Ubushakashatsi bwagaragaje ko gushushanya amaso ku nka bizirinda kuribwa n’inyamaswa

Yanditswe na Ndahayo Emmanuel
Kuya 18 Kanama 2020 saa 07:51
Yasuwe :
0 0

Ubushakashatsi bwagaragaje ko gushushanya amaso y’inka ku gice cy’inyuma cyayo, ari uburyo bwiza bwo kuzirinda kuribwa n’inyamaswa z’inkazi zizibasira cyane ku mugabane wa Afurika.

Ikibazo cy’amatungo aribwa n’inyamaswa z’inkazi nk’intare n’ingwe, cyakomeje gukurura ukwibasirwa kw’inyamaswa ku mugabane wa Afurika, aho izo nyamaswa zirya amatungo y’abaturage, nabo bakazihimuraho bazica.

Amakimbirane nk’aya yumvikanye mu bihugu nka Botswana, Namibia, Kenya na Ethiopia, aho inyamaswa z’inkazi zishe abaturage n’amatungo yabo, nabo bakazicisha uburozi no kuzirasa.

Imiryango irengera ibidukikije n’uburenganzira bw’inyamaswa, yakomeje gusaba ko hagira igikorwa mu gukemura ibyo bibazo hagati y’abantu n’inyamaswa z’inkazi.

Iyi miryango ivuga ko bitatu bya kane by’amoko 31 y’inyamaswa z’inkazi biri kugabanuka mu bice hafi ya byose by’Isi. Iri gabanuka rigira ingaruka mbi ku rusobe rw’ibinyabuzima, kuko izi nyamaswa z’inkazi zigira uruhare mu gutuma habaho iringaniza ry’urusobe rw’ibinyabuzima muri rusange.

Leta zagiye zifata ingamba zitandukanye zirimo kubaka inkuta n’inzitiro zibuza abantu n’inyamaswa gukomeza guhura. Ikibazo cy’ubu buryo ni uko buhenze, kandi bukagira ingaruka mbi ku nyamaswa nini kuko zidakura ku kigero ngenzi zazo zo mu ishyamba zikuraho.

Ibi ni byo byatumye ikigo gishinzwe kurengera uburenganzira bw’inyamaswa nini muri Botswana, gitangiza ubushakashatsi bugamije kurebera hamwe icyakorwa mu rwego rwo kurengera ubusugire bw’inyamaswa ndetse n’ubw’abaturage bazituriye.

Ni ubushakashatsi bumaze imyaka ine, aho bwagaragaje ko gushushanya amaso y’inka ku gice cyayo cy’inyuma, bishobora kugira uruhare mu kuzirinda inyamaswa z’inkazi, kuko ziba zikanga ko ziri kurebwa.

Ni ubushakashatsi bwakorewe ku nka 2 061 zigabanyije mu mikumbi 14, aho bafashe kimwe cya gatatu cyazo bashyiraho ikirango kimeze nk’amaso yazo ahagana ku gice cy’inyuma, mbere yo kuzohereza ziri kumwe z’izindi mu bice bikunze kubamo inyamaswa zihiga cyane.

Mu nka 683 zifite ikirango zoherejwe mu ishyamba, nta n’imwe yariwe n’inyamaswa z’inkazi, mu gihe inka 15 muri 835 zidafite ikirango zariwe. Inka enye muri 543 zifite ikirango ku ruhande rumwe na zo zarariwe.

Ubu bushakashatsi bugaragaza ko inka zifite ikirango zo mu ishyo rimwe n’izidafite ikirango zitariwe, mu gihe ngenzi zazo zo zariwe.

Ubushakashatsi butanga inama zo gukoresha ubu buryo mu rwego rwo kwirinda amakimbirane hagati y’aborozi n’inyamaswa z’inkazi n’ingaruka ibi bikorwa bishobora kugira zirimo iyicwa ry’izo nyamaswa kandi zifatiye runini urusobe rw’ibinyabuzima.

Gushyira ikimenyetso cy'amaso ku gice cy'inyuma cy'inka bizirinda kuribwa n'inyamaswa n'inkazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .