

Yanditswe na Muyisenge Jean Felix
Kuya 6 July 2022 saa 02:22
Yasuwe :

Mu ntangiriro z’imyaka ya 1990 mu kigo cya gisirikare cya Fort Bragg giherereye muri Leta ya North Carolina yo muri Leta Zunze Ubumwe za Amerika, haberaga amahugurwa n’imyitozo ya gisirikare yahabwaga zimwe mu ngabo zo mu mutwe udasanzwe mu gisirikare cya Mexique, uzwi nka Airmobile Special Forces Group (GAFE).

Aba basikare bahabwaga imyitozo idasanzwe yo gukoresha intwaro zoroshye kugeza ku ziremereye. Batojwe kandi amasomo yo gusoma amakarita, itumanaho n’andi mayeri yose akoreshwa n’abasirikare badasanzwe nk’uko Craig Deare, wahoze ari umwe mu bayobozi ba special forces ubu akaba ari umwarimu muri Kaminuza Nkuru ya Gisirikare muri Amerika abitangaza.

Ibi byose babitozwaga kugira ngo bajye guhangana n’udutsiko tw’amabandi dukora ibyaha bitandukanye nko kugurisha ibiyobwabwenge, gucuruza abantu, ubujura, ubwicanyi n’ibindi bitandukanye muri Mexique.

Byaje kurangira aba basirikare basezeye igisirikare cya Mexique baza gushinga umutwe w’amabandi ruharwa wahawe izina rya ‘Los Zetas.’

Los Zetas n’ijambo ryo mu rurimi rw’icy’Espagnol risobanuye “abantu bitwa Z”. Iyi nyuguti ikunda gukoreshwa cyane n’abasirikare ba Mexique.

Aka gatsiko katangiye mu 1997 gatangira gakora nk’igisirikare cy’umutwe ucuruza ibiyobyabwenge wa Gulf Cartel wayoboraga igice kinini cy’isoko ryo gucuruza ibiyobyabwenge muri Mexique uhereye mu gace ka Tamaulipas , mu majyaruguru ashyira uburasirazuba bwa Mexique.

Osiel Cárdenas Guillén wari mu bayobozi ba Gulf Cartel ni we wahaye ikiraka uyu mutwe w’abasirikare 30 bahoze mu ngabo za Leta wari uyobowe na Lt Arturo Guzmán Decena. Aha niho hatangiriye Los Zetas.

Uyu mutwe wari ufite inshingano zo kurinda umutekano w’ibiyobyabwenge, kubigeza ku babicuruza no gukura mu nzira uwo ari we wese wageragezaga kwitambika inyungu za Gulf Cartel.

Muri 2002, Decena yaje kwicwa asimburwa na Heriberto Lazcano witwaga El Lazco cyangwa Z3.

Muri 2003, Cárdenas Guillén wayoboraga Gulf Cartel akaba ari na we wahaye akazi Los Zetas bwa mbere, yaje gutabwa muri yombi bituma Los Zetas yinjira cyane mu bikorwa bya buri munsi bya Gulf cartel.

Los Zetas yanagize uruhare rukomeye mu guhashya umutwe bari bahanganye mu bucuruzi bw’ibiyobyabwenge wa Sinaloa Cartel ubwo wageragezaga kubambura bimwe mu bice bigaruriye mu mujyi wa Nuevo Laredo wari ingenzi mu kubika ikiyobyabwenge cya cocaine no kugikwirakwiza muri Amerika.

Ibi bikorwa bagendaga bakora byagiye bibasigira isura y’umutwe urangwa n’urugomo n’ubugome ndengakamere.

Uyu mutwe kandi warenze ku nshingano zo kurinda umutekano no gukora nk’igisirikare cya Cartel, ahubwo batangira gucuruza intwaro mu buryo bwa magendu, ubwambuzi no gushimuta abantu.

Los Zetas n’indi mitwe y’aba Cartel bagize uruhare mu bujura bwa peteroli ifite agaciro k’arenga miliyari 1$ mu kigo cy’igihugu gicukura ibikomoka kuri peteroli, Premex.

Mu 2010 Los Zetas yitandukanyije na Gulf Cartel, bahinduka umutwe wigenga. Ni mu gihe bamwe mu bayobozi bakuru b’uyu mutwe bari bamaze gufungwa abandi baricwa.

Uyu mutwe wahise utangira kwinjiza abanyamuryango bashya harimo n’abahoze mu gisirikare kidasanzwe cya Guatemala.

Kwitandukanya na Gulf Cartel ntibyigeze biwuca intege kubera ko wakomeje guhanganira isoko n’indi mitwe ikomeye, ubasha no kwigarurira imwe mu mihanda inyuzwamo ibiyobyabwenge.

Uyu mutwe kandi wagize ukuboko gukomeye muri Guatemela bitewe ahanini n’uburyo watanganga ruswa ku gipolisi cy’iki gihugu kugira ngo kijye kibaha amakuru.

Ibikorwa by’ubugome ndengakamere by’uyu mutwe byaciye igikuba muri Mexique bituma indi mitwe ya Cartel itangira kubashinja kutagendera ku mahame y’imyitwarire agenga umwuga w’ubucuruzi bw’ibiyobyabwenge abuza kwica abagore n’abana.

Kimwe mu bikorwa byagarutsweho cyane ni nko muri Kanama 2010 ubwo barasaga abakozi b’abimukira 72 bakabajugunya mu bimoteri biherereye muri leta ya Tamaulipas, ihana imbibi na Amerika.

Al Jazeera igaragaza ko uyu mutwe wagiye uhatira abagore b’abimukira mu buraya, gushyira hanze amashusho baca abantu imitwe ibice by’imibiri bakabijugunya ku gasozi, gucuruza ibice by’imibiri y’abantu no kwicira abanyeshuri mu birori bizwi nka ‘house parties’.

Los Zetas iracyakomeje gukora n’ubwo abayobozi bawukuriye bakomeje gutabwa muri yombi n’inzego z’umutekano mu myaka 10 ishize. Uheruka ni Jose Maria Guizar Valencia wafashwe muri 2018.

Imitwe y’aba cartel yinjiza hagati ya miliyari 19$ na miliyari 29$ mu bucuruzi bw’ibiyobyabwenge byinjizwa muri Leta Zunze Ubumwe za Amerika buri mwaka.

Mu Ukuboza 2006 uwari perezida wa Mexique, Felipe Calderon yatangije intambara yeruye ku mitwe icuruza ibiyobyabwenge, maze yohereza abasirikare mu bice byose by’igihugu ngo barandure burundu utu dutsiko tw’amabandi. Iyi ntambara yasize abayobozi bakomeye b’iyi mitwe batawe muri yombi harimo na Joaquin "El Chapo" Guzman wayoboraga Sinaloa Cartel.

Ubushakashatsi bwakozwe muri 2020 na Congressional Research Service (CRS) bwemeza ko hamaze kuba impfu ziri hagati y’ibihumbi 125 n’ibihumbi 150 zifitanye isano n’iyi mitwe y’amabandi guhera muri 2006 kugera muri 2018.

Los Zetas yatangijwe n'abahoze ari abasirikare ba Mexique
Umwe mu bari abayobozi ba Los Zetas, Omar Trevino Morales(Z-43) yatawe muri yombi muri 2015
Los Zetas izwiho kugira urugomo ndengakamere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .