Izi nkweto zo mu bwoko bwa sandali ziswe Air Zoom Hyperslide, zakozwe ku bufatanye bwa Nike na Hyperice, ikigo kizwi mu gukora ibikoresho bifasha abakinnyi kuruhura umubiri nyuma y’imyitozo.

Air Zoom Hyperslide zifite akuma kitwa Hyperslide Pod, gafatishwa rukuruzi mu nkweto. Ako kuma ni ko gatanga ubushyuhe no kunyeganyeza ibirenge, bigakora nka massage.

Uzambaye ashobora guhitamo kimwe mu byiciro bitatu by’ubushyuhe, bushobora kugera kuri dogere 47 Celsius. Ashobora kandi guhitamo kimwe mu byiciro bitatu bya massage, buri cyiciro kigakora mu gihe cy’iminota 15.

Ubushyuhe na massage bishobora kugenzurwa hifashishijwe button ziri kuri ako kuma cyangwa porogaramu ya Hyperice ikoreshwa muri telefone.

Mu gihe inkweto Nike na Hyperice baheruka gukora, Hyperboot, zishyushya kandi zigakanda ikirenge cyose n’akagombambari, Air Zoom Hyperslide zo zibanda cyane ku gice cyo hejuru cy’ikirenge.

Hasi yazo hakoreshejwe ikoranabuhanga rya Nike rya Air Zoom cushioning, rigamije korohereza ibirenge no gutuma uzambaye yumva ameze neza. Nike ivuga ko izi nkweto zagenewe abakinnyi, abakora imyitozo ngororamubiri n’abantu bamara umunsi wose bahagaze cyangwa bagenda.

Izi nkweto zizatangira kugurishwa ku wa 29 Nzeri 2026, ku giciro cya 249$, ni ukuvuga arenga ibihumbi 360 Frw.

Izi nkweto zizashyirwa ku isoko muri Nzeri uyu mwaka aho zizahera ku bihumbi 360 Frw

Ni inkweto zishobora gukorera massage umuntu uzambaye ku gice cyo hejuru ku kirenge