Uwo muyobozi, Romina Pourmokhtari w’imyaka 30, yazanye umwana we w’umuhungu witwa Adam muri iyo nama yabereye i Luxembourg, mu rwego rwo kugaragaza akamaro ka politiki y’ikiruhuko cy’ababyeyi ifasha ababyeyi gukomeza imirimo yabo badahatirwa guhitamo hagati y’akazi no kurera abana.

Ubuyobozi bw’Inama y’Abaminisitiri ya EU bwemeje ko ari ubwa mbere mu mateka y’uyu muryango hagaragaye uruhinja mu nama y’abaminisitiri, ibintu byafashwe nk’ibidasanzwe cyane mu mikorere y’inzego za politiki z’uru rwego.

Romina Pourmokhtari yavuze ko yashakaga kugaragaza ko bishoboka gukomeza inshingano za Leta umuntu afite umwana muto, igihe habayeho imiterere y’imibereho ifasha ababyeyi, cyane cyane iyo umugabo na we afata uruhare mu kurera umwana.

Muri Suède, politiki y’ikiruhuko cy’ababyeyi ifatwa nk’imwe mu zikomeye ku Isi, aho ababyeyi bahabwa amezi agera kuri 16 y’ikiruhuko cyishyurwa.

Uyu muyobozi yakomeje ashimangira ko iyo politiki ifasha mu kuringaniza ubuzima bw’akazi n’ubw’umuryango, bikagabanya umunaniro ukabije ku babyeyi no kongera umusaruro mu kazi.

Ibi byabaye byakiriwe mu buryo butandukanye n’abandi bayobozi, aho bamwe babifashe nk’intambwe y’iterambere mu bijyanye no gushyigikira ababyeyi bari mu nzego nkuru za politiki, mu gihe abandi babibonaga nk’icyerekana impinduka mu muco w’imikorere y’inama za Leta.

Minisitiri Romina Pourmokhtari w’imyaka 30, yajyanye umwana we w’umuhungu witwa Adam mu Nama y'Abaminisitiri