Kuki abantu basenga bakaba no mu madini yigisha ibyiza ariko ntibahinduke?

Yanditswe na Iradukunda Serge
Kuya 18 Gashyantare 2020 saa 11:12
Yasuwe :
0 0

Ntibikunze kumvikana uburyo amadini agenda yiyongera umunsi ku munsi ndetse n’inzira zifasha abantu kugera ku ijambo ry’Imana zikaba zaragutse ariko ibyaha n’ikibi bikaba byo bikomeza kwiyongera kandi bikagaragaramo n’abasenga.

Ubushakashatsi bwerekana ko abantu Miliyari esheshatu hirya no hino ku Isi bafite idini babarizwamo ribafasha gusenga umunsi ku munsi, abagera kuri 57%, bakaba ari abo mu madini ya Gikirisitu no muri Islam.

Umuhanga w’Umufaransa mu by’imibanire n’abantu, Émile Durkheim, yavuze ko amadini n’amasengesho bifite akamaro mu muryango mugari umuntu abamo umunsi ku munsi.

Durkheim yavuze ko gusenga no kugira idini bifasha ikiremwamuntu kunga ubumwe binyuze mu gusangira indangagaciro yo kwanga ikibi, kubaka indangagaciro nzima mu muntu zituma ataba ikigomeke mu bandi bityo umuryango mugari ukabona uko ugenzurwa no gutanga ibisubizo ku bibazo bijyanye no kubaho.

Gusa uyu munsi iyo urebye hirya no hino ku Isi usanga amadini no gusenga bitagitanga ibisubizo bibiri bya mbere Durkheim yavuze, kuko usanga bamwe mu basenga n’abafite amadini basangiye ingeso, amakosa n’ibyaha kimwe n’abadasenga cyangwa abatagira amadini babarizwamo.

Ibi biri no mu bitera abadasenga kuguma muri iyo nzira kuko batabona itandukaniro riri hagati y’ibyo bakora n’ibyo abasenga bakora.

Impuguke mu gusesengura imyitwarire y’umunyabyaha akaba n’umwanditsi w’igitabo ‘Inside the criminal mind’ Dr Stanton Samenow, yavuze ku mpamvu abanyamadini n’abasenga bakomeza kugaragaza kudahinduka mu mico n’imyitwarire kandi mu by’ukuri ari gusenga bigamije

Yagize ati “Impamvu ni uko batazamura imyumvire yo kumva uburyo ki amahame y’idini no gusenga ashyirwa mu buzima bw’umunsi ku wundi, aya mahame ntaba yemeranya no gukora ibyaha, aba bantu bakunze kwemera ibyigishwa ndetse bakagaragara mu bikorwa n’imihango y’idini ariko ntibabashe gushyira ibyo bigishwa mu buryo bafata abandi”.

Zimwe mu zindi mpamvu zitera abasenga n’abayoboke b’amadini atandukanye kutareka ibibi bakora harimo:

Urugero rubi bahabwa n’ababigisha

Kuba abayobozi b’insengero zitandukanye hirya no hino badashyira mu bikorwa ibyo bigisha bituma babera abayoboke babo ibigusha bityo nabo bakumva ko ibyo umuyobozi atashoboye atari bo bazabishobora cyangwa bakabona ibyo umuyobozi wabo abigisha nk’ibidafite icyo bivuze kuko nawe ubwe atabasha kubyubahiriza.

Kumva ko isaha n’isaha Imana ibabarira

Inyigisho za Gikirisitu ziganjemo kwereka abayoboke ko Imana ari inyembabazi ibabarira umunyabyaha isaha n’isaha, ziri mu bitera abayoboke b’aya madini kutumva uburemere bw’ibibi bakora kuko baba bumva ko igihe bazegera Imana bakayisaba imbabazi bazahinduka bashya n’ibicumuro byabo bakabihanagurwaho, bakaguma muri iyo nzira.

Kutabona ingaruka z’ako kanya z’ibibi bakora

Kuba uwakoze nabi nta ngaruka cyangwa igihano abona by’ako kanya, biri mu bitera abantu basenga kudatezuka ku gukora ikibi.

Zimwe mu zindi mpamvu zishobora gutera umuntu usenga kutareka gukora ibibi harimo kutabona ibihembo by’ako kanya by’ibyiza akora, kudasobanukirwa igikorwa cyo gusenga n’uruhare rw’abantu abana na bo umunsi ku munsi.

Gusa n’ubwo abantu basa n’abatacyumva uruhare rw’idini n’isengesho mu guha amahoro umuntu nawe akayaha n’abandi, Siyansi yagaragaje ko igikorwa cyo gusenga hari icyo gihindura ku myitwarire y’umuntu.

Abahanga mu mikorere y’ubwonko bavuga ko iyo umuntu ari gusenga hari icyo bihindura ku mikorere y’ubwonko bikaba byarinda umuntu guhubuka mu gufata umwanzuro runaka kubera ibimubayeho.

Umuyobozi mu ishami rishinzwe amasomo y’imitekerereze n’imyitwarire akaba n’umuyobozi w’ishami ry’ubuganga muri kaminuza ya Stanford school Of Medecine, Dr David Spiegel, yavuze ko gusenga bihindura imikorere y’ubwonko

Ati “Gusenga bigirwamo uruhare n’ibice by’ubwonko bikomeye birimo igice cya Cortex yo ku gice cy’imbere cy’ubwonko n’iyo ku gice cy’inyuma ku bwonko, ibi bice by’ubwonko bigira uruhare mu gusesengura uburyo umuntu yibona no kwishakamo umutuzo”.

Dr Spiegel avuga ko isengesho rikangura ibi bice maze, ibice by’ubwonko bigira uruhare mu gukora ibikorwa bigasa nk’ibisinzira iyi akaba ariyo mpamvu iyo umuntu asenze abishyizeho umutima bimufasha guhangana n’ibikorwa runaka byamubase.

Abahanga bavuga ko ibi bifasha umuntu gufata umujinya we n’agahinda ke akabifungirana mu isengesho cyane ko ibice bishobora gutuma akora ikibi biba byacitse intege.

Ibi bishimangirwa na Dr. Paul Hokemeyer, umujyanama hagati y’abashakanye n’ababaswe n’ingeso runaka.

Ati “Isengesho rifasha cyane mu kugabanya uburyo twitwara mu bihe bibi cyangwa bitubangamiye, rigira imbaraga kubera ko ryerekeza ibitekerezo byacu ku bindi bintu biri hanze yacu”.

Dr Hokemeyer yakomeje agira ati “mu isengesho, igice cy’ubwonko kirakanguka cyane kigatuma tuba nk’ikinya, tugahangana cyangwa tugahunga”.

Hokemeyer avuga ko aha ariho umuntu usenga akura imbaraga zo guhangana n’ibimwugarije cyangwa akabasha kwirengagiza ibibi byamubayeho mu gihe atari kubibasha iyo aza kuba adasenga.

Umwanditsi w’igitabo ‘The Science of Positivity’ Dr. Loretta G. Breuning, avuga ko kandi isengesho rifasha mu gukangura inzira zo mu bwonko (neuro pathways maze umusemburo ufasha umuntu mu kwizera wa Oxytocin ugatambuka, ibi bigatuma umuntu yiyumva neza nubwo yaba ari mu bibazo, kuko aba yumva ko ibyo arimo byose hari umurinze yizeye agahorana icyizere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .