00:00:00 IGIHE NETWORK KN KINYARWANDA EN ENGLISH FR FRANCAIS

Ruhango: Umusore ujya mu mihango aratabaza inzego z’ubuzima

Yanditswe na Prudence Kwizera
Kuya 4 Kanama 2021 saa 02:47
Yasuwe :
0 0

Mu Karere ka Ruhango hari umusore w’imyaka 19 y’amavuko ujya mu mihango ariko ntibashe gusohoka, aribaza iherezo ry’ubuzima bwe kuko yakuze azi ko ari umuhungu ariko nyuma abwirwa n’abaganga ko afite imiterere nk’iy’abagore.

Uwo musore utuye mu Murenge wa Kinihira, yamaze kugira amabere nk’ayabakobwa kandi abanganga bamubwiye ko yifitemo nyababyeyi gusa we avuga ko yakuze yumva ari umuhungu.

Uyu musore utarangije kwiga n’amashuri abanza avuga ko nyuma yo kubona atangiye kumera amabere nk’abakobwa yarebye neza igitsina cye na cyo abona kitameze neza nk’icy’abahungu.

Ati “Mfite ikibazo cyo kudasobanuka neza hasi [ku gitsina] mfite igitsina nk’icy’abahungu ariko ntabwo gisobanutse neza. Nifuza ko bamvuza kuko birambangamiye kuba ntazi icyo ndi cyo, ntari umuhungu cyangwa umukobwa.”

Nubwo afite ijwi n’igihagararo nk’iby’abasore, aganira na TV1 yavuze ko ahangayikishijwe n’ubuzima bwe kuko buri kwezi ajya mu mihango nk’abakobwa ikabura aho inyura ngo isohoke, akarwara akaremba akajyanwa kwa muganga.

Ati “Ndarwara nkumva mu nda harimo ibintu by’amazi nkajya kwa muganga bakantera imiti ingabanyiriza ububabare.”

Nyina umubyara avuga ko nta bushobozi afite bwo kumuvuza kandi iyo abugira aba yaravuwe akiri muto.

Ati “Namubyariye mu rugo njya ku Bitaro neretse abaganga bayobebwa ibyo ari ibyo. Hari mu 2002 ngiye ku Bitaro bya Gitwe banca miliyoni zirindwi z’amafaranga y’u Rwanda, mbona ntayo nabona ndabireka.”

Icyo gihe kwa muganga bamubwiye ko aramutse abonye ayo mafaranga bamubaga akagira igitsina nk’icy’abakobwa.

Kubera ubushobozi buke iyo amujyanye kwa muganga buri kwezi yagiye mu mihango, yishyurirwa na leta.

Avuga ko mbere gato y’uko Covid-19 igera mu Rwanda, ibitaro bya Gitwe byohereje uwo musore ku Bitaro bya Kaminuza bya Kigali, CHUK, kugira ngo ahabwe ubuvuzi. Gusa ngo basanze umuganga ushobora kumuvura adahari barataha. Aracyafite icyizere ko bazongera guhamagarwa akavurwa.

Ati “Coronavirus yateye turi muri CHUK duhita dutega turataha birahagarara byose. Icyifuzo mfite ni uko bamfasha akavurwa.”

Kugeza ubu uwo musore avuga ko kutamenya igitsina cye bimutera ipfunwe ntiyisanzure mu bandi kandi abangamiwe, agasaba ko Leta yamufasha akavurwa.

Dr Iradukunda Seraphin ukuriye abaganga mu Bitaro by’Akarere bya Gitwe, yabwiye IGIHE ko ikibazo uwo musore yagize gishobora kubaho iyo umwana akiri mu nda ya nyina bitewe n’imisemburo, hakabaho ikosa igitsina ntigikore neza.

Yasobanuye ko nubwo bitabaho kenshi, umuntu ashobora kugira igitsina cy’abahungu ariko akagira imisemburo myinshi y’abagore imutera kugira amabere n’ibindi nka nyababyeyi.

Yavuze ko uwo musore bamwakiriye bamuha ubuvuzi bw’ibanze bwo kumugabanyiriza ububabare igihe yagiye mu mihango, bafata umwanzuro wo kumwohereza ku Bitaro bya Kaminuza bya Kigali kugira ngo bamufashe.

Ati “Twebwe twamuhaye ubuvuzi bw’ibanze bwo kumugabanyiriza ububabare. Twamwohereje kuri CHUK kugira ngo bamufashe nibiba ngombwa babe bamwohereza no hanze y’igihugu kugira ngo barebe uko bamubaga bakamuha igitsina nk’icy’abagore.

Yagiriye inama umubyeyi we yo gukomeza kubahiriza gahunda yahawe na CHUK kugira ngo umwana we azafashwe abe yavurwa.

Dr Iradukunda na we asanga ikibazo cy’uwo musore cyihutirwa kugira ngo avurwe kuko ababaye kandi abangamiwe cyane.

Ibiro by'Akarere ka Ruhango uyu musore abarizwamo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .