Isahane ikozwe mu ibumba igiye kugurishwa miliyoni 300 Frw

Yanditswe na Muhonzire Sylvine
Kuya 5 Werurwe 2021 saa 04:50
Yasuwe :
0 0

Agasahane gato kavuye mu Bushinwa gakozwe mu ibumba kagiye kugurishwa amadolari ari hagati ya 300.000 na 500.000. Mbere kari kaguzwe amadolari 35 gusa mu igaraje riherereye muri Leta ya Connecticut muri Leta Zunze Ubumwe za Amerika.

Aka gasahane ni kamwe muri duke dukoranye ubuhanga twabonetse ku Isi, nk’uko 7sur7 ibitangaza. Bivugwa ko kakozwe mu kinyejana cya 15, kugira ngo gashyirwe mu rukiko rw’umwami w’abami w’ubwami bwa Ming mu Bushinwa witwa Yongle Emperor.

Inzu igura ikanagurisha ibihangano bitandukanye yo muri Amerika, Sotheby’s niyo yabengutswe aka gasahane kubera ubwiza gafite, ikabonye ku mafoto y’umuntu utaratangajwe izina, maze imusaba ko yakazana kugira ngo kagurwe, nawe ahita ahanika ibiciro.

Umuyobozi ushinzwe ibihangano byo mu Bushinwa muri Sotheby’s, Angela McAteer, yabwiye AFP ko aka gasahane gatandukanye cyane n’utundi kandi gafite umwihariko utuma kabarizwa mu cyiciro cy’udusahane dutandatu tudasanzwe twagaragaye ku Isi.

Ati “Muri utwo dusahane dutandatu, dutanu duherereye mu nzu ndangamurage zitandukanye ku Isi, tubiri muri Taipei (Taiwan), utundi tubiri turi i Londres (mu Bwongereza), akandi kamwe kari i Tehran (Iran). Aka gatandatu gaheruka kugaragara ku isoko mu 2007.”

Yakomeje avuga ko aka kabonetse biteganyijwe ko kazagurishwa tariki 17 Werurwe muri uyu mwaka, ndetse ko abantu bashobora kugakunda kuko kabayeho kera cyane kandi kakambuka imipaka, kakava mu Bushinwa kakagera Connecticut muri Leta Zunze Ubumwe za Amerika, kakaba kakiriho ari keza nyuma y’ibinyejana birindwi byose.

Ibikoresho byinshi byo mu Bushinwa byageze mu bihugu byo mu Burengerazuba bw’Isi mu kinyejana cya 19, bigenda bihererekanywa mu bisekuruza bitandukanye.

Aka ni ko gasahane kagiye kugurishwa amadolari 300.000 hafi miliyoni 300 Frw /Ifoto: Sotheby's
Kagiye kugurishwa igiciro gikubye inshuro zirenga 8000 z'ayo kaguzwe / Ifoto: Sotheby's

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .