00:00:00 IGIHE NETWORK KN KINYARWANDA EN ENGLISH FR FRANCAIS

Ingeso eshanu zishobora kukujyana mu bukene

Yanditswe na Léana Bisa
Kuya 1 July 2022 saa 10:09
Yasuwe :

Iyo utangiye gukorera amafaranga yawe, hari igihe wisanga uri kuyatanga mu bintu byinshi bitandukanye kandi agenda vuba ku buryo rimwe na rimwe usigara amara masa. Ibi byambayeho kenshi, nkagira amafaranga ariko mu kanya nk’ako guhumbya nkisanga yose nayamariye mu bintu bitari ngombwa.

Byambayeho igihe kitari gito kugeza igihe mpinduriye ingeso zimwe na zimwe ntari nzi ko arizo zituma nkoresha amafaranga menshi kandi atari ngombwa, gusa sindi njyenyine niba nawe bikubaho dore ibintu bike bishobora kugufasha.

Kwitwaza amafaranga menshi buri munsi

Ikintu nakundaga gukora ni ugutwara amafaranga menshi, numvaga ko hari igihe nshobora kuyakenera habayeho nk’ikintu ntari niteguye bityo rero nkitwaza amafaranga menshi buri munsi.

Ikintu cyahoraga kibaho ni uko byarangiraga n’ubundi ya mafaranga nyakoresheje mu bintu bitari ngombwa. Urugero ugasanga ndi mu muhanda mbonye akantu keza ndakaguze kandi bitari ngombwa ariko kuko numvaga mfite amafaranga byabaga byoroshye ko nahita nyakoresha kandi nari kuzayakenera ikindi gihe.

Ibi bishobora no kubaho iyo umuntu agendana amafaranga menshi kuri Mobile Money, iyo nzi ko mfite amafaranga menshi kuri konti yanjye ashobora gushira mu gihe gito kuko byoroshye kuba nahita nyakoresha yose mu bintu bitandukanye kandi bitari ngombwa.

Iyo rero ufite amafaranga ukitwaza ayo uri bukenere gusa ndetse no kuri Mobile money ukabikaho make, biroroshye gukoresha amafaranga make, kandi mu gihe ugize ikibazo ushobora no kuyavana kuri banki.

Iyo ubigenje gutyo biroroha kuko mbere yo kuvana amafaranga kuri banki ubanza ukabitekerezaho kabiri kuko uba ubona ko amafaranga yawe ari kugenda.

Kuguriza amafaranga uzakenera

Hari ihame mu bukungu rivuga ko ugomba kuguriza amafaranga utazakenera vuba aha cyangwa se ushobora kubaho udafite. Mu yandi magambo, iyo uguriza amafaranga ugomba kuyafata nk’aho yagiye kandi utazagaruza cyangwa se utazishyurwa.

Ugomba rero kuguriza amafaranga mu rugero ku buryo ntacyo byangiza. Nk’urugero ntushobora kuguriza 900,000 Frw mu gihe ufite miliyoni imwe gusa kuri konti yawe.

Mu gihe umuntu akugujije amafaranga si ngombwa ngo umuhe yose kuko ntayo ufite ahubwo umuha ayo ubona ari mu rugero ku buryo ushobora kumufasha ariko nawe ntiwishyire mu gatebo.

Gutwara amafaranga menshi igihe usohotse

Iyo usohokanye na bagenzi bawe mugasangira mukishima rimwe na rimwe ushobora kwisanga ukomeza gutanga amafaranga menshi kurusha ayo wateganyije.

Ibi byambayeho inshuro nyinshi ntashobora no kubara, njye n’inshuti zanjye twishakiye igisubizo, twese duha amafaranga umuntu umwe, uwo niwe ushinzwe gukurikirana iby’amafaranga byose kugira ngo tutisanga dukomeza gukoresha amafaranga menshi cyane.

Kuzigama udafite intego zitandukanye

Abantu benshi batekereza ko bagomba kuzigama gusa kugira ngo babike amafaranga yicare aho muri banki ntacyo ari gukora, nta ntego isobanutse y’ibyo bari kuzigamira.

Nk’urugero rw’intego umuntu ashobora kwiha, ushobora kuzigama ushaka kugura inzu, imodoka, gutangira ubucuruzi cyangwa se no kuzigamira ikiruhuko cy’izabukuru cyangwa se n’ibindi wifuza kugura. Kuzigama rero byoroha iyo ufite intego yihariye.

Ushobora no kugira intego zitandukanye, ushobora kuzigamira ibintu byinshi icyarimwe, urugero ushobora gufata amafaranga runaka ukayagabanya mu bintu bitandukanye.

Ushobora gufata amafaranga make ukayagabanya intego zitandukanye.

Kudakurikirana amafaranga ukoresha

Gukurikirana amafaranga ukoresha bishobora kutagaragara nk’iby’ingenzi ariko mu by’ukuri ni ingenzi cyane, mu gihe uzi ibyo wakoresheje mu kwezi ushobora guteganya neza ayo uzakoresha ukwezi gutaha.

Binyuze mu gukurikirana, ushobora kumenya icyo ukeneye, icyo udakeneye, icyo ugomba gukoreshaho amafaranga make n’ayo ugomba kuzigama, ibi bishobora kugufasha gukoresha amafaranga make nturengere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .