Ni nde ukora inshingano z’umugore wa Perezida iyo ntawe agira?

Yanditswe na Iradukunda Serge
Kuya 11 Ugushyingo 2019 saa 12:17
Yasuwe :
0 0

Bisanzwe bimenyerewe ko iyo umukuru w’igihugu atowe umugore we yitwa ‘First Lady’ cyangwa ze umugore nimero ya mbere mu gihugu, mu bihugu bimwe agahabwa inshingano runaka cyangwa se akagaragara mu birori bitandukanye biba byateguwe haba mu gihugu no hanze.

Ariko se byagenda bite haramutse hatowe umugabo utagira umugore cyangwa agapfusha umugore akiri ku butegetsi, ni nde wafata inshingano umugore w’umukuru w’igihugu yakabaye akora. Iyi nkuru tugiye kuyisesengura twifashishije ingero zagiye zigaragara mu bihe byashize.

Inshingano z’umugore w’umukuru w’igihugu zigenda zitandukana bitewe n’igihugu, muri leta zunze ubumwe za Amerika umugore wa perezida aba afite inshingano zo kugenzura imirimo ikorerwa muri Perezidansi cyangwa ‘White House’, irimo n’ibirori bihabera ndetse no kuba hafi ya Perezida mu kazi kose ashinzwe. Iyi mirimo yose imusaba no kugira ikipe imufasha n’ibiro.

Iki kibazo cyagarutsweho cyane mu 2015 ubwo senateri Lindsey Graham, utarigeze umugore n’umwe mu buzima bwe, yimamarizaga guhagararira ishyaka ry’aba-républicains mu matora y’umukuru w’igihugu.

Ubwo yaganiraga n’ikinyamakuru ‘DailyMail’ asubiza kuri iki kibazo, yavuze ko ashobora gushaka umukorera izo nshingano manda ye yarangira akagenda.

Yagize ati “Mfite mushiki wanjye ashobora gukora ako kazi bibaye ngombwa kandi mfite inshuti nyinshi.”

Ibi ntibyigeze biba kuko Grahm atigeze ahagararira ishyaka rye cyangwa ngo atsindire kuyobora Leta Zunze Ubumwe za Amerika gusa niyo biza kuba ntibyari kuba ari ubwa mbere Leta Zunze Ubumwe za Amerika ziyobowe n’umugabo utagira umugore.

Thomas Jefferson wabaye perezida wa gatatu wa Leta Zunze Ubumwe za Amerika nyuma yo gupfusha umugore we yari yarasezeranyije ko atazigera ashaka undi, yahisemo ko inshingano z’umugore w’umukuru w’igihugu zifatwa n’umukobwa we Martha Randolph.

Martin Van Buren wayoboye Leta Zunze Ubumwe za Amerika kuva 1837 kugeza 1841 nyuma yo gupfusha umugore we Hannah Van Buren mu 1819, igihe yari amaze kuba perezida yahisemo ko umukazana we Angelica Singleton Van Buren ari we ukora inshingano z’umugore w’umukuru w’igihugu, mu gihe James Buchanan nawe wayoboye iki gihugu nta mugore we yahisemo mwishywa we Harriet Lane ngo abe ari we ukora izi nshingano z’umugore w’umukuru w’igihugu.

Mu 2014 nyuma y’uko Perezida w’u Burusiya Vladmir Puttin na Lyudmila Puttin biyemereye ko batandukanye batakibana nk’umugore n’umugabo, ubu iki gihugu kimaze imyaka 5 nta mugore w’umukuru w’igihugu cyangwa ukora inshingano ze kigira.

Perezida Trump n'umugore we Melania Trump bahagararanye na Putin
Aha ni mu 2018 ubwo Putin yaherezaga Brigitte Macron indabyo mu ruzinduko Perezida w'u Bufaransa n'umufasha we bari bagiriye mu Burusiya
Lindsey Graham yavuze ko iyo aza gutorerwa kuyobora Amerika yari gushaka umukorera inshingano z'umugore wa Perezida, manda ye yarangira akagenda.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza