Ni ukuhe kuboko kwagenewe kwambarwaho isaha?

Yanditswe na Uwase Joie Clarisse
Kuya 22 Gashyantare 2020 saa 12:47
Yasuwe :
0 0

Muri iki gihe iterambere rikataje, telefoni ngendanwa zasimbuye byinshi mu bikoresho byifashishwa mu buzima bwa buri munsi, aho kuri ubu abantu benshi bakaba batacyumva akamaro ko kwambara isaha.

Nyamara ariko, isaha ntabwo yagasimbuwe muri ubwo buryo kuko ifite akamaro katari kamwe.

Umurimo wayo nyamukuru ni uwo gutangaza igihe n’itariki (bitewe n’ubwoko bw’isaha). Abakora imirimo itabemerera gutera akajisho kuri telefoni buri kanya uko babyifuza nk’abasirikare bari ku rugamba, abashinzwe kwakira abantu, abaganga, abayobora inama n’imyiherero bitandukanye n’abandi bakora mu nzego zinyuranye bazi neza ko telefoni idasimbura isaha yambarwa ku kuboko.

Usibye kugaragaza igihe, isaha ni umurimbo kandi yongerera agaciro imyambarire y’umuntu ikamugaragaza nk’uwifitiye icyizere.

Ku miryango y’abifite, isaha ni igikoresho cy’agaciro gishobora guhererekanywa nk’impano mu binyejana bitandukanye bigasa nk’uruhererekane rw’amateka.

Abantu benshi bambara isaha ku kuboko badakoresha mu buryo bwihuse. Ibi bigatuma abakoresha ukuboko kw’imoso bambara isaha ku kuboko kw’indyo naho abakoresha ukuboko kw’indyo na bo bakambara isaha ku kuboko kw’ibumoso.

Bitewe rero n’uko umubare munini w’abatuye Isi ari abakoresha ukuboko kw’indyo, kwambara isaha ku kuboko kw’ibumoso byabaye nk’ihame ku buryo akenshi iyo umuntu abonye mugenzi we utabigenje atyo, ashobora kwibwira ko yabicuritse.

Bamwe ndetse bavuga ko nk’uko impeta y’urushako yambarwa ku rutoki rwo ku kuboko kw’ibumoso ari nako byakagenze ku bambara isaha.

Impamvu imwe mu zisunikira abantu kwambara isaha ku kuboko badakoresha kenshi, ni uko birinda uwayambaye kuba yamubangamira nko mu gihe yandika cyangwa akoresha ukuboko kwe indi mirimo itandukanye.

Indi mpamvu kandi ngo ni uko kwambara isaha ku kuboko kudakoreshwa kenshi biyirinda gukoboka no kwangirika mu bundi buryo.

Muri iyi nkuru twifuje kureba impamvu usanga hariho bamwe mu bantu bakoresha ukuboko kw’indyo kandi nyamara bakanahitamo kuba ari ko kuboko bambaraho isaha.

Urubuga ‘Larsson Jennings’ ruvuga ko aba bantu bakunze kuba ari abantu bakora ibintu mu buryo bwihuse kandi mu mucyo, barangwa n’akanyamuneza kandi ngo biraborohera kubana na buri wese mu mahoro.

Ni abantu kandi bagira amarangamutima menshi, bakayagaragaza kandi ngo umubare munini bakunze kuba ari abantu b’abizerwa.

Icyo dukwiriye kumenya neza ni uko nta kuboko nyako guhari kwemejwe kwagenewe kwambarwaho isaha. Ukuboko uko waba ukoresha kose ni byiza kwambara isaha ahagushimishije, haguhaye amahoro, kandi hakubangukiye.

Hari n’abandi benshi babikora ari umurimbo kugira ngo baberwe bitewe n’imyambaro baba bambaye muri uwo mwanya cyangwa biganye abandi.

Ukuboko kose wakwambaraho isaha nta kosa ririmo
Nubwo ikoranabuhanga rikomeje gutera imbere, agaciro k'isaha karacyahari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza