Imyitwarire n’uko wabwira umwana ko uwo akunda yapfuye

Yanditswe na Rosine Ingabire
Kuya 18 Kanama 2020 saa 09:55
Yasuwe :
0 0

Urupfu ntawe urumenyera, buri gihe iyo rwaje ruhora ari rushya mu maso n’amatwi yacu. Umuntu wapfuye n’iyo mwaba mutaziranye, iyo ubimenye wumva impinduka mu mubiri.

Byashoboka ko abantu bose nubwo bagirwaho ingaruka n’amakuru avuga ku rupfu rw’umuntu bazi, atari ko bayakira kimwe. Ku bo mu muryango w’uwapfuye ho biba ari ibindi bindi.

Kubwira abana ko umwe mu bantu bakundaga yapfuye ni rimwe mu mahurizo akomera. Birushasho iyo ubwira abana urupfu rw’umuntu mwese mwakundaga, ari wowe utibashije noneho ukagerekaho kubisobanurira abana.

Gusobanurira abana ko runaka bakunda yapfuye biragoye cyane ariko inzobere zigaragaza ko bishoboka mu gihe wubahirije inama.

Uko ukwiriye kwitwara ku bana mu gihe umuntu bakunda yapfuye:

Vugisha ukuri: Mu gihe umuntu yapfuye, inzobere zigaragaza ko atari byiza guhishahisha, uca hirya no hino ngo ubimenyeshe abana. Ni byiza kubivuga uko biri kandi niba ufite amarangamutima mu kubivuga nabyo ukabigaragaza. Ibyo bituma abana bitegura neza ibyabaye n’ibizakurikiraho.

Witegure amarangamurima y’umwana: Mu gihe ugiye kubwira umwana wawe ko runaka yapfuye, witegure ibibazo azakubaza kandi ubisubize. Abana bakira amakuru nk’ayo mu buryo butandukanye, hari abazarira, hari abarakara, hari abazabaza ibibazo bashaka kumenya byinshi, ugomba kuba witeguye.

Ntusigirize amagambo asobanura urupfu: Akenshi iyo umuntu yapfuye hari abo usanga babwira abana ngo kanaka yagiye mu ijuru, ngo yasinziriye n’andi. Inzobere zivuga ko atari byiza kubeshya umwana kuko bishobora kumushyira ku byizere bidashira. Kubwiza umwana ukuri bituma amenya neza ibiri kuba mu gihe cy’ikiriyo kandi bigafasha kugenda n’abandi mu rugendo rwo kwakira ibyabaye.

Genda umuha amakuru gahoro gahoro: Amakuru ajyanye n’urupfu, biba byiza iyo umwana ugiye umuha ayo akeneye gahoro gahoro, ntuhite umubwira byose icyarimwe ku buryo bishobora kumuremerera ntabashe kubyakira. Tegereza umusubize ukurikije ibibazo akubaza aho kumubwira n’ibyo atari kubaza cyangwa ubona adafite amatsiko yo kumenya.

Ha umwana umwanya arire ndetse nibiba ngombwa mwembi muririre hamwe, bifasha kuruhuka mu mutima.

Bwira umwana ibigiye gukurikiraho: Ni byiza gutegura umwana ibigiye gukurikiraho nyuma y’uko umuntu yakundaga apfuye. Niba urugero uwapfuye ari nyirakuru wajyaga amujyana ku ishuri, mubwire ko sogokuru ari we uzajya umujyana ku ishuri. Niba umubyeyi we yapfuye akaba agiye kurererwa mu wundi muryango, mutegure hakiri kare umubwire ko runaka wo mu muryango ari we ugiye kujya amwitaho.

Hereza umwana umwanya mu mihango yo gushyingura: Ni byiza ko abana bahabwa inshingano mu mihango yo gushyingura. Yaba mito cyangwa minini, ipfa kuba itabaremereye. Ushobora kumushinga kuzaba atwaye ifoto y’uwapfuye mu gihe cyo gushyingura, ushobora kumushinga kuvuga umuvugo n’ibindi.

Tegura umwana ku byo azabona mu gihe cyo gushyingura: Mu gihe cyo gushyingura, haba amarangamutima menshi. Hari abarira cyane, hari abagwa igihumura, hari abafatwa n’ikiniga n’ibindi. Ibyo byose ni ngombwa ko umwana ategurwa mbere kugira ngo atazabibona agatungurwa bikaba byamugiraho ingaruka.

Ni byiza kandi kumusobanurira ko azabona isanduka, imva, indabyo n’ibindi. Mu gihe wowe utabashije kubyikorera, ni byiza gushaka uzaba ari kumwe n’abana mu gihe cyo gushyingura.

Itegure ibibazo by’abana nyuma y’ikiriyo: Na nyuma yo gushyingura, ibibazo by’abana ku muntu wapfuye bizakomeza. Ni byiza gukomeza kubyitegura kandi ukabaha ibisubizo byumvikana.

Hereza umwana umwanya wo kwiyakira: Ntabwo abantu twakira ibintu kimwe ndetse hari abo bifata igihe kugira ngo basubire uko bahoze. N’abana ni gutyo. Irinde kubwira nabi umwana kuko akubajije ku muntu wapfuye, cyangwa se ngo umukankamire kuko agize ikiniga akarira. Ashobora no kwigunga, kumva yihebye n’ibindi.

Muhe umwanya ahubwo utegure ibishobora gutuma abona ko abo babana bamwitayeho. Ibyo bizagenda bimuha icyizere cyo kongera kugaruka no gukira ibikomere by’uwo yabuze.

Ni byiza gutegura umwana mu gihe uwo akunda yapfuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .