Inkomoko y’iminsi ya Weekend ikundwa na benshi

Yanditswe na Iradukunda Serge
Kuya 21 Mutarama 2020 saa 09:21
Yasuwe :
0 0

Amateka yerekana ko hatarashira imyaka 200 hatangijwe gahunda y’uko abakozi bo mu bigo byigenga n’ibya leta bakora iminsi itanu bakagira n’ibiri yo kuruhuka mu mpera z’icyumweru.

Amahirwe Abakozi b’uyu munsi bafite yo kugira iminsi ibiri bagenera gahunda zabo bwite zirimo guhura no gusangira n’inshuti n’abavandimwe, kwitabira ibirori bitandukanye nk’ubukwe, kwizihiza isabukuru zitandukanye, abakozi bo mu bihe bya mbere ntabwo bayahoranye.

Inkoranyamagambo y’abongereza ya Oxford ivuga ko ijambo ‘weekend’ ryakoreshejwe bwa mbere mu 1879 mu kinyamakuru Notes and Queries Observed.

Amateka agaragaza ko kuva kera amadini atandukanye yagiraga umunsi w’umwihariko baruhuka akazi bakawugenera imirimo yo guhimbaza Imana, ku basilamu uyu munsi ni ku wa Gatanu naho ku Bayahudi ni ku wa Gatandatu mu gihe Abakirisitu ari ku Cyumweru.

Gusa bigeze mu myaka ya 1800 mu gihe cy’Impinduramatwara y’inganda nibwo iyi minsi ibiri y’ikiruhuko yatangiye gutekerezwaho.

Muri iki gihe ubukungu bwari bushingiye ku buhinzi, ubworozi n’ubugeni bwatangiye kwerekeza cyane ku nganda, maze n’abakozi bakoraga iyi mirimo batangira kubona akazi muri izi nganda.

Aba bakozi batangiye kugorwa cyane n’uburyo abakoresha babo babahatiraga gukora iminsi yose y’icyumweru bataruhuka, mu gihe bo bari bamenyereye kwipangira uko bakora akazi bakamenya n’igihe cyo kuruhuka.

Iyi mikorere yatumye abakozi batangira kwijujuta kuko batabonaga umwanya wo kwita ku miryango yabo, ibintu byaje gufata indi ntera ubwo abakozi bangaga gukora maze bategura imyigaragambyo yakwiye muri leza zose zigize Amerika.

Aba banyenganda baje kwemera guha abakozi babo icyumweru nk’umunsi w’ikiruhuko, gusa haza kuvuka ikibazo cy’uko muri Amerika hari hamaze kugera Abayahudi benshi bifuzaga ko nabo kuwa Gatandatu batazajya bakora.

Nyuma y’igihe aba banyenganda baje kubona ko gutanga iminsi y’ikiruhuko itandukanye ku bakozi babo bidindiza imikorere, maze bahitamo ko kuwa Gatandatu no ku Cyumweru yombi yaba iminsi y’ikiruhuko.

Mu 1938 uwashinze uruganda rukora imodoka za Ford, Henry Ford nyuma yo kubona ko abenshi mu bakiliya b’imodoka ze ari abakozi yakoreshaga mu ruganda, nk’umucuruzi yaje gusanga kugira ngo agurishe imodoka nyinshi ari uko aba bakozi be bagombaga kubona umwanya uhagije wo kuzigendamo, maze ahitamo kubaha ku wa Gatandatu no ku cyumweru nk’iminsi bazajya baruhukaho bagafata umwanya wo gutemberana n’imiryango yabo mu modoka babaga baguze.

Nubwo ibihugu byinshi biruhuka iminsi ibiri ya nyuma y’icyumweru, hari ibifite irengayobora. Nka Israel bakora kuva ku Cyumweru kugeza kuwa Kane, bakaruhuka kuwa Gatanu no kuwa Gatandatu. Niko bimze muri Arabie Saoudite, muri Leta Zunze Ubumwe z’Abarabu, mu gihe muri Nepal bakora kuva ku Cyumweru kugeza kuwa Gatanu, naho muri Iran bakora kuva kuwa Gatandatu kugeza kuwa Kane, bakaruhuka gusa kuwa Gatanu.

Mu mpera z'icyumweru nibwo abantu babona umwanya uhagije wo kwidagadura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza