Musanze: Inkomoko y’izina ry’ahitwa Ndabanyurahe ryaturutse kuri Bariyeri yakirwagaho imisoro

Yanditswe na N.Kubwimana Janvière
Kuya 20 Nyakanga 2020 saa 03:06
Yasuwe :
0 0

Agasantere ka Ndabanyurahe gaherereye mu Murenge wa Nyange, Akagari ka Kanyamwumba, ku muhanda werekeza mu Kinigi.Ni izina rikunze gutera amatsiko uryumvise wese kuko amazina ateye atyo atemenyerewe ku duce turanga ahantu mu Rwanda.

Abahatuye bavuga ko izina Ndabanyurahe ryaturutse kuri bariyeri yabagaho abajandarume bakaga imisoro abaturage bahacaga, abagiye kuhagera badafte ayo kwishyura bakaza babunza imitima.

Bavuga ko mbere hitwaga ku Kaseruzage, hacururizwa inzoga mu tuzu tubiri tw’ibirere twari duhari. Icyo gihe iyi Santere nta terambere ryari ryakahagera, bitandukanye n’uyu munsi uhagera ukahasanga inzu z’ubucuruzi, izo guturamo, umuriro w’amashanyarazi n’ibindi byatumye hahindura isura.

Abaturage bavuga ko kera habagaho itegeko ryo gutanga umusoro wa 400, kuri buri mugabo wabaga agejeje imyaka 18. Uwabaga afite abagore barenze umwe na we yarabasoreraga.

Muri Ndabanyurahe hashyizwe abajandarume batangiraga abaturage bahacaga bagiye mu isoko rya Ruhengeri, kuri ubu ricururizwamo ibiribwa rizwi nka Kariyeri, bakabaka imisoro.

Kaberuka Jean Damascène w’imyaka 78, ni umwe mu basaza batuye hafi y’iyi Santere. Yavuze ko icyo gihe byari bigoye gukwepa aba bajandarume babaga bari kuri iyi bariyeri, kuko ngo habaga umuhanda umwe rukumbi bacagamo bagiye mu mujyi wa Ruhengeri n’ahandi, bityo iyo babaga badafite inyemezabwishyu bishyuriyeho imisoro, byabasabaga guca mu bihuru kugira ngo babacike.

Yagize ati "Aha ubona hari bariyeri ikaze, yabaga iriho abajandarume bakaga imisoro. Umugabo wabaga agejeje ku myaka 18, yagombaga gusora amafaranga 400, yari menshi icyo gihe yabonaga umugabo agasiba undi.”

“Byari bigoye kubona indi nzira wacamo ngo ugere mu mujyi wa Ruhengeri kuko umuhanda wari umwe, wahuraga n’umuntu uhaciye ukamubaza uti "ba bapolisi barahari?"Nawe ati "urabanyurahe ko bahari "ugahita uca iy’ikigunda, bahita kuri Ndabanyurahe gutyo".

Nyirabirahure Mariam w’imyaka 61 na we yagize ati" Iri zina Ndabanyurahe ryahitiriwe nyuma gato y’uko Jenoside irangiye mu 1996, ubwo twibukiranyaga amateka ya bariyeri yahabaga irindwa n’abajandarume ba Komini Kinigi bakaga imisoro abaturage, twakwibuka ukuntu twabazanyaga niba abo bajandarume bahari, wabimenya ukicira mu gihuru kugira ngo batagufata, bituma bahita kuri Ndabanyurahe".

Ngo muri uyu muhanda wacaga kuri Ndabanyurahe werekeza mu Kinigi, ngo hanyuraga urujya n’uruza rw’abaturage babaga bavuye hirya no hino mu Karere. Ikindi ngo ni uko ku gace k’ishyamba rya Kinigi hahingwaga cyane ibirayi n’itabi, iyo byabaga byeze abaturage bahacaga ari benshi bagiye kubigura, bimwe bijya mu isoko rya Ruhengeri, ngo hari n’abavaga i Gitarama baje kugura cyane itabi, bituma hashyirwa bariyeri kugira ngo babone uko baka abaturage imisoro kuko kuyibona byabaga bigoye cyane.

Kuri ubu iyi Santere imaze gutera imbere kuko hari ibikorwa byinshi by’iterambere birimo inzu nziza z’ubucuruzi, amashuri yisumbuye, ishuri ry’abana bafite ubumuga bwo kutumva no kutabona, umuriro w’amashanyarazi n’ibindi.

Aha niho hari harashyizwe bariyeri bakiragaho imisoro yabaga iriho abajandarume

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .