00:00:00 IGIHE NETWORK KN KINYARWANDA EN ENGLISH FR FRANCAIS

Inkomoko y’izina Karongi yahindutse igicumbi cy’ubukerarugendo

Yanditswe na Nsanzimana Erneste
Kuya 17 Mutarama 2023 saa 09:42
Yasuwe :

Muri iyi minsi Karongi izwi nk’Akarere k’ubukerarugendo kubera ibyiza nyaburanga bihaboneka n’amahoteli yiyongera umunsi ku wundi ku nkengero z’Ikiyaga cya Kivu.

Umuntu utamenyereye Akarere ka Karongi iyo ari ku biro byako byubatse mu Murenge wa Rubengera akagari ka Gacaca, umudugudu wa Kamwinjagi aba yumva yageze i Karongi. Iyo agize amahirwe yo kuhatinda asanga yari yishutse kuko abahamenyereye bamubwira ko asigaje urugendo rw’ibirometero nka 40 ku kugira ngo agere ku Karongi.

Umusozi wa Karongi, ni umwe mu misozi igize uruhererekane rw’imisozi itangirira mu majyepfo y’Iburengerazuba ikaminuka amajyaruguru y’urw’imisozi igihumbi.

Iyi misozi misozi irazwi cyane mu bumenyi bw’Isi kuko ni imwe bise ‘isunzu rya Congo-Nili’. Ni imisozi igabanya amazi y’inzuzi z’u Rwanda mo kabiri. Uruzi rwa Nili rugatemba rwerekeza i Burasirazuba, naho urwa Congo rugatemba rwerekeza mu Burengerazuba, ahari igihugu cya Repubulika ya Demokarasi ya Congo.

Sekabera Jean Baptiste atuye mu Mudugudu wa Karongi, Akagari ka Nyarusazi, Umurenge wa Bwishyura mu Karere ka Karongi yabwiye IGIHE ko iri zina rya Karongi ryakomotse kuri uyu musozi muremure uhagararaho, ukareba igice kinini cy’u Rwanda n’igice kinini cya Repubulika ya Demukarasi ya Congo.

Ati “Ni agasozi karekare gasumba iyindi, hakundaga kuba inkuba nyinshi. Mbere amatara ataraba menshi umuntu wabaga ari hano, yarebaga amatara y’I Nyanza ku Rukiko rw’Ikirenga, akanareba umunara w’i Jali. Si ibyo gusa kuko umuntu uhagaze kuri uyu musozi aba areba i Bukavu n’i Goma muri Repubulika ya Demokarasi ya Congo”.

Sekabara w’imyaka 66 avuga ko ubu burebure butuma hari abahita ku Nyoni ya Karongi, bashaka kugaragaza ko umuntu, uhagaze hejuru y’uyu musozi abona utundi duce munsi ye, nk’uko inyoni iri mu giti hejuru ireba ibiri hasi ku butaka.

Mu gushaka kumenya ibisobanuro byimbitse ku nkomoko y’izina Karongi ryahawe umwe mu misozi miremire mu Ntara y’Iburengerazuba, umusaza Sekabara yaturangiye, mugenzi we witwa Murekezi Jean Claude, utuye ku musozi wa Karongi.

Utaganiriye na se ntamenya icyo sekuru yasize avuze. Murekezi Jean Claude w’imyaka 57 tumugezeho yatubwiye ko akiri umwana yajyaga kuragira inyana ku musozi wa Karongi ari kumwe n’abasaza bakuru babaga baragiye inka nkuru.

Abo basaza bamubwiye ko agasozi ka Karongi kera mbere ya Rudahigwa, kari gatuyeho umuntu witwa Rongi, waje kubyara umwana amwita Karongi ari nawe iri zina Karongi rikomokaho.

Ati “Kera agasozi bakitiriraga umuntu ugatuyeho. Karongi rero yari agatuyeho anahafite ibiraro. Agasozi ka Karongi kadufitiye akamaro kanini kuko kadukuye mu bwigunge tubasha kumva radiyo. Mbere batagashyiraho umunara wa ORINFOR radiyo yarasamiraga ntitugire icyo twumva”.

Kuri ubu aka gasozi kamaze kugeraho iminara 9 y’ibigo bitandukanye by’itumanaho. Ku birenge by’uyu musozi niho inkambi ya Kiziba icumbikiye impunzi z’Abanyekongo zimaze imyaka irenga 20 mu Rwanda.

Karongi uretse kuba ari izina ry’Akarere kari hagati mu Ntara y’Iburengerazuba, ni izina ry’imidugudu ibiri yitwa Karongi irimo uwo mu murenge wa Gitesi n’uwo mu murenge wa Bwishyura. Izina Karongi kandi wongera guhura naryo ku rutonde rw’ibigo by’amashuri biri mu karere ka Karongi kuko mu murenge wa Rwankuba hari ishuri ribanza ryitwa Karongi B naho mu murenge wa Bwishyura hakaba ishuri GS Karongi A.

Mu mbavu z’umusozi wa Karongi ahadateye ishyamba n’icyayi, haciweho amaterasi y’indinganire ahingwamo ibirayi, ibigozi, amashaza n’ibindi.

Izina Karongi rikomoka kuri uyu musozi wari utuyeho umusaza witwa Rongi akaza kubyara umuhungu akamwita Karongi
Karongi ni kamwe mu duce tw'ubukerarugendo mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .