00:00:00 IGIHE NETWORK KN KINYARWANDA EN ENGLISH FR FRANCAIS

Nyabihu: Baterwa ipfunwe n’izina ‘Kabatwa’ ryiswe Umurenge wabo bagasaba ko ryahindurwa

Yanditswe na Claude Bazatsinda
Kuya 17 June 2022 saa 12:58
Yasuwe :

Bamwe mu baturage bo mu Murenge wa Kabatwa mu Karere ka Nyabihu, bavuga ko batewe ipfunwe n’izina ryiswe umurenge wabo kubera ko ryaturutse ku mateka mabi, bagasaba ko ryahindurwa hakitwa Kalisimbi nk’ahantu habereye ubukerarugendo.

Umurenge wa Kabatwa ni umwe mu mirenge 12 igize Akarere ka Nyabihu ukora ku Kirunga cya Kalisimbi, ukorerwamo ibikorwa byiganjemo ubuhinzi n’ubworozi ndetse n’ubucuruzi ndetse hagakorerwa n’ubukerarugendo ku bantu basura ikirunga gisumba ibindi mu Rwanda.

Nubwo abaturage bo muri uwo Murenge baganiriye na IGIHE batazi neza umwaka iri zina rya Kabatwa ryatangiriye, bahuriza ku mpamvu yatumye iri zina ribaho bakavuga ko byaturutse ku bo mu bwoko bw‘abatwa’ bakundaga gutegera abantu bavuye mu masoko ku musozi bakabambura, bituma aho hantu hatinywa ndetse hitwa Kabatwa biturutse kuri ako gasozi bitaga Akabatwa.

Sekaneza Faustin, umusaza w’imyaka 74, avuga ko atazi igihe izina Kabatwa ryatangiriye kuko yavutse arisanga ariko ko mu byo yabwiwe ari urugomo rwakorwaga n’abatwa bakundaga kwamburira abantu ku gasozi.

Yagize ati" Izina Kabatwa ni irya kera natwe twavutse turisanga, ubundi abakuru batubwiye ko ryaturutse kuri kariya gasozi, habaga urugomo n’ubwambuzi bwakorwaga n’abatwa bahategeraga abantu bavuye mu isoko za Gisenyi bakabambura ibyo bavuye kugurayo. Bicitse vuba ejobundi kuko natwe twahoze tuhatinya tukanyura mu zindi nzira.”

"Aho igihe kigeze ntabwo dukwiye kuba twitwa Kabatwa kuko ako gasozi kamburirwagaho kandi byararangiye ndetse n’abo batwa bakitiriwe ntabwo bigeze bagaturaho ahubwo baturukaga ku ishyamba bakaza kuhamburira abantu, bibaye byiza ababishinzwe bazariduhindurira."

Nyiramugisha Daphrose ufite imyaka 49, yagize ati" Izina rya Kabatwa twumva bariduhindurira kuko iyo tugiye ahandi hantu tugira isoni zo kurivuga. Nta hantu hakwiye kuba hakwitirirwa amoko kuko atakibaho mu Rwanda kandi ryaturutse no ku bintu bibi by’ubwambuzi bitakibaho muri iki gihe."

Umunyamabanga Nshingwabikorwa w’Umurenge wa Kabatwa, Kampire Georgette, yemeza ko bamaze kubona ubusabe bw’abo baturage busaba ko iryo zina rihinduka kandi bamaze kubushyikiriza Minisiteri y’Ubutegetsi bw’Igihugu bagitegereje igisubizo kandi na bo bumva ishingiro ryabwo.

Yagize ati" Nibyo koko ni izina riteye ipfunwe ku baturage b’uyu Murenge cyane ko nta batwa urebye baba muri uyu Murenge. Amateka atubwira ko hari umusaza witwaga Ruhabura kera bavugaga ko yari umutwa. Yajyaga ajya kuri kariya gasozi we n’abo mu muryango we bagatangira abantu bavuye guhaha mu gice bitaga ubugoyi bakazamukana ibiribwa n’abavuye kugurisha inka bakabambura."

"Ako gasozi rero bawita Akabatwa bifata iryo zina birakomeza bifata Umurenge wa Kabatwa. Muri rusange ni ako amateka atubwira ariko mu by’ukuri kugeza ubu abaturage bararyanze bifuza ko hakwitwa Umurenge wa Kalisimbi cyane ko Kalisimbi ari ikirunga kiri mu Murenge wa Kabatwa."

Kampire akomeza agira ati" Habayeho kwandikira Minaloc basaba ko iryo zina ryahinduka ariko kugeza ubu baracyategereje igisubizo, nikiboneka tuzakibagezaho.”

Ubusabe bw’abaturage bo mu Murenge wa Kabatwa bwo kuba bahindurirwa izina ry’umurenge ukitwa Kalisimbi bwatanzwe mu 2019.

Abaturage barifuza ko izina Kabatwa ryitiriwe umurenge muri Nyabihu ryahindurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .