Ingaruka z’ibibuno by’ibikorano n’ibiterano biharawe muri iyi minsi

Yanditswe na Sekamana Mathias
Kuya 21 Kanama 2019 saa 04:45
Yasuwe :
0 0

Bamwe mu bagore ku isi basigaye bakora ibishoboka ngo bongere ingano y’ibibuno byabo cyangwa bagire amabere manini kandi ahagaze nk’imitemeri mu gituza.

Mu bihugu byateye imbere bakoresha uburyo bwo kwibagisha bagashyiramo pulasitiki mu mubiri, ahandi bagakoresha inshinge, mu gihe ahandi bambara ibibuno n’amabere bagura mu isoko.

Mu Burayi na Leta zunze ubumwe za Amerika niho bakunda kwibagisha amabere n’ibibuno bakabiha ingano bashaka.

Muri Amerika y’amajyepfo ahanini bakoresha uburyo bwo gutera inshinge, bakazitera ku kibuno cyangwa ku mabere, bukaba ari uburyo bwakomotse muri Brésil buzwi nka Brazilian Buttock Lift (BBL).

Muri Afurika na Aziya bakoresha cyane ibibuno bimeze nk’amakabutura abyimbye kuko ari bwo buryo buhendutse cyangwa bashobora kubona hafi.

Mu mwaka wa 2018, igiciro cyo kwibagisha ikibuno cy’uruhande rumwe cyari kigeze ku madolari ya Amerika 4,802. Ni ukuvuga ko kwibagisha ikibuno cyose bifata hafi miliyoni 10 z’amafaranga y’u Rwanda.

Icyakora, ubwo buryo bwo kubaga no gutera inshinge bugira ingaruka nyinshi zirimo kuba warwara kanseri zitandukanye, kugagara kw’ibice bimwe na bimwe by’umubiri n’izindi.

Inshinge zo abashaka impinduka zihuta ntibazikunda kuko ngo umuntu agera ku kigero yifuza nyuma y’amezi 12 ahuye na muganga.

Muri Afurika rero nubwo haba hari bake babashije kwibagisha ibibuno n’amabere, ariko umubare munini w’abatanyuzwe n’ibibuno n’amabere yabo bambara ibikoze nk’imyenda kuko ari byo biboneka hafi yabo kandi ngo ntibigira n’ingaruka nyinshi ugereranyije n’ubwo buryo bundi.

Mu mwaka wa 2018, ikinyamakuru MENAFN cyavuze ko umuvuduko wo kwibagisha no kugura ibibuno mu bihugu bya Afurika wazamutse ku gipimo cya 225% hagati ya 2008 na 2017.

Cyavuze ko kandi mu bice bimwe na bimwe by’imijyi ikomeye muri Afurika mu bagore 100 haba hari mo byibuze 23 bambara ibibuno cyangwa babyongeje.

Afurika y’epfo nicyo gihugu kiri imbere muri kuri uyu mugabane mu kubagisha ibibuno n’amabere, kikaba kiri ku mwanya wa 9 ku isi yose.

Repubulika iharanira Demokarasi ya Congo nayo iri ku isonga mu kugira abagore bakunda ibibuno binini kuko ngo mu muco wabo, umugore ubyibushye ari we ukurura abagabo.

Nigeria nayo iza mu bihugu biri imbere mu gukoresha uburyo bwinshi bwo kongera ibibuno n’amabere by’abagore.

Abagore kongeza ibibuno baba bashaka kugaragara neza mu maso y’abagabo kuko kuva na kera muri kamere y’abagabo habamo gukururwa n’abagore bafite ibibuno binini kurusha uko bakururwa n’abagore bananutse.

Ibishushanyo by’abagore byakozwe mu myaka 24,000 mbere ya Yezu biri mo nk’ikitwa Venus of Willendorf byabaga bifite ibibuno, amatako n’amayasha manini kuko ari byo byagaragaraga neza mu maso y’abagabo.

Mu Bugiriki bwa kera naho, ubwiza bw’umugore bwabaga bushingiye mbere na mbere ku ngano y’ikibuno cye. Ibishushanyo by’amateka y’Abagiririki nka Venus Kallipygos byagaragazaga agaciro ikibuno gifite ku bwiza bw’umugore.

Igihugu bivugwa ko kugira akibuno gito ari kimwe mu bigaragaza ubwiza bw’umugore ni u Buyapani.

Hari abibeshya ko kongeza amabere n’ibibuno bikorwa n’abakobwa bicuruza gusa, ariko ngo n’abagore biyubashye, bafite n’abagabo bakomeye barabikora cyane nkuko byatangajwe na Paul Nassif ufatwa nk’umuwe mu bakomeye bakora akazi ko kubaga ibibuno by’abagore ku Isi.

Nubwo bituma umugore yiyizera ko ateye neza ariko, byose bigira ingaruka ku buzima kuko usibye izavuzwe haruguru ziterwa no kubagwa ndetse n’inshinge, uko wambara ikibuno n’amabere by’ibigurano nabyo ngo bigenda bigabanura ingano y’ibyawe usanganywe ku buryo ugera aho udashobora kujya ahantu na hamwe utacyambaye.

Ngo bishobora kandi gutera impumuro mbi kuko umubiri ubira ibyuya cyane iyo wambaye icyo kibuno kurusha iyo wambaye imyenda isanzwe yoroheje.

Muri Afurika bakunze gukoresha ibibuno by'ibikorano
Ibibuno by'ibiterano nibyo bihendutse kurusha kwiteza inshinge
Ku mugabane wa Afurika, ahenshi abagabo bakunda umugore ufite ikibuno kinini
Ibishushanyo by’abagore byakozwe mu myaka 24,000 mbere ya Yezu biri mo nk’ikitwa Venus of Willendorf byabaga bifite ibibuno, amatako n’amayasha manini bikagaragaza uburyo abagabo bishimiraga abagore bafite ibibuno binini
Gukoresha inshinge no kwibagisha birahenda cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza