00:00:00 IGIHE NETWORK KN KINYARWANDA EN ENGLISH FR FRANCAIS

Toxophobia, indwara yo gutinya no guhora wikanga amarozi

Yanditswe na Idukunda Kayihura Emma Sabine
Kuya 9 Mutarama 2023 saa 02:39
Yasuwe :

Bishobora kuba bikubaho ukumva ufite ubwoba budasanzwe bwo gutinya uburozi, ku buryo bunatuma udashobora kugira ibyo urya cyangwa unywa bitari ibyo witeguriye, kuko urwaye iyi ndwara ashobora no kwanga amafunguro yateguwe n’umuntu asanzwe yizera ariko agatinya ko yamuroga.

Bamwe mu Bemeramana bo bizera ko hatanabaho uburozi bwakwica umuntu binyuze mu biribwa cyangwa mu binyobwa gusa, ahubwo ko hari n’ubwo bakoherereza bukakwica, umuntu wabikoze ari kure yawe nko mu kindi gihugu.

Ibi bituma benshi mu basenga bahanurirwa ko Imana ibarinze kurogwa, udafite umutima ukomeye agahora yikanga ko ikibazo agize cyose cyangwa uburwayi bwaje mu buzima bwe bwaba bwaturutse ku marozi.

Niba ibyo byiyumviro wumva bidasanzwe muri wowe ukumva ugize ubwoba bwinshi no guhora wikanga kurogwa, birashoboka ko byamaze kurenga ubwoba busanzwe bigahinduka uburwayi (Toxophobia/toxicophobia/toxiphobia).

Ubusanzwe, indwara y’ubwoba (Phobia), yibasira abantu mu buryo butandukanye bitewe n’ibyabaye ku muntu uyifite, ikagira amoko menshi bitewe n’icyakanze umuntu.

Phobia ifatwa nk’ikibazo cyo mu mutwe, aho umuntu uyirwaye agira ubwoba bwo gutinya ikintu runaka, yakibona akiyumvamo ubwoba atasobanura aho buturutse, ariko bukaba ubwoba budasanzwe ku buryo ubona ko ari umwihariko ku muntu ubufite.

Uyirwaye iyo hari ikidasanzwe cyamubayeho kikamutera ubwoba bwinshi, bituma iyo abonye ibintu bisa na cya kindi cyamukanze, byongera kumutera ubwoba budasanzwe bikamusubiza inyuma mu mitekerereze.

Mu gihe umuntu ufite ubwoba busanzwe ashobora kugaragaza ibimenyetso birimo kubira ibyuya, urwaye phobia we agira no gutera kudasanzwe k’umutima ndetse ukaba wanahagarara.

Mu moko asaga 400 y’indwara y’ubwoba ariho, tugiye kukubwira icyo abahanga bavuga ku ndwara y’ubwoba bwo gutinya uburozi (Toxophobia).

Umushakashatsi ukomoka mu Buhinde, wandika n’inkuru zifite aho zihuriye n’ubuvuzi, Dr Hina Firdous, yatangarije urubuga Lybrate.com ko Toxophobia ishobora guterwa n’ibintu bitandukanye birimo intekerezo umuntu yishyizemo zo gutinya uburozi akabiterwa n’ibiganiro yagiye yumva bibwerekeyeho no gutura mu gace gafite amateka mabi afite aho ahuriye n’amarozi.

Uru rubuga rugaragaza ko ibindi byiciro byibasirwa n’iyi ndwara ari abana bari mu myaka 10 cyangwa munsi yayo, abantu bagira amarangamutima ahungabana vuba bitewe n’ibyo bumvise cyangwa babonye.

Hari no kuba umuntu yararozwe akazahazwa n’uburozi ariko nyuma agakira no kubona uwo akunda yicwa n’uburozi.

Mu biranga umuntu urwaye Toxophobia harimo kwishyira mu kato agahunga abantu kuko ahora yikanga ko bamuroga, kuganzwa kenshi n’umujinya we, kugira amarangamutima ahindagurika mu buryo budasanzwe, kugira ubwoba atazi aho buturutse no guhumeka insigane.

Uburyo bwagufasha gutandukana n’indwara ya Toxophobia cyangwa Toxicophobia, ni ukugana abanjyanama mu mitekerereze bakakuganiriza.

Urubuga Science Trends rugaragaza ko nubwo intwaro y’uburozi itifashishwa cyane muri Leta Zunze Ubumwe za Amerika, ariko ko ahakusanyirizwa amakuru afite aho ahuriye n’uburozi (US Poison Control Centers), hagaragaza ko mu mwaka wa 2016 hagaragaye ibirego bisaga miliyoni ebyiri bifite aho bihuriye n’amarozi.

Abantu 5,3% bagizweho ingaruka na byo, abarozwe bibaviramo kugagara igice cy’umubiri no gupfa.

Umushakashatsi ukomoka mu Buhinde, wandika n’inkuru zifite aho zihuriye n’ubuvuzi, Dr Hina Firdous

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .